Prezident: "Azərbaycan dünya miqyasında önəmli ölkəyə çevrilib"

Prezident:
15:51
18.03.2017
48
Siyasət
A
“Son illərin beynəlxalq münasibətləri göstərir ki, əfsuslar olsun, beynəlxalq təşkilatlar artıq o qədər də ciddi təsirə malik deyillər. Böyük dövlətlər isə öz maraqlarını güdürlər, beynəlxalq hüququ istədikləri kimi təhrif edirlər. Belə olan halda güc əsas amildir və biz bunu bilirik”.

Bunu Azərbaycan prezidenti İlham Əliyev Novruz bayramı münasibətilə keçirilmiş ümumxalq şənliyində çıxışı zamanı bildirib.

Prezident deyib ki, müstəqil siyasətimiz bizim qürur mənbəyimizdir: “Bu, onu göstərir ki, Azərbaycan xalqı öz gələcəyini özü müəyyən edir. Müstəqil siyasətimiz bizi mövcud olan risklərdən də qoruyur. Hələ 5-6 il bundan əvvəl yaxın bölgələrdə vəziyyət tam başqa idi. Heç kim təsəvvür edə bilməzdi ki, bu bölgələrdə münaqişə, müharibə ocaqları yaranacaq, yüz minlərlə insan həlak olacaq, milyonlarla insan qaçqın-köçkün vəziyyətinə düşəcək. Ancaq bütün bunlar artıq reallıqdır. Nəyə görə bu, baş verdi?! Əlbəttə ki, xarici müdaxiləyə görə. Biz bunu bilirik və mən həmişə bütün bu məsələlərlə bağlı öz mövqeyimi bildirmişəm. Eyni zamanda, o ölkələr müstəqil həyata hazır deyildilər. O ölkələrdə xalq-iqtidar birliyi yox idi. O ölkələrdə kütləvi narazılıq var idi. Ona görə belə acınacaqlı, bədbəxt hadisələr baş verdi. Bütün bunlar bizim gözümüzün önündə baş verir və bir daha həm xalqımıza, həm bütün dünyaya göstərir ki, bu gün Azərbaycan doğrudan da dünya miqyasında öz siyasəti ilə fərqlənən və bir çox ölkələr üçün nümunəyə çevrilən bir ölkədir”.

Ölkə başçısı qeyd edib ki, Azərbaycanın beynəlxalq mövqeləri də möhkəmlənib: “Yanvar ayının ortalarından bu günə qədər mənim xarici səfərlərimin coğrafiyasına nəzər salsaq görərik ki, Azərbaycan çoxşaxəli və uğurlu xarici siyasət aparır. Son iki ay ərzində mən 7 dəfə xaricə səfər etmişəm. Azərbaycan dünyanın aparıcı, ən mötəbər Davos Forumunda və Münxen Konfransında ləyaqətlə təmsil olunub. Dünyanın həm biznes, həm də siyasi elitasından bizə olan hörmət göz qabağındadır. Avropa Komissiyasına mənim uğurlu səfərim olub. Bu səfər nəticəsində Avropa Komissiyası ilə Azərbaycan arasında yeni sazişlə bağlı danışıqlara start verildi. Onu da qeyd etməliyəm ki, bu da nadir hadisədir. Bu danışıqların aparılması üçün layihəni Azərbaycan təqdim edib və bu layihə qəbul edilibdir. Ümid edirəm ki, yaxın zamanlarda danışıqlarda fəal proses başlanacaq və tezliklə bu mühüm saziş bağlanacaq. Qətərə, Pakistana, İran İslam Respublikasına mənim rəsmi səfərlərim olub. Müsəlman ölkələri ilə bizim əlaqələrimiz möhkəmlənir. Xalqımız yaxşı bilir ki, Azərbaycan İslam həmrəyliyi üçün çox böyük işlər görür, çox böyük töhfələr verir. Bunu İslam aləmi qiymətləndirir. İslam Əməkdaşlıq Təşkilatının rəhbərləri dəfələrlə bizim siyasətimizə ən yüksək qiymət vermişlər. Azərbaycan İqtisadi Əməkdaşlıq Təşkilatının zirvə görüşündə fəal iştirak edib. Biz son 5 ildə bu təşkilata uğurlu sədrlik etmişik. Bu yaxınlarda Fransaya rəsmi səfərim də çox uğurlu keçdi. Fransa dünyanın aparıcı ölkələrindən biridir və mənim səfərimi izləyən vətəndaşlar gördülər ki, ölkəmizə çox böyük hörmət, çox böyük maraq var. Biz həm siyasi, həm iqtisadi, həm enerji sahələrində və digər sahələrdə uğurlu əməkdaşlıq edirik. Onu da qeyd etməliyəm, Azərbaycan postsovet məkanında yeganə ölkədir ki, Avropa İttifaqına üzv 9 ölkə ilə strateji tərəfdaşlıq haqqında sənədlər imzalayıb. Bu günlərdə Bakıda V Qlobal Forum keçirilir. Forumda 40-dan çox fəaliyyətdə olan və sabiq dövlət, hökumət başçıları iştirak edirlər. Azərbaycan nəinki bölgədə, artıq dünya miqyasında önəmli ölkəyə çevrilib”. 

ŞƏRH YAZ
0

Sonuncu plenar iclasda bu məsələlər müzakirə olunacaq — Milli Məclisdə

Sonuncu plenar iclasda bu məsələlər müzakirə olunacaq
17:12
Bu gün
194
Siyasət
A
Milli Məclisin yaz sessiyasında sonuncu plenar iclasının gündəliyi müəyyənləşib.

"Ölkə.Az"ın xəbərinə görə, gündəliyə 20 məsələ daxil edilib. Bunlar “Azərbaycan Respublikasının 2017-ci il dövlət büdcəsinin icrası haqqında”, “Əlilliyi olan şəxslərin hüquqları haqqında” qanun layihələri, Torpaq Məcəlləsinə dəyişiklik və digər məsələlərdir. 

Qeyd edək ki, sonuncu iclas mayın 31-də keçiriləcək. İyunun 12-də isə bir qrup deputatın müraciəti əsasında növbədənkənar sessiya çağırılıb.

 

ŞƏRH YAZ
0

“Ailənin tək oğlan övladı ön cəbhədə xidmət keçməməlidir” — deputatdan TƏKLİF

“Ailənin tək oğlan övladı ön cəbhədə xidmət keçməməlidir”
16:50
Bu gün
897
Siyasət
A
“Ailələrin tək oğlan övladları ön cəbhədə deyil, arxa cəbhədəki hərbi hissələrdə xidmət keçməlidir”.

Bu barədə təkliflə Milli Məclisin deputatı Fəzail İbrahimli “Ölkə.Az”a açıqlamasında çıxış edib. 

F.İbrahimli deyib ki, Azərbaycan tam müharibə şəraitində yaşamır. 

Onun sözlərinə görə, Azərbaycan Ordusunun canlı qüvvəsi də kifayət qədərdir:

“Düşünürəm ki, bu gün Azərbaycan müharibə vəziyyətində olsa da, ancaq geniş hərbi əməliyyatlar getmir. Doğrudur, cəbhədə hər gün atəşkəs pozulur. Ancaq Azərbaycan Ordusunun igid oğulları düşmənin cavabını layiqincə verir. Hesab edirəm ki, belə bir vəziyyətdə ailələrin tək oğlan övladları arxa cəbhələrdə xidmət etsələr, bu İslam əxlaqına da tam uyğun olar. Çünki bu gün Azərbaycanda elə ailələr var ki, orada 5 qızı olsa da, oğul övladı olmayana sonsuz kimi baxırlar. Bu əxlaq müstəvisində və bu cür düşüncə ilə yanaşsaq, o zaman ailələrin tək oğlan övladlarının ön cəbhədə deyil, arxa cəbhədə xidmət keçməsi məqbul sayılır. Ancaq əgər müharibə başlayarsa, o zaman mən də əli silah tutan hər bir şəxsin cəbhəyə yollanmasına tərəfdaram”.

Vasif Həsənli
Ölkə.Az

ŞƏRH YAZ
0
BAĞLA