Prezident olmaq istəyənlərin debatları başladı

“Ölkə.Az” xəbər verir ki, bu gün Mərkəzi Seçki Komissiyasında keçirilmiş püşkatmanın nəticələrinə əsasən, çıxışlar aşağıdakı ardıcıllıqla müəyyən olunub. 

1. Zahid Oruc 

2. Araz Əlizadə

3. Qüdrət Həsənquliyev

4. İlham Əliyev

5. Razi Nurullayev

6. Sərdar Cəlaloğlu

7. Fərəc Quliyev 

8. Hafiz Hacıyev

Qeyd edək ki, hər dəfə 1 saat olmaqla həftədə 3 dəfə debat təşkil olunacaq, həftədə 3 saat isə İctimai radioda debatlar keçiriləcək və saat 19:00-da başlayacaq.

***
Prezidentliyə namizəd Zahid Oruc ilk çıxışı edib. 

"Ölkə.Az" xəbər verir ki, o, çıxışında siyasi qüvvələr arasındakı düşmənçilik münasibətlərindən danışıb. Z. Oruc bildirib ki, ölkədə siyasi qüvvələr arasında münasibətlər uzun illərdir ki, siyasi düşmənçilik üzərində qurulub. Bu məsələnin həlli kimi isə prezidentliyə namizəd müxalifət liderlərinə çağırış edib: “Buradan Lalə Şövkət, İsa Qəmbər və Etibar Məmmədova çağırış edirəm. Qoy onlar Fəxri Xiyabanda ulu öndər Heydər Əliyevin məzarını ziyarət edib sübut etsinlər ki, dövlət quran kişilərə hörmət edirlər”.

***
Növbəti çıxışı Qüdrət Həsənquliyev edib. O, müxalifətçilərə irad bildirib. Q. Həsənquliyev Azərbaycanda hökumət üzərində ciddi müxalifət nəzarəti olmadığını deyib.

Prezident İlham Əliyevin nümayəndəsi Əli Əhmədov isə ölkədə aparılan işlərdən danışıb. Deyib ki, tədbirlər sayəsində Azərbaycanda 1,9 milyon iş yeri açılıb. 

Prezidentliyə digər namizəd Razi Nurullayev Vidadi İsgəndərliyə səslənib və ritorikasını dəyişməyi istəyib: “Çünki Azərbaycanda bu cür təhqir dolu danışıqlar vətəndaş müharibəsinə gətirib çıxarır”.

R. Nurullayevdən sonra Sərdar Cəlaloğlu çıxış edib. O, Q. Həsənquliyevin iradına cavab verib. Bildirib ki, müxalifət hökumətin ən xırda işlərinə belə nəzarə edir.

***

Fərəc Quliyev insanları seçkilərdə normal iştirak etməyə və boykot çağırışlarına fikir verməməyə çağırıb. O, hamının taleyinin öz əlində olduğunu deyib.
Daha sonra o, Strateji Yol Xəritəsindən danışıb. Bildirib ki, neftə üstünlük verən siyasət yürütməlidir və Strateji Yol Xəritəsini həyata keçirməklə problemlərdən xilas olunmalıdır.

Hafiz Hacıyev isə Azərbaycanda hakimiyyətin daxilində öyrədilmiş bir qrup insanların Avropanın küçələrinə səpələndiyini vurğulayıb: “Axşamacan bizi təhqir edirlər. Kimi təhqir edirlər?! Ölkənin birinci şəxsini, Hafiz Hacıyevi... Ay orda oturub danışan qardaşlar, sizin malınızı yeyənlər qalıb qıraqda, mənim adımı hallandırırsınız. Görün üçüncü bir şəxsin adı çəkilirmi? Niyə çəkilmir? Ölkədə məgər bir nəfərdir?! Yox. Azərbaycan hökumətinin daxilində oturub mənəvi cəhətdən satqın insanlardır”.

Ölkə.Az