Prezidentin BMT demarşı və erməni uzantıları

Prezidentin BMT demarşı və erməni uzantıları
11:23
22.09.2017
284
Ölkə
A

Azər HƏSRƏT


Prezident İlham Əliyevin yüksək tribunalardan etdiyi hər çıxış tarixə öz damğasını vurmağa davam edir. Bu baxımdan cənab Prezidentin BMT Baş Məclisindəki çıxışı da istisna deyil. Çıxışın özəllikləri – istər heç cür inkar edilə bilməyəcək məntiqə dayanması, istərsə də faktoloji məzmunu baxımından bizə qarşı olanların sadəcə dilini-ağzını anındaca bağlamağa yetir. Bundan başqa Prezidentin xarizması, BMT Baş Məclisi üçün getdiyi tədbirdə yüksək səviyyəli görüşlər keçirməsi də diqqətdən qaça bilməz. Əlbəttə, keçirilən hər bir görüş əhəmiyyətlidir. Amma onun ABŞ prezidenti Donald Trampla görüşü müstəsna əhəmiyyət kəsb edir. Hələ nəzərə alaq ki, bu görüşdə hər iki tərəfin birinci xanımları da iştirak edib.

Azərbaycan Prezidentinin bu səfəri və çıxışı birmənalı olaraq ölkəmizin mənafelərini düşünən insanları ruhlandırır. Əvəzində isə bizə qarşı olanları, özəlliklə də erməniləri və onların dəyirmanına su tökməyi yaşam tərzinə çevirmiş “bizimkiləri” rahatsız edir.

Erməniləri və onların havadarlarını anlamaq olar. Çünki Prezident İlham Əliyev bu dəfə də sadəcə bir çıxışla onların milyonlar xərcləyərək bütün dünyaya tirajladığı yalanlarını alt-üst etdi. Bəli, sadəcə bir çıxışla. Azərbaycan Prezidenti öz çıxışında bəzəkli sözlərdən istifadə etmədi, konkret danışdı, hər şeyi öz adıyla çağırdı.

Elə biz də Prezidentin çıxışından hərəkət edərək iki istiqamətdə fikirlərimizi təqdim etmək istərdik.

Birinci istiqamət Azərbaycanın ən ümdə problemi – Ermənistanın işğalı altındakı torpaqlar, insanlarımızın hələ də qaçqın-köçkün halında yaşaması, BMT-nin məlum qətnamələrinin qulaqardına vurulmasını təkrar diqqətə çatdırmaqla bağlıdır. Prezident İlham Əliyev bu məsələləri hər kəsin anlaya biləcəyi və mübahisələndirmək üçün imkan tanımayacaq şəkildə təqdim etdi.

Burada diqqət çəkən əsas məsələlərdən biri də Ermənistanın monoetnik dövlətə çevrilməsi, milli azlıqların faktiki olaraq bu ölkədən büsbütün çıxarılmasıdır. Doğrudan da bugünün Ermənistanı torpaqlarını işğal etdiyi Azərbaycandan fərqli olaraq multikulturalizm və tolerantlığı dövlət səviyyəsində rədd edən yeganə dünya dövlətidir. Burada fərqli millətlərə yer yoxdur, onların özəl dəyərləri erməni xarakteri içərisində yox edilib. Bu ölkə ən azı ATƏT çərçivəsində yeganə monoetnik ölkədir.

Azərbaycansa, işğalçı qonşudan fərqli olaraq hər kəsə qucaq açan, hamının bərabərhüquqlu yaşamını təmin edən model bir ölkədir. Təbii ki, belə bir ölkənin prezidenti kimi İlham Əliyev ən yüksək tribunalardan üzüağ, alnıaçıq və yüksək səslə danışmaqda işğalçı Ermənistanın uşaq qatili prezidenti Serj Sargsyandan fərqli olaraq haqlıdır və heç kim onun bu haqqına müdaxilə edə bilməz. Zatən müdaxilə edəcək kimsə də yox.

İlham Əliyevin BMT tribunasından belə ürəkli danışa bilməsini şərtləndirən ikinci əsas amil isə xalqla hakimiyyət arasında uçurumun yoxluğudur. Azərbaycan dünyanın az saylı ölkələrindəndir ki, burada siyasi münasibətlər modeli xalqla Prezident İlham Əliyevin hakimiyyəti arasında qarşılıqlı anlaşma və dəstək üzərində qurulub. Azərbaycan Prezidenti xalq adamıdır, hətta özünə qarşı olanların belə bütün anlamlarda prezidentidir. Ona görə də bu ölkədə ortaya çıxan hansısa fikir ayrılıqları xalqla prezidenti üz-üzə qoymur, əksinə, ona olan etimadı daha da möhkəmləndirir. Belə bir ölkənin prezidenti olaraq İlham Əliyev həmişə ən yüksək səviyyəli beynəlxalq tribunalarda əminliklə, qətiyyətlə çıxış edir. Çünki öz xalqının dəstəyinə arxayındır.

Elə BMT Baş Məclisindəki çıxışında cənab Prezidentin işğalçı siyasətindən əl çəkməyəcəyi təqdirdə Ermənistanı 2016-cı ilin aprelində olduğu kimi yenidən cəzalandıra biləcəyimizi açıq mətnlə dilə gətirməsi bunun daha bir sübutudur.

İlham Əliyevin əlini və məntiqini gücləndirən amillər sırasında, heç şübhəsiz, ölkənin son illər ərzində sıçrayışlı istisadi inkişafı təmin etməsi də var. Eyni zamanda Azərbaycanın özəlliklə də Avropa üçün neft və qaz təchizatı məsələlərində dayanıqlı əsas tərəfdaşa çevrilməsi diqqətə alınmalıdır. Günümüzün Avropası başqa mənbələrdən gələn enerji təchizatında sürəkli risk altında olduğu halda Azərbaycanın bu yöndəki davranışı nəinki bu gün, elə önümüzdəki uzun illər üçün də təminat deməkdir. Yəni Avropa bu məsələdə arxayındır.

Azərbaycan öz xarici siyasətində, beynəlxalq müstəvidəki davranışlarında da etibarlı, sabit tərəfdaş olduğunu hər zaman birmənalı sübut edib. Belə bir durum isə cənab Prezidentin hər zamankı kimi arxayın və qətiyyətli çıxışına, davranışına rəvac verməyə bilməzdi.

Bütün bunların fonunda bir də onu müşahidə edirik ki, bədxahlarımız, erməni dəyirmanına su tökənlər ən cılız iddialarla cənab Prezidentin bu danılmaz uğuruna kölgə salmağa çalışırlar. Dediyim kimi, cılız iddialarla.

O iddiaları niyə məhz cılız kimi dəyərləndiririk? Çox sadə bir səbəbdən: həmin iddialar cənab Prezidentin çıxışında toxunduğu danılmaz həqiqətlərə cavab xarakterli deyil də, ondan.

Görün, bu aşağılıq kompleksindən əziyyət çəkənlər nəyə irad tuturlar? Cənab Prezidentin qızı, özünün ictimai və humanitar fəallığıyla ən yüksək səviyyədə seçilən və gənc olmasına baxmayaraq yetərincə təcrübə qazanmağı bacardığını bütün işlərində göstərən Leyla Əliyevanın özçəkim etməsi bu bədbəxtlərin irad tuta biləcəyi tək “arqument” kimi ortaya atılıb. Bunu kim ortaya atıb? Təbii ki, ermənilər və onlara züy tutan “bizimkilər”. Bu yazıq və bədbəxtlərdən ibarət sürü deyir ki, niyə Leyla Əliyeva orada özçəkim edib? Hələ deyirlər ki, Leyla Əliyeva Prezidentin çıxışı zamanı üzündə təbəssümlə edib bunu.

Heç dəxli var? Nə etməliydi, sizin kimi şivən salmalıydı orda? Həm də bir Azərbaycan gənci olaraq Leyla Əliyevanın da öz ölkəsinin prezidentinin bu qədər möhtəşəm çıxışını təbəssümlə, sevinclə qarşılamasından təbii nə ola bilər ki?

Mən əminəm ki, Azərbaycan gəncliyinin avanqardı olan Leyla Əliyeva o çıxışı dinlərkən Prezident İlham Əliyevi sadəcə olaraq atası kimi deyil, xalqının lideri kimi dəyərləndirib, buna ürəkdən sevinib və sevincini kübar bir təbəssümlə büruzə verərək həmin anı tarixiləşdirmək üçün özçəkim edib. Və doğru da edib. Həqiqətən də o an tarixin yaddaşına məhz o şəkildə həkk edilməliydi.

Sözümüzü bitirərkən bir daha qeyd etmək istərdik ki, cənab Prezidentin BMT-nin bu ali tribunasından etdiyi çıxış onun Azərbaycan davasının haqlı öndəri olmasını bir daha və qətiyyətlə təsdiq edir. Eyni zamanda biz ona da şahid olduq ki, Prezident İlham Əliyevin xalq adına yürütdüyü siyasətdən narahat olan ermənilər və onların bizdən olan uzantıları bir daha çılğına döndülər, başlarını itirdilər və əmin oldular ki, Azərbaycan xalqıyla onun prezidenti arasına girmək heç cür mümkün olmayacaq.

Ölkə.Az

ŞƏRH YAZ
0

Qurban bayramı ilə bağlı yarmarkalar keçiriləcək — SİYAHI

Qurban bayramı ilə bağlı yarmarkalar keçiriləcək
18:02
Bu gün
392
Ölkə
A
Qurban bayramı ilə əlaqədar Kənd Təsərrüfatı Nazirliyinin dəstəyi ilə paytaxt və bölgələrdə iribuynuzlu və xırdabuynuzlu heyvanların satış yarmarkası keçiriləcək.

Nazirlikdən "Ölkə.Az"a verilən məlumata görə, yarmarkalar Qida Təhlükəsizliyi Agentliyinin müəyyən etdiyi məntəqələrdə təşkil olunacaq. Satış yarmarkalarının Bakı şəhərinin 32 nöqtəsində, Gəncə, Neftçala, Lənkəran, Şəki, Şirvan, Quba, Ağdaş, Şamaxı, Göyçay, İsmayıllıda keçirilməsi nəzərdə tutulur.

21-23 avqust tarixlərində keçiriləcək yarmarkalarda ümumilikdə 35 minə yaxın qurbanlıq heyvanın satışa çıxarılması nəzərdə tutulub. Satış üçün nəzərdə tutulan 20 min baş heyvan Kənd Təsərrüfatı Nazirliyi ilə Dövlət Gömrük Komitəsinin iri sahibkarlara tövsiyəsi əsasında qonşu ölkələrdən, əsasən də Gürcüstan Respublikasından gətirilib. Qonşu ölkələrdən xırdabuynuzlu heyvanların gətirilməsində məqsəd bazarda bolluq yaratmaq, qiymətləri sabitləşdirməkdir.

Bundan başqa Kənd Təsərrüfatı Nazirliyinin müraciəti əsasında bölgələrdə fəaliyyət göstərən fermerlər yarmarkalara ümumilikdə 13 min baş heyvan çıxaracaq. Nazirliyin tabeliyində olan təsərrüfatlardan isə yarmarkalara təxminən 1000-1500 baş iri və xırda buynuzlu heyvanlar gətiriləcək.

Qeyd edək ki, Kənd Təsərrüfatı Nazirliyi yanında Dövlət Baytarlıq Xidməti artıq Qida Təhlükəsizliyi Agentliyinin müəyyənləşdirdiyi ət kəsimi və heyvan satışı məntəqələrində profilaktik məqsədlə dezinfeksiya işlərinə başlayıb. Dezinfeksiya işlərinin aparılmasında məqsəd heyvanlar arasında xəstəliklərin yayılmasının qarşısını almaqdır.

Satış yarmarkaları aşağıdakı məntəqələrdə fəaliyyət göstərəcək:

Bakı şəhəri üzrə

Nərimanov rayonu

Əliyar Əliyev küçəsi, 26 (“Bakı Taxıl-2” ASC-yə məxsus heyvan kəsimi məntəqəsi)
Əlyar Əliyev küçəsi, 36a (“Təbriz” KM, Keşlə bazarı)
Təbriz küçəsi ilə Ceyhun Hacıbəyli küçəsinin kəsişməsi (“Qarabağ” mehmanxanasının söküntü sahəsindəki avtomobil dayanacağı)

Suraxanı rayonu

Hövsan-Türkan yolunun sol tərəfində yerləşən ticarət mərkəzinin yanı
Qaraçuxur qəsəbəsi , Yeni Günəşli, “V” massivi

Binəqədi rayonu

Rəsulzadə qəsəbəsi (Binəqədi şosesi)
Biləcəri qəsəbəsi, Xocəsən-Biləcəri-Binəqədi yolu (“Dördyol” adlanan yer)
Binəqədi qəsəbəsi, Gülüstan massivi, döngə 15 (Heyvan bazarının yanı)
Cəfər Xəndan küçəsi, 54, “Oazis” restoranının yanı (“Ət pavilyonu” adlanan ərazi)

Xətai rayonu

Zığ yolu (“Nargilə” adlanan yer və 5 saylı binanın yaxınlığında)

Yasamal rayonu

Yeni Yasamal yaşayış massivi, Dadaş Bünyadzadə küçəsi, 7
Xiyabani küçəsi, 10c
Şərifzadə küçəsi 196, “İdeal” şadlıq sarayının həyəti

Nizami raronu

Mehdi Abbasov və Əli Vəliyev küçələrinin kəsişməsi
Mikayıl Əliyev və Rüstəm Rüstəmov küçələrinin kəsişməsi

Səbail rayonu

20-ci sahə (Badamdar şosesi)
Bayıl bazarı, Gülbala Əliyev küçəsi

Xəzər rayonu

Qala-Pirallahı yolu, “Lambir“ müəssisənin arxası

Qaradağ rayonu

1. Lökbatan qəsəbəsi (“Meyvəli” MMC-nin ərazisi)

Sabunçu rayonu

1. Bakıxanov qəsəbəsi, Fətəliyev küçəsi 72, “Arzu” şadlıq sarayının yanı

2. Sabunçu qəsəbəsi, şəhər şosesi döngə 6, “Sabunçu” mərasim evinin yanı

3. Ramana qəsəbəsi, Şuşa şəhərciyi, “Pətək” marketin yanı

4. Zabrat qəsəbəsi,” Azmeat” MMC

5. Zabrat-Kürdəxanı şosesinin sağ tərəfi

6. Zabrat-Kürdəxanı şosesinin sağ tərəfi, “Araz” marketin yanı

7. Kürdəxanı qəsəbəsi, Hüsü Hacıyev küçəsi 6

8. Maştağa qəsəbəsi “Kanal” marketin yanı

9. Bilgəh qəsəbəsi, Azərbaycan qadını küçəsi

10. Nardaran qəsəbəsi, Axundzadə küçəsi 107

11. Bakıxanov qəsəbəsi, Xəlilbəy Xasməmmədov 24 keçmiş “Sərhan” marketin yanı

Bölgələr

Gəncə şəhəri

Yeni Gəncə qəsəbəsi, 2№-li məktəbin yanı

Neftçala rayonu

Neftçala bazarı, Məhəmməd Əsədov küçəsi
Xili qəsəbəsi
Bankə qəsəbəsi
Həsənabad qəsəbəsi

Şamaxı rayonu

Şamaxı şəhər stadionun yanı

Göyçay rayonu

Rayon ərazisində fəaliyyət göstərən heyvan satışı bazarı (Göyçayın Ağsu tərəfdən girişi)

İsmayıllı rayonu

“Yaşıl market”

Lənkəran şəhəri

Bakı-Astara magistral yolunun 200 kilometrliyində, Lerikə dönən yolun solunda, Şiləvar kəndi ilə üzbəüz.

Ağdaş rayonu

Zeynəddin kəndi, mal bazarı

Quba rayonu

Heydər Əliyev prospekti, “Ət bazarı” deyilən ərazidə

Şirvan rayonu

18 №-li məktəbin həyəti
16№-li məktəbin həyəti

10) Şəki şəhəri

Şəki şəhərinin “Çöl yolu” adlanan ərazisində yerləşən heyvan satışı bazarı

ŞƏRH YAZ
0

Komitədən Qarabağ veteranlarının etirazına cavab

Komitədən Qarabağ veteranlarının etirazına cavab
16:51
Bu gün
696
Ölkə
A
Dövlət Gömrük Komitəsi Qarabağ müharibəsi iştirakçılarının Biləsuvar Gömrük İdarəsinin "Qoşa Təpə" gömrük postunda qanunsuzluqlarla üzləşdiyi, İran İslam Respublikasından gətirdikləri malların gömrük sərhədindən buraxılmadığı iddia olunan məlumatlara münasibət bildirib.

Komitədən "Ölkə.Az"a bildirilib ki, torpaqlarımızın müdafiəsində iştirak edən, sağlamlığını itirən şəxslər hərtərəfli dövlət qayğısı ilə əhatə olunub. Lakin gömrük qanunvericiliyində bu qəbildən olan insanların həyata keçirdiyi idxal-ixrac əməliyyatları zamanı hər hansı güzəştlər nəzərdə tutulmayıb. Belə ki, fiziki şəxlərin güzəştli qaydada ölkəyə gətirə biləcəkləri malların miqdarı qanunvericilikdə müəyyən edilib və gömrük orqanlarının vəzifəsi qanunvericiliyin tələblərini yerinə yetirməkdən ibarətdir:

"Məlumatda bəhs edilən Qarabağ müharibəsi iştirakçılarının etirazına səbəb isə həmin şəxslərin qanunvericilikdə nəzərdə tutulandan artıq miqdarda malı gömrük sərhədindən keçirmək istəmələridir. "Qoşa Təpə" gömrük postunda həmin şəxslərlə qanunvericiliyin müvafiq tələbləri barədə izahat işləri aparılsa da, həmin şəxslər bununla razılaşmaq istəmir.

Bütün gömrük-sərhəd keçid məntəqələrində olduğu kimi, "Qoşa Təpə" gömrük postunda da vətəndaşlardan yalnız qanunvericiliyin tələblərinə riayət etmək tələb olunur.

Onu da qeyd edək ki, torpaqlarımızın müdafiəsində iştirak edən, sağlamlığını itirən şəxslər Dövlət Gömrük Komitəsinin tabeliyində olan bütün qurumlar və gömrük əməkdaşları tərəfindən yüksək ehtiramla qəbul edilir, onların problemləri dinlənilərək qanunvericiliyə uyğun şəkildə qısa zamanda həll edilir".

ŞƏRH YAZ
0
BAĞLA