Prezidentin əfv sərəncamı ilə bağlı xəbərdə adı hallandırılan "keçmiş MTN-çi" DANIŞDI

"Ölkə.Az"-ın redaksiyasına gələn A.Məmmədov bunları deyib:

"Mustafayeva Bənövşə Vahid qızının haqqımda səsləndirdiyi ittihamlarla bağlı bunu deyə bilərəm ki, onun dedikləri şər və böhtandan başqa bir şey deyil. Bənövşə Mustafayeva mətbuata verdiyi açıqlamada bildirib ki, oğlu Mahmudov Elvin mənə yüngül xəsarət yetirib. Sizə təqdim etdiyim fotolardan da aydın görünür ki, bədənimdə iyirmiyə yaxın tikiş var. Daxilə nüfuz edən dörd bıçaq zərbəsi necə yüngül xəsarət ola bilər? Mahmudov Elvin məni öldürməyə cəhd etmişdi və buna görə yeddi il müddətinə azadlıqdan məhrum edilib. Halbuki bu cinayət əməlinə görə Bakı Ağır Cinayətlər Məhkəməsinin qərarına (04.04.2012-ci ildən hesablanmaqla) yeddi il nisbətən yüngül cəza hesab edilir. Əgər kənar müdaxilələr olmasaydı, bu şəxs doqquz il müddətinə azadlıqdan məhrum edilməliydi. Bu şəxslər necə ədalətdən danışır ki, oğlu məni vurandan sonra qaçmışdı. Yalnız iki gündən sonra polislərin keçirdiyi əməliyyat-axtarış tədbirləri nəticəsində Mahmudov Elvini saxlamaq mümkün olmuşdu. Görün ki, bu necə insafsız, vicdandan uzaq biridirsə, KİV-i də özü kimi hesab edir. Düşünür ki, onun dediklərinə hər kəs inanacaq. Sizcə bu hadisə B.Mustafayevanın dediyi kimi olsaydı, onun oğlunu həbs edərdilərmi? Ümumilikdə iki il müddətində onlarla məhkəmə prosesindən sonra kəsilmiş cəza necə yanlış ola bilər?".

A.Məmmədov B.Mustafavayevanın oğlu həbs edildikdən sonra ona təzyiq etmələri barədə ittihamları da cavablandırıb:

"Bənövşə Mustafayeva bildirir ki, oğlu həbsə düşdükdən sonra mən və ailə üzvlərim onu hədələyib. Bu da kökündən yanlışdır. Atam keçmiş polis əməkdaşıdır, təqaüdçüdür. Biz Ədliyyə Nazirliyinin işinə necə müdaxilə edə bilərdik? Bu qadın dəfələrlə mətbuatda ailə üzvlərimi həyasızcasına təhqir edib. İstərdim bir həqiqəti də hər kəsin diqqətinə çatdırım. Hər halda bunu Bənövşə Mustafayevanı yaxından tanıyan şəxslər təsdiq edəcəklər. Bu adam cadugərliklə məşğuldur. Mənim özümə məhkəmədə dediyi "elədiyim cadudan quş da uça bilmir" sözləri buna sübutdur. Qanunla belə şeylər cinayət hesab edildiyi halda, Mustafayeva bu "özəlliyi" ilə hər kəsi hədələyir. 

Qeyd edim ki, bu, Elvin Mahmudovun törətdiyi ilk cinayət hadisəsi deyil. 09.08.2008-ci ildə Elvin Mahmudov Azərbaycan Respublikasının Cinayət Məcəlləsinin 132-ci maddəsiylə cinayət məsuliyyətinə cəlb edilib. Lakin sonradan "naməlum səbəblərdən" həmin cinayət işinə xitam verilib. Həmin vaxt zərərçəkmiş şəxs məcburən M.Elvinlə barışıb. Eyni hal mənim də başıma gələ bilərdi. Azğınlaşmış Mahmudov Elvin və onun ətrafı mənim onunla barışmağım üçün bir neçə dəfə cəhd göstərsələr də, imtina etdim. Onu da vurğulamaq istərdim ki, B.Mustafayeva məni keçmiş MTN-in əməkdaşı kimi təqdim edib. Halbuki mən həmin qurumda çalışmamışam".

A.Məmmədov həmçinin qeyd edib ki, B.Mustafayevanın oğlunun aprel döyüşlərində iştirak etməsi barədə dedikləri də yalandır:

"Deyilənə görə, onun iki oğlu var. Biri məni vuran Elvin Mahmudovdur, digər oğlu isə ümumiyyətlə hərbi xidmətdə olmayıb. Əgər olubsa, hərbi biletini təqdim etsin".

Ölkə.Az