\"Prezidentin Mehman Hüseynovla bağlı verdiyi tövsiyə və tapşırıqlar alqışlanmalıdır\"

Bu fikirləri "Ölkə.Az"a açıqlamasında Milli Məclisin deputatı, Qarabağ müharibəsi veteranı Elman Məmmədov bildirib. 

Deputat deyib ki, həyatda hər kəsin səhvi olur:

"Mehman Hüseynov cavan oğlandır. Yəqin ki, o öz fəaliyyətində müəyyən nöqsanlara və səhvlərə, qanun pozuntusuna yol verib. Təbii ki, belə olan halda qanunu kim pozursa, kimliyindən, siyasi baxışlarından, peşəsindən və əqidəsindən asılı olmayaraq hər kəs qanun qarşısında cavab verməlidir. 

Cənab Prezident Mehman Hüseynovun gəncliyini, anasının rəhmətə getməsini, atasının qoca olmasını və ölkə başçısına müraciət etməsini nəzərə alaraq hümanist addım atıb. Hesab edirəm ki, dövlət başçısının bu addımı çox alqışlanmalı hərəkətdir.  

Ümumiyyətlə, 1993-cü ildən başlayaraq ulu öndər Heydər Əliyevin dövründən indiyədək Azərbaycanda çoxsayda əfv fərmanları imzalanıb. Cənab Prezident İlham Əliyev onlarla əfv fərmanları verib. Müxtəlif cinayətlərdə ittiham olunan və həbsdə olan çoxsayda insanlar əfv olunaraq azadlığa buraxılıb. Yəni, bu cənab Prezidentimizin öz vətəndaşlarına olan diqqət və qayğısı, hümanist münasibətidir". 

E.Məmmədov qeyd edib ki, Mehman Hüseynov blogerlik fəaliyyətinə görə həbs edilməyib:

"Mehman Hüseynovun məmur villalarını çəkib-çəkməməsi barədə məsələyə ən doğru cavabı hüquq-mühafizə orqanları verər. İndi Mehman Hüseynovun bloger kimi nəyisə çəkməsi, nə səbəbə çəkməsi və bunu çəkməkdə məqəsdinin nə olması kimi məsələləri yalnız hüquq-mühafizə orqanları araşdırıb cavab verə bilərlər. Mən hesab edirəm ki, Azərbaycanda heç kəs jurnalist fəaliyyətinə görə həbs edilmir. Bu gün Azərbaycanda çoxsayda jurnalistlər var. Onların hansı birinə qadağa və ya təzyiq var? Jurnalistlər öz peşəsi ilə tam sərbəst şəkildə məşğul olurlar. Təbii ki, Azərbaycan qanunlarına hörmətlə yanaşmaqla, qanunun tələblərini pozmamaqla. Belə olandan sonra kim hansısa jurnalistə deyə bilər ki, sən nə üçün bunu yazırsan, bunu çəkirsən? Yəni, heç kəs qanun pozuntusuna yol verməməlidir".

Vasif Həsənli
Ölkə.Az