Dünya çempionatı: Rüstəm Orucov və Hidayət Heydərov 1/8 finala yüksəlib
"Ölkə.Az"ın məlumatına görə, 73 kq çəki dərəcəsində yer alan 21 yaşlı idmançı 1/16 final mərhələsində monteneqrolu Sedrik Bessiyə qalib gəlib. O, 2 dəqiqə 15 saniyəyə ipponla qələbə qazanıb. Heydərovun növbəti rəqibi tacikistanlı Behruzi Xojazoda olacaq.
Qeyd edək ki, 73 kq çəkidəki digər cüdoçu Rüstəm Orucov da 1/8 finala yüksəlib. Onun rəqibi monqolustanlı Tsoqtbaatar Tsend-Oçir olacaq.
***
73 kq çəki dərəcəsində güləşən cüdoçularımız qələbələrini davam etdirir.
Hidayət Heydərov Bakıda keçirilən dünya çempionatına qələbə ilə başlayıb. 73 kq çəki dərəcəsində yer alan 21 yaşlı idmançı ilk görüşündə iraqlı Sajjad Seheni ipponla məğlub edib. Onun 1/16 final mərhələsindəki rəqibi monteneqrolu Sedrik Bessi olacaq.
Rüstəm Orucov isə dünya çempionatında 1/8 finala yüksəlib. 73 kq çəki dərəcəsində yer alan idmançımız 1/16 final mərhələsində BƏƏ-dən olan Viktor Skvortsova qalib gəlib. O, ipponla qələbə qazanıb.
***
Azərbaycanın qadın cüdoçusu İçinxorlu Munxtsedev Bakıda davam edən dünya çempionatında mübarizəni erkən dayandırıb.
"Ölkə.Az"ın məlumatına görə, 57 kq çəki dərəcəsindəki idmançı 1/32 finala təsadüf edən ilk görüşündəcə almaniyalı Amelie Stolla ipponla uduzub.
Kişilər arasında 73 kq çəki dərəcəsində yer alan azərbaycanlı Avropa çempionı Rüstəm Orucov isə dünya çempionatına qələbə ilə başlayıb.
73 kq çəki dərəcəsində yer alan 27 yaşlı idmançı ilk görüşündə misirli Məhəmməd Mohyeldinə qalib gəlib. O, 1/2final görüşündə 1 dəqiqə 22 saniyəyə ipponla qələbə qazanıb. Avropa çempionunun 1/16 finalda rəqibi Viktor Mrovçinski (Polşa) - Viktor Skvortsov (BƏƏ) cütünün qalibi olacaq.
Bu çəkidəki azərbaycanlı digər cüdoçu Hidayət Heydərov isə 1/32 finalda iraqlı Sajjad Sehenlə üz-üzə gələcək.
