\"Qarabağ\" Avroliqada ilk qələbəsini qazandı
"Qarabağ" klubu UEFA Avropa Liqasının qrup mərhələsinin 4-cü turu çərçivəsində Ukrayna təmsilçisi “Vorskla” ilə qarşılaşıb.
"Ölkə.az"xəbər verir ki, Qurban Qurbanovun yetirmələri IV turda səfərdə Ukrayna "Vorskla”sını 1:0 hesabı ilə məğlub edib.
Aleksey Butovski adına stadionda keçirilən görüşdə hesab 13-cü dəqiqədə açılıb. Araz Abdullayev 11 metrlik cərimə zərbəsini dəqiq yerinə yetirərək komandasını hesabda önə çıxarıb. İlk hissədə qapılara əlavə qol vurulmayıb.
Görüşün ikinci hissəsi qarşılıqlı hücumlar şəraitində keçib. Əlavə olunan vaxtda da hesab dəyişməyib və təmsilçimiz rəqib meydanında qələbə qazanıb.
"Qarabağ" bu qələbə sayəsində qrupda ilk xallarını qazanıb və 3 xal ilə turnir cədvəlində sonuncu pillədə qərarlaşıb.
Xatırladaq ki, "Qarabağ" bundan əvvəl keçirdiyi 3 görüşdə qol vurmadan məğlub olmuşdu.
Ölkə.Az