Qarabağa köçən rusiyalı milyoner — “Bu gün eşitdim ki, Zakir Qaralov məni axtarır...”

Qarabağa köçən rusiyalı milyoner
11:52
19.03.2017
122
Siyasət
A
2015-ci ildə qəfildən Moskva ətrafındakı fermasını atıb ailəsi ilə birlikdə Azərbaycanın işğal altındakı ərazilərinə köç edən, (yaxud göndərilən) lakin daha sonra Bakının onun barəsində cinayət işi açmasından sonra Rusiyaya geri qayıdan ekstravaqant milyoner German Sterliqov yenə üzə çıxıb.

Ölkə.Az Virtualaz.org-a istinadən xəbər verir ki, Sterliqov bu gün özünün Facebook səhifəsində yazıb: “Bu gün mənə xəbər verdilər ki, Azərbaycanın Baş prokuroru yenidən Rusiya hakimiyyətindən barəmdə cinayət işi qaldırılmasını və tutulub Bakıya təhvil verilməyimi tələb edir. Bütün bunlar ona görədir ki, mən yüksəkdən və arqumentləşdirilmiş şəkildə Qarabağın erməni torpağı olduğunu demişəm. Və mənim müsahibəmə dünyanın hər yerindən milyonlarla adam baxıb. Ona görə də belə görünür ki, məni ələ keçirib hamının gözü qarşısında xırda hissələrə doğramaq istəyirlər”.

Sterliqov daha sonra yazır ki, Azərbaycan hakimiyyəti əmin ola bilər: Rusiya onu verməyəcək. “Çünki burada hakimiyyətdə Putindir, Lukaşenko deyil. Və Rusiya hansısa banan ölkəsi yox, yaxın gələcəyin monarxiyasıdır”.

German Sterliqov 2015-ci ildə qəfildən Dağlıq Qarabağa köçəndə bunu özü Azərbaycanın işğal altındakı ərazilərində “ekoloji təmiz məhsullar” istehsal etmək və onları Rusiyaya ixrac etmək, “kəndli təsərrüfatının inkişafı ilə məşğul olmaq” planları ilə izah etmişdi. Lakin Rusiya mətbuatı yazmışdı ki, ola bilsin Sterliqov BORN millətçi təşkilatının qətldə ittiham olunan üzvlərinin işində adının keçməsi səbəbindən Qarabağa qaçıb. Bir çoxları isə Sterliqovun ümumiyyətlə Rusiya xüsusi xidmət orqanları tərəfindən hansısa siyasi məqsədlərlə Qarabağa “ezam edildiyini” təxmin etmişdi.

Sterliqov Qarabağa qəfil gəldiyi kimi qəfil də getdi. Azərbaycan Baş prokurorluğu onun barəsində cinayət işi açdı və müstəntiqlər qalmaqallı biznesmeni dindirmək üçün Moskvaya ezam olundular. Lakin Rusiya Sterliqovun barəsində cinayət işi qaldırıb onu həbs etmədi və məsələ sanki unuduldu. İndi isə qalmaqallı biznesmen yenidən səhnəyə çıxıb və Qarabağın “erməni torpağı” olması haqda danışmağa başlayıb. Və Zakir Qaralov da yenidən onu yada salıb...

Ölkə.Az

ŞƏRH YAZ
0

Elmar Məmmədyarov Amerika Yəhudi Komitəsinin prezidenti ilə görüşüb

Elmar Məmmədyarov Amerika Yəhudi Komitəsinin prezidenti ilə görüşüb
21:45
25.02.2018
372
Siyasət
A
Xarici işlər naziri Elmar Məmmədyarov Amerika Yəhudi Komitəsinin prezidenti Con Şapironun başçılıq etdiyi nümayəndə heyəti ilə görüşüb.

"Ölkə.Az" xəbər verir ki, Xarici İşlər Nazirliyinin (XİN) mətbuat xidmətindən "Report"a verilən məlumata görə, Elmar Məmmədyarov Azərbaycanın müxtəlif mədəniyyətlərin və dinlərin nümayəndələrinin sülh və harmoniya şəraitində birgə yaşadığı bir məkan olduğunu bildirərək multikulturalizm və tolerantlığın Azərbaycan xalqının ən böyük mənəvi sərvəti olduğunu vurğulayıb.

Son illər Azərbaycanın dinlərarası və mədəniyyətlərarası dialoqun təşviqinə həsr edilmiş çoxsaylı qlobal tədbirlərə ev sahibliyi etdiyini söyləyən nazir Elmar Məmmədyarov bu xüsusda ölkəmizin təşəbbüsü ilə keçirilən Beynəlxalq Humanitar Forum və Mədəniyyətlərarası və Dinlərarası Dialoq Forumunun əhəmiyyətini qeyd edib.

Tərəflər bu kimi tədbirlərə ev sahibliyi edilməsini ölkəmizin dinlərarası və sivilzasiyalararası dialoqa verdiyi töfhənin təzahürü kimi qiymətləndiriblər.

Görüşdə Azərbaycanın İsrail ilə, eləcə də Amerika Yəhudi Konqresi və digər yəhudi təşkilatları ilə əməkdaşlıq əlaqələrinin inkişafından məmnunluq vurğulandı. Ölkəmizdə yəhudi icmasına göstərilən dəstək və qayğıya görə öz təşəkkürünü bildirən qonaqlar ölkəmizdəki tolerantlıq mühitini yüksək qiymətləndiriblər.

Görüşdə həmçinin, əməkdaşlıq əlaqələrinin inkişaf perspektivlərinə dair fikir mübadiləsi aparılıb.

Ölkə.Az

ŞƏRH YAZ
0

İlham Əliyev Amerika Yəhudi Komitəsinin prezidentini qəbul edib — YENİLƏNİB

İlham Əliyev Amerika Yəhudi Komitəsinin prezidentini qəbul edib
20:00
25.02.2018
491
Siyasət
A
Prezident İlham Əliyev Amerika Yəhudi Komitəsinin prezidenti Con Şapironun başçılıq etdiyi nümayəndə heyətini qəbul edib.

Amerika Yəhudi Komitəsinin prezidenti Con Şapiro Azərbaycanda yəhudi icmasının nümayəndələri üçün çox yaxşı şəraitin yaradıldığını qeyd edərək, bunun digər ölkələrə də nümunə olduğunu vurğulayıb.

Amerika Yəhudi Komitəsinin nümayəndə heyəti ilə görüşlərin ənənəvi xarakter daşıdığını bildirən Prezident İlham Əliyev bu görüşlərin səmərəli olduğunu qeyd edib. Dövlətimizin başçısı ölkəmizdə digər xalqların və icmaların nümayəndələri kimi yəhudi icmasının nümayəndələrinin də azad və firavanlıq şəraitində yaşaması üçün hər cür şəraitin təmin edildiyini bildirib.

Prezident İlham Əliyev qeyd etdi ki, yəhudi icmasının nümayəndələri Azərbaycan cəmiyyətinin fəal üzvləridirlər, öz ənənələrinə sadiqdirlər və ölkəmizin inkişafı, eləcə də Azərbaycan həqiqətlərinin dünyada yayılması işinə öz töhfələrini verirlər. Dövlətimizin başçısı bu gün Azərbaycanda multikulturalizmin və tolerantlığın hökm sürdüyünü və bu mühitin ölkəmizdə yaşayış norması olduğunu vurğulayıb. 

Söhbət zamanı Azərbaycan-ABŞ və Azərbaycan-İsrail əlaqələrinin inkişafından razılıq ifadə olunub.

***

Azərbaycan prezidenti İlham Əliyev Amerika Yəhudi Komitəsinin prezidenti Con Şapironun başçılıq etdiyi nümayəndə heyətini qəbul edib.

"Ölkə.Az"ın məlumatına görə, bu barədə prezidentin rəsmi saytı məlumat verib

Ölkə.Az

ŞƏRH YAZ
0
BAĞLA