\"Qarabağda müharibənin başlayıb-başlamaması Soçi görüşünün yekunlarından asılıdır\"

Bunu “Ölkə.Az”a açıqlamasında Cənubi Qafqaz Politoloqlar Klubunun rəhbəri İlqar Vəlizadə deyib.

Onun sözlərinə görə, Nikol Paşinyan son bəyanatı ilə Qarabağ münaqişəsinin həlli istiqamətində aparılan danışıqlar prosesini dalana dirədi.

“Paşinyanın bu bəyanatı Rusiyanın indiyədək münaqişənin həllində sərgilədiyi mövqeyi zərbə altına qoyur. Çünki danışıqlar prosesində Ermənistanın sərgilədiyi mövqedə Rusiyanın təsiri çoxdur. O baxımdan da Rusiya Paşinyanın “Qarabağ Ermənistanındır” deməsi bəyanatını dəstəkləyə bilməz. Belə olarsa, o zaman Ermənistanın işğalçı siyasətini dəstəkləmiş olar. Rusiya bu günə kimi  Ermənistanın işğal siyasətini açıq şəkildə dəstəkləməyib və bundan sonra da dəstəkləməyəcək. Bu mümkün deyil. Onda danışıqların aparılmasına ehtiyac da qalmaz. O zaman ATƏT MQ həmsədr ölkələri məcburiyyət qarşısında Azərbaycanın mövqeyini dəstəkləməli olacaqlar. Necə deyərlər, əslində Paşinyan bu fəaliyyəti ilə Rusiyanı və digər vasitəçi ölkələri pis vəziyyətdə qoyub. Ermənistan mövqeyindən geri çəkilməzsə, Rusiyanın Ermənistanı müdafiə etmək üçün arqumenti qalmayacaq. Onda da Moskva İrəvanın  əleyhinə çıxış edəcək”, - deyə politoloq deyib.

Politoloq hesab edir ki, bütün bu məsələlər Azərbaycan və Rusiya liderlərinin gələn həftə Soçi görüşündə müzakirə olunacaq.

“Odur ki, biz görüşün nəticələrini gözləməliyik. Bu məsələlərdə Rusiyanın mövqeyi  önəmlidir. Görək Rusiya nə deyir. Rusiya Ermənistanı yenə də tutduğu bu mövqedən geri çəkindirə bilsə,  o zaman danışıqlar prosesini çətin də olsa davam etdirmək mümkün olacaq. Yox, desə ki, mənlik deyil, bacarmıram, o zaman  vəziyyət tamamilə dəyişəcək. Bax, onda hərbi əməliyyatların başlanması istisna deyil”, - deyə o bildirib.

O, əlavə edib ki, bu gün Paşinyan Qırğızıstanda Rusiyanın baş naziri Dmitriy Medvedyevlə görüşür, bundan əlavə olaraq Rusiya Təhlükəsizlik Şurasının katibi Nikolay Patruşev İrəvandadır:

“Bütün bu görüşlərdə təbii ki, Paşinyanın son hərəkətləri, o cümlədən verdiyi bəyanat müzakirə olunacaq. Çünki Paşinyan hakimiyyətinin yürütdüyü siyasət Rusiyanı ciddi narahat edir.
Bundan əlavə olaraq oktyabrın əvvəlində Putinin İrəvana səfəri gözlənilir. Biz bütün bunları gözləyib, sonra hansısa konkret addım ata bilərik”.

Mürtəza
Ölkə.Az