“Qarabağı geri alırdım, AXC-Müsavat imkan vermədi” — Sürət Hüseynovdan TARİXİ MÜSAHİBƏ

“Qarabağı geri alırdım, AXC-Müsavat imkan vermədi”
14:00
02.08.2017
3742
Siyasət
A

Azərbaycanın sabiq Baş naziri, hərbi dövlət çevrilişində təqsirli bilinən keçmiş korpus komandiri Sürət Hüseynov “Ölkə.Az” xəbər portalına müsahibə verib.

Həmin müsahibəni təqdim edirik:

“Türkiyədə şirkətim də var”

– Sürət bəy hazırda nə işlə məşğul olursunuz? 

– Vallah, mənim işim biznes işidir. Maliyyə sahəsində fəaliyyət göstərirəm. Türkiyədə şirkətim də var. 

“Azərbaycanda heç bir biznesim yoxdur”

– Türkiyədən başqa ölkələrdə, o cümlədən Azərbaycanda da biznesiniz varmı? 

– Xeyr, Azərbaycanda heç bir biznesim yoxdur. Bununla bağlı kim nə deyirsə, yalandır. Ümumiyyətlə, Azərbaycanda mənim heç kimlə işim yoxdur. Türkiyədən başqa ölkələrdə də nə varsa, var da! 

Ümumiyyətlə, mənim həyat prinsipim belədir: Dəymə mənə, dəyməyim sənə. Bu prinsiplə də yaşayıram. 

“Adıma layiq olmayan işlərlə heç vaxt məşğul olmamışam”

– Bir ara xəbər yayılmışdı ki, siz xaricdən ölkəyə avtomobil gətirilməsi biznesi ilə də məşğul olursunuz. Bu doğrudurmu?

– Xeyr, yalan söhbətdir. Mən adıma layiq olmayan işlərlə heç vaxt məşğul olmamışam. Hətta, bilsəm də o sahədə yaxşı gəlir var, yenə də məşğul olmaram. Mənim öz istiqamətim var. Hazırda da başımı salıb öz işimlə məşğulam.  

“Azərbaycan hakimiyyəti ilə heç bir problemim yoxdur”

– Azərbaycana gedib-gəlirsiniz? 

– Bəli, işim olanda gedib-gəlirəm. Heç bir problem də yoxdur. Daha çox Türkiyədə oluram. Başqa ölkələrə də işlə əlaqədar gedib-gəlirəm. Hazırda da Türkiyədə deyiləm.

Azərbaycan hökuməti ilə də heç bir problemim yoxdur. Heç bir təzyiqlə də üzləşmirəm. Mənim bu hakimiyyətlə heç bir problemim yoxdur. Ümumiyyətlə, mən siyasətlə məşğul olmuram. Heç fikrim də yoxdur ki, siyasətlə məşğul olum. Mənim işim sırf biznes fəaliyyətidir.

“Qarabağı azad etmək üçün rusları girov götürmüşəm”

– Bu yaxınlarda sizin yeni çəkilmiş fotolarınız yayılıb. Bəzi siyasətçilər bunu sizin hakimiyyətə mesajınız kimi təqdim ediblər. Hətta, buna görə sizi “Rusiyanın adamı” olmaqda ittiham edənlər də var...

– Doğrusu, sosial şəbəkədə adıma profilin yaradılmasından sonra xəbər tutmuşam. Həmin səhifədə mənim yeni fotolarım da yerləşdirilib. İnanın ki, mənim Rusiya ilə də heç bir əlaqəm olmayıb. Əgər mən Rusiyanın adamıyamsa, yalançının Allah bəlasını versin. Mənim Rusiya ilə heç bir əlaqəm yoxdur. Vaxtilə mən Rusiyadan muzdlu döyüşçülər gətirib Qarabağda döyüşdürmüşəm, torpaqları azad etmişəm. Buna görə də onlara şəxsi cibimdən pul vermişəm. Vaxtilə Rusiyaya məxsus hərbi hissələrdən məndən savayı heç kim silah-sursat götürməyib. Əgər götürüblərsə, o zaman iqtidarda olan AXC-Müsavatdan bir nəfər durub adını desin! Ancaq mən bunu etmişəm, üstəlik Qarabağı azad etmək üçün rusları da girov götürmüşəm. Mən bunu məhkəməmdə də demişəm. Ancaq həmin o adamlar mənə qara yaxmaq üçün deyirlər ki, guya Sürət Hüseynov Rusiyanın adamıdır, hakimiyyət çevrilişinə hazırlaşır və sairə. Ağıllarına gələni danışırlar. Bunları bazara çıxartsan, heç 3 qəpiyə də satmaq olmaz. Əvvəla, bu adamlar gedib öz keçmişlərinə baxsınlar ki, kim olublar. Sonra başqasına çamur atsınlar. Özlərinə düzgün qiymət verə bilmirlər, mənim haqqımda “savadsız idi” və sairə fikirlər səsləndirirlər. Sual edirəm ki, siz savadlı olub nə etmisiniz? Bu millətə, dövlətə bağışlanmaz xəyanətlər etmisiniz. Vaxtilə Qarabağı ermənilərdən alırdım, nə qədər torpaqları azad etmişdim, AXC-Müsavat imkan vermədi, məni qısqandılar. İndi gedib alın görüm, ala bilirsinizmi? Vaxtilə 220 yaşayış məntəqəsini ermənilərdən azad etmişdim. Bütün bu əməliyyatlara mən komandanlıq etmişdim. Mənim kimi adamları əllərinin içində qoruyub saxlamaq əvəzinə, baltalamağı üstün tutdular. Məni qısqanmağa başladılar, adımı “vətən xaini” qoydular. Təsəvvür edin ki, Milli Qəhrəman birdən “vətən xaini” oldu. Xain sizsiniz, nəslinizdir. Ermənilərə qan udduran bir adam idim. Axı mən necə xain ola bilərdim? O vaxt mən də başqaları kimi cavanlıq edib kef çəkə bilərdim, pulum da, imkanım da var idi. Mənim peşəm də hərbçi deyil idi. Ancaq mən bunu Vətən və xalq üçün etdim. İnsanlar mənə inanıb komandan seçmişdi. Mən də onların etimadını doğrultmağa çalışırdım. Şəxsi cibimdən vəsait xərcləyirdim, dövlətdən kimsə mənə gətirib bir manat pul vermirdi. Bir nəfər var idi, 140 min rubl pul gətirmişdi. Mən bunu məhkəmədə də demişəm. O vaxtı Dağıstandan mənə “Qaz-31” avtomobili gətirmişdilər. Mən qəbul etmirdim, dedim ona deyin çıxıb gətsin, mənə maşın lazım deyil. Dedilər ki, əl çəkmir, getmək istəmir. Mən də dedim ki, gedib bir qəbz yazın, sonra götürün. Sonra elə başa düşərlər ki, Sürət Hüseynov burada oturub pul yığır. Başqa bir nəfər gətirib bir qəpik pul verməyib ki, müharibə üçün lazım olar. Məgər bu Vətən, dövlət tək mənim idi? Bəs o biri varlılar harada idilər? Həm kasıblara əl tuturdum, həm də müharibə edirdim. Müharibənin də xərcini özüm çəkirdim. O vaxt dövlətin də pulu yox idi. O zaman nə qədər desəm də, mənə bir təyyarə alıb göndərilmədi. Dedilər ki, dövlətin pulu yoxdur.   

“AXC-Müsavat, bəs siz nə etdiniz? Azad etdiyim torpaqları şərəfsiz ermənilərə satdınız!”

– Köməkçiniz olduğunu iddia edən Sinan Kaya adlı bir nəfər bir neçə jurnalistə sizin adınızdan Azərbaycan dövləti əleyhinə çağırış xarakterli müraciət göndərib. Həmin müraciəti alanlardan biri də mənəm. Doğrudanmı, həmin fikirlərin müəllifi sizsiniz? 

– Xeyr, o fikirlərin mənə heç bir bağlılığı yoxdur. Xəbərim olmadan mənim adımdan yazıb göndərilib. Hətta, mənim adımdan bir neçə jurnalistə məktub da göndərilib. Bütün bunlardan xəbərim olmayıb. Sonra mənə deyiləndə ki, belə hallar var, mən dərhal bunu araşdırdım. Məlum oldu ki, bütün bunları mənim adımdan Türkiyədə yaşayan və əslən azərbaycanlı olan Sinan adlı bir nəfər edib. Mən Sinanı uzun müddət tanıyıram, o mənə bəzi məsələlərdə kömək edib. Bütün bunlara görə də mən ona zəng edib acıqlandım. Dedim ki, bütün bunları nə üçün yazmısan? Sinan da əsaslandırdı ki, bəzi müxalifətdə olmuş adamlar məni təhqir etdiyi üçün onlara belə cavab yazıb. Sinan da onlara mənim adımdan yazıb ki, ay əclaflar, siz kimsiniz ki, Sürət Hüseynovu təhqir edirsiniz? Mən də ona dedim ki, bir də belə şeylər yazma, o səhifəni də bağla! 

Sinanın mənə dediyinə görə, bir neçə adam məni “şərəfsiz” adlandırıb. Sinan da əsəbiləşib onlara cavab verib və həmin məktub 4-5 adama səhvən göndərilib. 

Əslində, həmin Sinan mənə sürücülük də edib, sözümə baxan adam olub. İndi nəyə görə belə addım atıb, dəqiq bilmirəm. Hər halda ona acıqlanıb, buna görə etirazımı bildirmişəm. Yəqin ki, bir daha belə etməz.

Gic-gic gedib adıma səhifə açıb, yalandan fikirlərimi yayırdı. İstəsəm, özüm də səhifə açardım da! İstəməmişəmsə, deməli məsləhət bilməmişəm. Axı məndən xəbərsiz nə üçün adıma səhifə açmısan? Sinana dedim ki, kimsə nəsə yazıbsa, bunu mənim adımdan nə üçün yazırdın? Elə öz adından yazardın da! Bütün bunlarla bağlı ona xəbərdarlıq etmişəm.   

Digər tərəfdən də məni təhqir edən həmin alçaq adamlara sözüm odur ki, ay biqeyrətlər, mən müharibə edib, sənin namusunu qoruyanda, 220 yaşayış məntəqəsini azad edəndə, sən harada idin? Bunu dövlət etməmişdi, mən öz pulum və hörmətimlə etmişdim. AXC-Müsavat, bəs siz nə etdiniz? Mənim azad etdiyim torpaqları şərəfsiz ermənilərə satdınız! Sonra da mənə “vətən xaini” damğası vurmaq istədiniz. 

“Abbas Abbasovla heç bir əlaqəm yoxdur”

– Həmyerliniz Abbas Abbasovla münasibətləriniz var? 

– Xeyr, mənim onunla heç bir əlaqəm yoxdur. Kim nə iş görürsə, hər kəsin öz adına yazılır. Mənim nə Abbas Abbasovla, nə müxalifətlə, nə iqtidarla, heç bir siyasətçi ilə əlaqələrim yoxdur. Bu barədə kim nə deyirsə, tam yalandır. Mən tək başına öz işimi görürəm. Allah verən ömrü yaşayırıq. 

“Xalq kimi prezident seçəcəksə, Allah xeyrini versin”

– Gələn il Azərbaycanda növbəti prezident seçkilərinin keçirilməsi nəzərdə tutulur. Seçki ərəfəsi vəziyyəti necə qiymətləndirirsiniz? 

– Bu siyasi sual olduğu üçün ona cavab vermək istəmirəm. Ümumiyyətlə, bununla bağlı heç bir söz deyə bilmərəm. Çünki mən siyasətlə məşğul olmuram. Heç zaman da siyasi suallara cavab verməmişəm. Seçkilərdə də xalqımız kimi layiq bilib seçəcəksə, o da prezident olacaq. Xalqın adından nəsə danışa bilmərəm. Azərbaycan xalqı müdrik xalqdır və mən də onun bir üzvüyəm. Xalq kimi prezident seçəcəksə, Allah xeyrini versin. 

“Qarabağ Azərbaycanın ürəyidir”

– Qarabağla bağlı gedən prosesləri izləyirsiniz? 

– Əlbəttə ki, izləyirəm, xəbər alıram. Qarabağ bizim ən həssas məsələmizdir. Allahın köməyi ilə Qarabağı da işğaldan azad edəcəyik. Yəqin ki, yaxın zamanlarda biz bunun şahidi olacağıq. Mən xalqın bir üzvü kimi torpaqlarımız uğrunda döyüşməyə hazıram. Qarabağ bizimdir və bizim də olacaq. Buna heç kəsin şübhəsi olmasın. O torpaqları da heç bir iqtidar kiməsə verə bilməz. Həmin torpaqlar Azərbaycanındır. Qarabağ Azərbaycanın ürəyidir. İnsanın bədənindən ürəyi çıxsa necə yaşaya bilər? Gərək ki, bunu xalq tam dərk etsin. Əminəm ki, Qarabağı gec-tez azad edəcəyik. Bir gün Azərbaycan elə qüdrətli gücə sahib olacaq ki, işğalçı Ermənistana kömək edən dövlətlər də bu mövqeylərindən geri çəkilməyə məcbur olacaqlar. Mən bu vaxtın çox uzaqda olmadığına əminəm. 

Vasif Həsənli
Ölkə.Az

ŞƏRH YAZ
0

"Davos" İlham Əliyevin məqaləsini yayımladı

20:56
18.01.2020
639
Siyasət
A
Dünyanın çox nüfuzlu Davos İqtisadi Forumunun rəsmi saytında Azərbaycan Respublikasının Prezidenti İlham Əliyevin “Azərbaycanın vahid və dayanıqlı dünyada rolu” sərlövhəli məqaləsi yerləşdirilib.

"Ölkə.Az" məqaləni təqdim edir

Dünya İqtisadi Forumu siyasətçiləri, biznes adamlarını və ictimai təşkilatları bir araya gətirən və dünyada baş verən iqtisadi proseslərin, dünyanın iqtisadi gündəliyinin, habelə ictimai-siyasi proseslərin müzakirə olunduğu ən böyük platformalardan biridir. Forum dünyada gedən iqtisadi meyillər haqqında dolğun məlumat əldə etməyə geniş imkan verir.

Mən 2007-ci ildən başlayaraq artıq 14-cü dəfədir ki, Davosda bu Forumun İllik Toplantısında iştirak edəcəyəm. Dünya İqtisadi Forumu Azərbaycan reallıqlarını beynəlxalq ictimaiyyətə təqdim etmək üçün gözəl bir platforma olmaqla yanaşı, dünyada baş verən iqtisadi meyillər haqqında dolğun məlumat əldə etməyə imkan yaradır. Bu, bizə islahatları davamlı şəkildə aparmağa, ölkəyə xarici investisiyaları cəlb etməyə imkan verir.

Bu islahatlar nəticəsində 2007-ci ilin əvvəli ilə müqayisədə 2019-cu ildə ölkə iqtisadiyyatının həcmi 80 faiz, o cümlədən qeyri-neft sektorunun həcmi 2,1 dəfə, strateji valyuta ehtiyatları 13 dəfə artıb, ölkədə yoxsuluq səviyyəsi 4 dəfədən çox, işsizlik səviyyəsi isə əhəmiyyətli dərəcədə azalaraq 4,9 faizə çatıb. Bu dövrdə ölkəmiz iki dəfə “Doing Business 2009” və “Doing Business 2019” hesabatlarında dünyanın lider islahatçı ölkəsi olaraq tanınıb.

2007-ci ildən keçən dövr ərzində ölkəmizə 111 milyard ABŞ dollarından çox xarici investisiya cəlb olunub ki, bu da iqtisadiyyatın bütün sahələrində irəliləyişləri təmin edib. Nəticə etibarilə, Davos İqtisadi Forumunun açıqladığı “Qlobal Rəqabətlilik Hesabatı”nda Azərbaycanın mövqeyi 2006-2007-ci ildə 64-cü yerdə idisə, 2017-2018-ci ildə 137 ölkə arasında 35-ci yerə qədər yüksəlməklə, 2019-cu ildə “Əhalinin elektrik təchizatı səviyyəsi” üzrə dünyada 2-ci yer tutan ölkələr sırasında, “Hökumət tənzimləməsinin yükü” və “Əcnəbi işçilərin işə qəbulunun asanlığı” üzrə 3-cü yerdə, “Hökumətin dəyişməyə cavabdehliyi” üzrə 5-ci yerdə, “Biznesə başlama üçün tələb olunan günlərin sayı” üzrə 8-ci yerdə, “Hökumətin uzunmüddətli strategiyası” üzrə isə 10-cu yerdə qərarlaşıb.

Strateji nəqliyyat qovşağı

2019-cu ildə həmin hesabatda Azərbaycan 141 ölkə arasında “Dəmir yolu xidmətlərinin səmərəliliyi” üzrə 11-ci, “Hava yolları xidmətlərinin səmərəliliyi” üzrə 12-ci, “Dəniz limanları xidmətlərinin səmərəliliyi” üzrə 25-ci, “Yolların keyfiyyəti” üzrə 27-ci yerdə qərarlaşıb. Bəs bu necə oldu? Ölkənin nəqliyyat və yol infrastrukturunun əhəmiyyətli inkişafı xarici və yerli investisiyaların cəlb olunması ilə mümkün olub. Lakin nəqliyyat infrastrukturunun təkmilləşdirilməsi təkcə kapital hesabına olmayıb, burada əməkdaşlıq da önəmli rol oynayıb. Forum çərçivəsində əməkdaşlıq Azərbaycanı Şimal-Cənub, Şərq-Qərb nəqliyyat dəhlizlərinin önəmli aktoruna, beynəlxalq nəqliyyat qovşağına çevirib. Ölkəmizin təşəbbüsü ilə Azərbaycan, Gürcüstan və Türkiyənin dəmir yollarını birləşdirən Bakı-Tbilisi-Qars dəmir yolu layihəsi reallaşaraq 2017-ci ilin oktyabr ayından istifadəyə verilib. Bu, Asiya ilə Avropanı ən qısa yolla birləşdirən davamlı nəqliyyat dəhlizidir. Bundan başqa, Xəzərdə ən böyük liman olan yeni Bakı Beynəlxalq Dəniz Ticarət Limanı tikilərək 2018-ci ilin may ayında istifadəyə verilib.

Azərbaycan daim ekoloji tarazlığı qoruyub saxlamaqla, yəni, ətraf mühiti qorumaqla öz vətəndaşlarının sosial-iqtisadi inkişafına çalışır. Yerli və beynəlxalq daşımaların idarə olunmasının təkmilləşdirilməsi, o cümlədən təhlükəsizliyin yüksək səviyyədə təmin edilməsi məqsədilə “Ağıllı şəhər” konsepsiyasına start verilib. Bu konsepsiyanın məqsədi resursların istehlakı, israfı və ümumi xərcləri azaltmaqla enerji, nəqliyyat və kommunal xidmətlər kimi şəhər xidmətlərinin keyfiyyətini artırmaqdır.

Enerji sektorunda əsas iştirakçı

Azərbaycan enerji layihələrini də uğurla həyata keçirməyə davam edib. Avropaya qaz təchizatının şaxələndirilməsi istiqamətində Avropanın səylərinə dəstək verən Azərbaycan “Cənub Qaz Dəhlizi” layihəsinin reallaşmasına nail olub. Uzunluğu 3500 kilometr olan bu layihə Xəzər regionundan qaz təchizatını Avropa bazarlarına birləşdirməklə bütün regionun enerji xəritəsini dəyişəcək. Bu layihə Avropaya qazın nəqlinə alternativ kimi deyil, Avropaya qaz təchizatının şaxələndirilməsi məqsədilə həyata keçirilib. Ümumi kapital qoyuluşu 40 milyard ABŞ dolları olan bu layihə 4 hissədən ibarətdir.

“Şahdəniz-2”

Layihənin birinci hissəsi - “Şahdəniz-2” fazası üzrə bütün işlər tamamlanıb. Şahdəniz qazı 2500 metr hündürlüyə qalxaraq və dəniz dibindən 800 metr dərinliyə enərək 3500 kilometr məsafə boyunca nəql ediləcək.

Cənubi Qafqaz Boru Kəməri

Layihənin ikinci hissəsi - Cənubi Qafqaz Boru Kəməri artıq istismara verilib. Azərbaycanı Gürcüstandan keçərək Türkiyə ilə birləşdirən bu kəmərin uzunluğu 691 kilometr təşkil edir.

Trans-Anadolu Boru Kəməri

Layihənin üçüncü hissəsi - Trans-Anadolu Boru Kəməri (TANAP) Cənubi Qafqaz Boru Kəmərinin davamı olaraq Türkiyə Respublikasının qərb sərhədinə qədər davam etməklə, uzunluğu 1850 kilometr təşkil edir. Azərbaycan qazını Türkiyəyə və Avropaya çatdıran Trans-Anadolu Boru Kəməri Türkiyə-Gürcüstan sərhədində Cənubi Qafqaz Boru Kəmərinə, Türkiyə-Yunanıstan sərhədində isə Trans-Adriatik Boru Kəmərinə (TAP) birləşib.

Trans-Adriatik Boru Kəməri

Layihənin dördüncü hissəsi - Trans-Adriatik Boru Kəməridir (TAP). Boru kəmərinin uzunluğu 878 kilometrdir. Tikintisinin 90 faizdən çoxunun başa çatdığı bu layihə əsasında qaz kəməri Yunanıstandan Albaniyaya, oradan da Adriatik dənizinin altından keçməklə İtaliyaya çatacaq. 2019-cu il noyabrın 30-da TANAP-ın TAP ilə birləşən hissəsinin açılış mərasimi keçirilib.

2014-cü ildən başlayaraq dünya bazarlarında neftin qiymətinin kəskin aşağı düşməsi ölkəmizdə iqtisadiyyatın şaxələndirilməsi və qeyri-neft sektorunun inkişafı istiqamətində aparılan islahatları daha da sürətləndirib. 2016-ci ildə Milli iqtisadiyyat və iqtisadiyyatın əsas sektorları üzrə strateji yol xəritələri qəbul edilib, struktur və kadr islahatları həyata keçirilib, ölkədə biznes mühitinin yaxşılaşması üçün ciddi addımlar atılıb. Nəticədə, Azərbaycan “Doing Business 2020” hesabatı üzrə dünyada 191 ölkə arasında 34-cü yerdə qərarlaşmaqla, “Kreditin əlçatanlığı” üzrə 1-ci yeri, “Biznesə başlama” üzrə 9-cu yeri, “Müqavilələrin icrası” üzrə isə 28-ci yeri tutub.

Əlavə olaraq, Azərbaycanın Dünya İqtisadi Forumu ilə əməkdaşlığının davamı kimi 2019-cu ildə Azərbaycan ilə Dünya İqtisadi Forumunun Dördüncü Sənaye İnqilabı Mərkəzi arasında Əməkdaşlıq Razılaşması imzalanıb. Bu Razılaşma dünyada baş verən müsbət trendlərin və qabaqcıl təcrübənin Azərbaycanın sosial-iqtisadi həyatına transformasiyasına imkan yaradacaq.

Dünya İqtisadi Forumu ilə fəal və səmərəli əlaqələri yüksək qiymətləndirən Azərbaycan Respublikası bu platformada əməkdaşlığın inkişaf etdirilməsi və daha da irəli aparılması üçün göstərilən səyləri dəstəkləməkdə bundan sonra da davam edəcək.

Ölkə.Az

ŞƏRH YAZ
0

Bəxtiyar Əliyev seçicilərlə görüşdü — FOTOLAR

Bəxtiyar Əliyev seçicilərlə görüşdü
20:10
18.01.2020
841
Siyasət
A
Azərbaycan Respublikası Milli Məclisinə 118 saylı Ağdam seçki dairəsindən deputatlığa namizəd, Milli Məclisin deputatı, professor Bəxtiyar Əliyev seçicilərlə görüşlərini davam etdirir.

“Ölkə.Az” xəbər verir ki, Bəxtiyar Əliyev Bakı şəhəri, Yasamal rayonunda məskunlaşan ağdamlı seçicilərlə görüşüb.

Seçicilərin böyük fəallıq və maraq göstərdikləri görüş yenə də möhtəşəm alınıb. Bəxtiyar Əliyev əsası ulu öndər Heydər Əliyev tərəfindən qoyulan və Azərbaycan Prezidenti İlham Əliyevin uğurla davam etdirdiyi daxili və xarici siyasət, son illərdə Azərbaycanda reallaşdırılan layihələr, sosial-iqtsadi inkişaf, sosial rifahın yüksəldilməsi, qarşıya çıxan problemlərin həlli üçün görülən işlər barədə geniş danışıb.

B.Əliyev deyib ki, bir çox ölkələrdə iqtisadi böhranın dərinləşməsinə, münaqişələrin və müharibələrin alovlanmasına baxmayaraq Azərbaycan sürətlə davamlı inkişaf edir, sabitlik və insanların təhlükəsizliyi tam təmin edilib və insanların yaşayış səviyyəsi ildən-ilə yüksəlir.

O qeyd edib ki, Ermənistanın Azərbaycana hərbi təcavüzü nəticəsində doğma yurdlarından, ev-eşiyindən didərgin düşən məcburi köçkünlərin, o cümlədən ağdamlı köçkünlərin problemlərinin həlli daim dövlətin diqqət mərkəzində olub, Prezident İlham Əliyevin rəhbərliyi və tapşırıqları ilə bu sahədə böyük işlər görülüb, yeni qəsəbələr salınıb, məcburi köçkünlərin yaşayış və işsizlik  problemləri həll olunub.

B.Əliyev seçicilərə deputat kimi gördüyü işlərin hesabatını verib və platformasında nəzərdə tutulan məsələləri diqqətə çatdırıb. Deputatlığa namizəd bildirib ki, harada və hansı işlə məşğul olmasından asılı olmayaraq, daima doğma ağdamlılarla bir yerdə olacaq, onların hər bir problem və çətinliklərinə öz problemi kimi yanaşacaq.

Yüksək səviyyədə keçən görüş zamanı çıxış edən seçicilər deputatlığa namizəd B.Əliyevə dəstək ifadə ediblər. Seciçilər qeyd ediblər ki, B.Əliyev hər zaman onların etimadını doğruldub, həmişə seçiciləri ilə bir yerdə olub:

“Biz Bəxtiyar Əliyevin necə fəaliyyət göstərdiyndən və gördüyü işlərdən yaxşı xəbərdarıq. Bəxtiyar Əliyev seçicilərilə mütəmadi görüşlər keçirir, onların qayğılarına diqqətlə yanaşır. Onun Milli Məclisdəki və ictimai həyatdakı fəaliyyətini həm də mətbuat vasitəsilə izləyirik. Bəxtiyar müəllimi nümunəvi deputat hesab edirik. O, deputat olduğu dövrdə ağdamlıları başqalarının yanında utandıran, başı aşağı edən hərəkətə yol verməyib və biz əminik ki, bundan sonra da verməyəcək. Belə bir deputatımızın olması ilə fəxr edirik. Bizim başqa deputata ehtiyacımız yoxdur”.

Ağdamlılar bu il 9 fevraldakı seçkilərdə deputatlığa namizəd Bəxtiyar Əliyevə səs verəcəklərini bildiriblər.

Sonda B.Əliyev seçicilərin suallarını cavablandırıb, görüşə gəldiklərinə və ona dəstək verdiklərinə görə təşəkkürünü bildirib.

Qeyd edək ki, B.Əliyev bundan əvvəl Abşeron rayonunda məskunlaşmış ağdamlılarla görüşüb. Deputatlığa namizədin seçicilərlə görüşləri davam edir.

Ölkə.Az

ŞƏRH YAZ
0
BAĞLA