"Qarabağ"ın müdafiəçisi: "Oyunun dayanmağı bizim xeyrimizə oldu"

10:39
09.11.2018
948
İdman
A
"Çətin oyun olacağını əvvəlcədən bilirdik. Hava şəraiti amili də var idi. Meydan demək olar ki, donmuşdu. Pasla oynamaq bir az çətin idi. Amma bu çətinliklərə dözdük. Öz oyunumuzu oynamağa başladıq. Maraqlı oyun keçirdi. Meydanda mübarizə hiss olunurdu. Azarkeşlər də daha maraqlı olması üçün şou etdilər. Fikrimcə, bu, bir tərəfdən yaxşı olmasa da, digər tərəfdən bizim xoşumuza gəldi. Baxmayaraq ki, paltardəyişmə otağına getdik. Oyun bir qədər sonra yenidən başladı. Hər şey qaydasında idi. Çünki 1:0 öndəydik. Bizdə motivasiya da yaxşı idi. İstəyirdik ki, axıra kimi "Vorskla" ilə mübarizə aparaq. Təəssüf ki, Bakıdakı oyunda məğlub olmuşduq. Yaxşı ki, bu görüşdə qələbə qazana bildik. Təbii ki, sevinirik. Artıq komandada yaxşı əhval-ruhiyyə yaranıb. Növbəti matçlarda da daha yaxşı oynamalıyıq".

"Ölkə.Az"ın Report-a istinadən xəbər verir ki, bu fikirləri "Qarabağ"ın futbolçusu Maksim Medvedev Avropa Liqasının qrup mərhələsinin IV turunda səfərdə Ukrayna "Vorskla"sını 1:0 hesabı ilə məğlub etdikləri oyun barədə danışarkən deyib.

29 yaşlı müdafiəçi daha sonra jurnalistlərin suallarını cavablandırıb

- Oyunun dayanmağı motivasiya baxımından sizin xeyrinizə oldu?

- Gizlətməyəcəyəm. Əlbəttə ki, xeyrimizə oldu. Çünki rəqib 0:1 hesabı ilə geridəydi. İstəyirdilər ki, pressinq etsinlər və daha çox vuruşsunlar. Səhv eləmirəmsə, matç 65-ci dəqiqədən etibarən 8 dəqiqə dayandı. Komanda olaraq paltardəyişmə otağına getdik və bir az istirahət etdik. Yenidən meydana qayıtdıq. Demək olar ki, oyunun dayanmağı bizim xeyrimizə oldu.

- Oyunun dayandırılma ehtimalını əvvəlcədən düşünmüşdünüz?

- Sözün düzü, hadisəni birinci onların azarkeşləri başlatdı. Biz də bunu normal qarşılayırıq. Belə şeylərlə bizi təəccübləndirmək olmur. Oyunun davam edəcəyini fikirləşirdik. Sonra bizim azarkeşlər də bəzi vasitələrdən istifadə etdi. Ondan sonra isə oyun dayandı.

- Qrupdakı şanslarınızı necə qiymətləndirirsiniz?

- Komandanın aktivində üç xal var. Bu çox yaxşıdır. Çalışacağıq ki, digər iki çətin rəqibdən də xal alaq. "Vorskla"da bizim kimi mübarizə aparacaq. Biz "Arsenal" və "Sportinq" komandalarının səviyyəsini başa düşürük. Onlara qarşı oynamaq çox çətindir. "Sportinq"lə Bakıda qarşılaşacağıq. Həmin oyuna da çox yaxşı hazırlaşmalıyıq.

- Rəqib sizə qarşı qaydanı pozdu və penalti təyin olundu. Həmin an barədə nə deyə bilərsiniz?

- Birinci matçda bizim qapıçımız səhvə yol vermişdi. Bu oyunda isə rəqib səhv etdi. Adi futbol epizodu idi. Müdafiəçi qapıçıya pas verdi. Qapıçının topa müdaxilə etməsini gözlədim. Topa vurmaq istədim. O da mənə toxunmağa məcbur oldu. Əlbəttə ki, həmin an yerə yıxıldım. Həmin epizodda penalti qazanmağa gedirdim.

- Meydan sürüşkən idi. Amma rəqiblə müqayisədə siz buna görə problemlə üzləşmədiniz...

- Əslində, biz də çox problem yaşadıq. Qapıçı arada bizə pas verirdi. Amma topa uyğun gedə bilmirdi. Çünki top ya bərk gəlirdi, ya da istiqamətini dəyişirdi. Ot örtüyü donmuşdu, həm də meydanı sulamışdılar.

- Ola bilər ki, bunu bilərəkdən etsinlər?

- Buna inanmıram. Qayda var ki, meydanı sulamaq lazımdır. Ona görə ot örtüyü donmuşdu. Biz də əziyyət çəkirdik. Tək biz yox, rəqib də çətinliklərlə üzləşirdi. Top çox sürətli gedirdi, saxlamaq və pas vermək olmurdu.

Ölkə.Az

ŞƏRH YAZ
0

“Şah” superturnirin ilk final oyununda qələbə qazandı

“Şah” superturnirin ilk final oyununda qələbə qazandı
21:48
Bu gün
598
İdman
A
Riqada FIDE-nin və “World Chess”in birgə təşkil etdiyi “Grand Prix 2019” seriyasının final oyunlarına start verilib.

"Ölkə.Az" bildirir ki, Azərbaycan şahmatçısı Şəhriyar Məmmədyarov fransalı Maksim Vaşye-Laqravla qarşılaşıb.

Ağ fiqurlarla oynayan “Şah” ləqəbli qrossmeysterimiz ilk görüşünü qələbə ilə başa vurub.

Cavab oyunu sabah baş tutacaq.

Ölkə.Az

ŞƏRH YAZ
0

Bakı-2019: Güləşçilərimizdən iki qızıl, üç gümüş, bir bürünc medal

Bakı-2019: Güləşçilərimizdən iki qızıl, üç gümüş, bir bürünc medal
20:36
Bu gün
497
İdman
A
Azərbaycan güləşçiləri Avropa Gənclərinin Olimpiya Festivalı (EYOF) çərçivəsində aktivlərinə daha iki medal əlavə ediblər.

"Ölkə.Az" bildirir ki, 48 kq çəki dərəcəsində mübarizə aparan Mircavad Nəbiyev türkiyəli Şükrü Korpeyə qalib gəlib və bürünc medal uğrunda mübarizə aparmağa haqq qazanıb. Həlledici görüşdə isveçrəli Tomas Fişeri yolundan kənarlaşdıran idmançımız yekunda mükafatçılar sırasına düşməyi bacarıb.

60 kq çəkidə yarışan Sabir Cəfərov finalda Rusiya təmsilçisi Fyodr Baltuyevə yenilib və həmyerlimizin qazancı gümüş medal olub.

Qeyd edək ki, güləşçilərimiz EYOF-un ikinci günündə ümumilikdə iki qızıl, üç gümüş, bir bürünc medal qazanıb.

Ölkə.Az

ŞƏRH YAZ
0
BAĞLA