Qaradağda namus üstündə həbs yatan şəxsi öldürənlər saxlanıldı
“Ölkə.Az”-a Qaradağ RPİ-i 10-ci polis bölməsindən verilən məlumata görə, O.Abdullayevi öldürməkdə şübhəli bilinən 1984-cü il təvəllüdlü Həsən Məşədiyev və 1991-ci il təvəllüdlü Emin Həmidov rayon polis idarəsinin əməkdaşları tərəfindn saxlanılıb.
Xatırladaq ki, hadisə yanvar ayının 15-də gecə saatlarında Qaradağ rayonu, Lökbatan qəsəbəsində baş verib.
“Ölkə.Az”-ın məlumatına görə, 1992-ci il təvəllüdlü Abdullayev Osman Fazil oğlunun meyiti avtomagistralın kənarında tapılıb. Hadisə yerinə rayonun hüquq-mühafizə orqanlarının əməkdaşları gəlib və ilkin müayinələr aparılıb. Cinayət baş verən ərazidən “Makarov” tipli tapançanın 4 gilizi tapılıb.
Meyit müayinə olunmaq üçün Məhkəmə Tibbi Ekspertiza və Pataloji Anatomiya Birliyinin Qaradağ rayon şöbəsinə aparılıb və 26 yaşlı gəncin başından 1 güllə ilə qətlə yetirildiyi məlum olub.
Faktla bağlı Qaradağ rayon prokurorluğunda cinayət məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
İlkin araşdırmalar zamanı Osman Abdullayevin əvvəllər məhkumluq həyatı yaşadığı məlum olub.
Belə ki, Osman Abdullayev 2008-ci ilin fevral ayının 20-də, 16 yaşı olan zaman Gəncə şəhərində 1984-cü il təvəllüdlü Goranboy rayon sakini olan Tural adlı şəxsi qətlə yetirib və 5 il məhkumluq həyatı yaşayıb. Həmin vaxt Osman Turalı bacısına sataşdığına görə qətlə yetirib. 2013-cü ildə həbsdən azad olunan Osman heç bir işlə məşğul olmayıb.
İlkin ehtimallara görə, Yasamal rayonu Alatava qəsəbəsində yaşayan Osman hadisə baş verən gün Qaradağada "söhbət xırdalamağa" gedib.