"Qəbələ" klubu ardıcıl 4-cü mövsüm Avropa kuboklarına vəsiqə sahibi və Premyer Liqanın medalçısı olub

10:07
20.03.2017
79
İdman
A
Futbol üzrə Azərbaycan Premyer Liqasında daha bir medalçı və Avropa kuboklarına vəsiqə qazanan növbəti klubun adı müəyyənləşib.

"Ölkə.Az"ın məlumatına görə, bu, hazırda 2-ci pillədə gedən "Qəbələ"dir. Roman Qriqorçukun baş məşqçi olduğu komanda XXIII turda səfərdə AZAL-la 1:1 hesablı heç-heçə edərək, xallarını 47-yə çatdırıb. 4-cü pillədəki "Zirə" də "Qarabağ"la qarşılaşmadan 1 xalla ayrılıb - 0:0. Beləliklə, "Qəbələ"nin çempionatı avrokuboklara vəsiqə verən ilk "3-lük"də başa vuracağı dəqiqləşib. Başqa sözlə, "qırmızı-qaralar" ardıcıl 4-cü mövsüm medalçılar sırasında yerini təmin edib.

Amma əvvəlki 3 ildə "Qəbələ" yalnız bürünc medalla kifayətlənibsə, bu dəfə nəinki gümüş, hətta qızıl medal qazanma şanslarına malikdir. Lakin "qırmızı-qaralar"ın 2-ci yeri təmin etməsi XXV, çempionluğa yiyələnməsi isə XXVI turdan tez gerçəkləşməyəcək. Təbii ki, bunun üçün 3-cü pillədəki "İnter" növbəti 2, lider "Qarabağ" isə növbəti 3 turda uduzmalı, Roman Qriqorçukun komandası isə meydanı yalnız 3 xalla tərk etməlidir.

Qeyd edək ki, avrokuboklara ilk vəsiqəni XXII turda "Qarabağ" qazanıb. Reqlamentə əsasən, daha 2 vəsiqəni bürünc medalçı ilə Azərbaycan Kubokunun sahibi təmin etməlidir. Kuboka ilk "3-lük"dəki komandalardan biri sahib çıxsa, 4-cü vəsiqə 4-cü pillənin sahibinə qismət olacaq. Hazırda 3-cü pillədə 39 xalla "İnter", 4-cü pillədə isə 30 xalla "Zirə" qərarlaşıb.

Ölkə.Az

ŞƏRH YAZ
0

Məmmədyarov Vüqar Həşimovdan danışdı — “Mənə dedi ki, gəl heç-heçə oynayaq”

Məmmədyarov Vüqar Həşimovdan danışdı
21:46
19.04.2018
282
İdman
A
Vüqar Həşimovun xatirəsinə həsr olunan Shamkir Chess 2018 superturnirinin birinci turunda Şəhriyar Məmmədyarov (Azərbaycan) dünya çempionu Maqnus Karlsenlə (Norveç) heç-heçə oynayıb.

"Ölkə.Az" xəbər verir ki, partiyadan sonra Ş.Məmmədyarov mətbuat konfransında deyib: “Üstünlüyüm yox idi. Üç il əvvəl Şəmkir turnirində də ilk turda Karlsenlə oynamışdım. O vaxt qara fiqurlarla məğlub oldum. Həmin turnirdə çox pis çıxış etmişdim. Səhv etmirəmsə, ümumilikdə, 4 oyunu uduzmuşdum. Bu dəfə Maqnus hər zaman olduğu kimi, diqqətli idi. Belə rəqiblə görüşdə heç-heçə normal nəticədir”.

Mərhum şahmatçı Vüqar Həşimovla bağlı xatirələrini bölüşən Ş.Məmmədyarov deyib: “Mənim 9 yaşım var idi. Səkkiz yaşlı Vüqarla Şəkidə turnirdə qarşılaşırdıq. Mən şahmata təzə başlamışdım. Həşimov artıq yeniyetmələr arasında Avropa və dünya çempionatının mükafatçısı idi. Yəni, məni asanlıqla məğlub edə bilərdi. Oyundan əvvəl dedi ki, gəl heç-heçə oynayaq. Mən təəccübləndim. Axı bilərəkdən necə heç-heçə etmək olar? Vüqar dedi ki, hansı gedişi oynasam təkrarla. Oyuna başladıq, bütün gedişləri təkrarlayandan sonra gördüm ki, artıq uduzuram. Bir gedişi də təkrar etsəm məğlub oluram. Vüqara dedim ki, uduzuram. Həmin gedişdən sonra mat ola bilərdim. O, məni inandırdı. Dedi gedişi təkrarla. Elə də etdim Nəticədə, partiya heç-heçə başa çatdı. Onun haqqında saatlarla danışa bilərəm. Vüqar gözəl dost, güclü şahmatçı idi. O, həmişə qəlbimizdədir”.

Ölkə.Az

ŞƏRH YAZ
0

Bakıda Raquf Orucovun xatirəsinə həsr olunmuş cüdo turniri başladı — FOTOLAR

Bakıda Raquf Orucovun xatirəsinə həsr olunmuş cüdo turniri başladı
21:18
19.04.2018
392
İdman
A
Bakı İdman Sarayında aprel döyüşlərində qəhrəmancasına həlak olmuş polkovnik-leytenant Raquf Orucovun xatirəsinə həsr olunmuş "Raquf Orucov Kuboku" ikinci beynəlxalq cüdo turnirinin rəsmi açılış mərasimi keçirilib.

"Ölkə.Az" AzərTac-a istinadən xəbər verir ki, mərasimdə dövlət və hökumət qurumlarının nümayəndələri, Milli Məclisin deputatları, veteran hərbçilər, şəhid ailələrinin üzvləri, tanınmış idmançılar, ictimai təşkilatların təmsilçiləri iştirak ediblər.

Əvvəla Azərbaycanın dövlət himni səsləndirilib, şəhidlərin xatirəsi bir dəqiqəlik sükutla yad edilib.

Sonra ordumuzun zəfər salnaməsinə qəhrəmanlıq səhifəsi kimi yazılmış 2016-cı ilin aprel döyüşləri haqqında qısa videoçarx nümayiş olunub.

Milli Məclisin deputatı Qənirə Paşayeva, Azərbaycan Cüdo Federasiyasının nümayəndəsi, Əməkdar Bədən Tərbiyəsi və İdman Xadimi Sahib İsmayılov aprel döyüşlərinin əhəmiyyətindən, hərbçilərimizin şücaətindən danışıb, Raquf Orucovun və digər şəhidlərin qəhrəmanlığının gənc nəsil üçün örnək olduğunu bildiriblər. Şəhid polkovnik-leytenantın qardaşı Zabil Orucov turnirin təşkilatçısı “Azman” holdinqə və "Judo Club 2012" idman klubuna ailə üzvləri adından təşəkkür edib.

Turnirin açılış mərasimində yeniyetmə cüdoçular nümunəvi çıxışlar ediblər. İncəsənət ustaları vətənpərvər ruhda musiqi parçaları səsləndiriblər.

Aprel döyüşlərində həlak olmuş hərbçilərin portretləri həkk edilən köynəklər geymiş ASAN könülləri tamaşaçıların alqışları altında meydançaya çıxıblar.

Sonda turnirdə iştirak edən idmançılar tatami üzərinə dəvət olunublar.

Ölkə.Az

ŞƏRH YAZ
0
BAĞLA