"Qəbələ" klubu ardıcıl 4-cü mövsüm Avropa kuboklarına vəsiqə sahibi və Premyer Liqanın medalçısı olub

10:07
20.03.2017
47
İdman
A
Futbol üzrə Azərbaycan Premyer Liqasında daha bir medalçı və Avropa kuboklarına vəsiqə qazanan növbəti klubun adı müəyyənləşib.

"Ölkə.Az"ın məlumatına görə, bu, hazırda 2-ci pillədə gedən "Qəbələ"dir. Roman Qriqorçukun baş məşqçi olduğu komanda XXIII turda səfərdə AZAL-la 1:1 hesablı heç-heçə edərək, xallarını 47-yə çatdırıb. 4-cü pillədəki "Zirə" də "Qarabağ"la qarşılaşmadan 1 xalla ayrılıb - 0:0. Beləliklə, "Qəbələ"nin çempionatı avrokuboklara vəsiqə verən ilk "3-lük"də başa vuracağı dəqiqləşib. Başqa sözlə, "qırmızı-qaralar" ardıcıl 4-cü mövsüm medalçılar sırasında yerini təmin edib.

Amma əvvəlki 3 ildə "Qəbələ" yalnız bürünc medalla kifayətlənibsə, bu dəfə nəinki gümüş, hətta qızıl medal qazanma şanslarına malikdir. Lakin "qırmızı-qaralar"ın 2-ci yeri təmin etməsi XXV, çempionluğa yiyələnməsi isə XXVI turdan tez gerçəkləşməyəcək. Təbii ki, bunun üçün 3-cü pillədəki "İnter" növbəti 2, lider "Qarabağ" isə növbəti 3 turda uduzmalı, Roman Qriqorçukun komandası isə meydanı yalnız 3 xalla tərk etməlidir.

Qeyd edək ki, avrokuboklara ilk vəsiqəni XXII turda "Qarabağ" qazanıb. Reqlamentə əsasən, daha 2 vəsiqəni bürünc medalçı ilə Azərbaycan Kubokunun sahibi təmin etməlidir. Kuboka ilk "3-lük"dəki komandalardan biri sahib çıxsa, 4-cü vəsiqə 4-cü pillənin sahibinə qismət olacaq. Hazırda 3-cü pillədə 39 xalla "İnter", 4-cü pillədə isə 30 xalla "Zirə" qərarlaşıb.

Ölkə.Az

ŞƏRH YAZ
0

"Kəpəz" növbəti dəfə məğlub oldu

20:50
25.02.2018
234
İdman
A
Bu gün Azərbaycan Premyer Liqasının XVII turunun son qarşılaşması baş tutub.

"Ölkə.Az" xəbər verir ki, “Qarabağ" klubu doğma meydanda Gəncə “Kəpəz"ini qəbul edib. Azərsun Arenada keçirilən matçın birinci hissəsi 0-0 hesablı bərabərliklə tamamlanıb.

Meydan sahibləri qarşılaşmanın ikinci hissəsində hesabı açıblar. 85-ci dəqiqəsində Riçard Almeydanın vurduğu qol "Qarabağ"a 3 xal qazandırıb.

“Qarabağ” bununla da Türnir cədvəlindəki xallarının sayını 44-ə çatdıraraq liderliyini daha da möhkəmləndirib. “Kəpəz” isə 7 xalla sonuncudur.

Ölkə.Az

ŞƏRH YAZ
0

“Pxençan-2018” Qış Olimpiya Oyunlarının bağlanış mərasimi keçirilib — FOTO

“Pxençan-2018” Qış Olimpiya Oyunlarının bağlanış mərasimi keçirilib
17:55
25.02.2018
587
İdman
A
Fevralın 25-də “Pxençan-2018” Qış Olimpiya Oyunlarının təntənəli bağlanış mərasimi olub.

"Ölkə.Az" "Azərtac"a istinadən xəbər verir ki, 35 min azarkeş tutumu olan Pxençan Olimpiya Stadionunda keçirilən mərasimdə əvvəlcə Koreya Respublikanın bayrağı qaldırılıb və dövlət himni səsləndirilib.

Dünya musiqisi ilə Koreya milli musiqi alətlərinin vəhdətindən ibarət kompozisiyanın təqdimatından sonra “Pxençan-2018”də iştirak edən ölkələrin bayraqları stadiona gətirilib.

Sonra idmançıların paradı olub.

Mərasim xizəkçilik yarışları üzrə qadınlar arasında 30, kişilərin mübarizəsində isə 50 kilometr məsafəyə marafon yarışlarının qaliblərinin mükafatlandırılması ilə davam edib. Qalibləri medalları Beynəlxalq Olimpiya Komitəsinin (BOK) prezienti Tomas Bax və Beynəlxalq Xizəksürmə Federasiyasının prezidenti Qik Frank Kasper təqdim ediblər.

Könüllülərə təşəkkür edildikdən sonra musiqi proqramı təqdim olunub.

Ənənəyə uyğun olaraq Yunanıstanın bayrağı qaldırılıb və dövlət himni səsləndirilib.

Sonra Pxençan şəhərinin meri Jea Quk Sin Olimpiya bayrağını BOK-un prezidentinə təqdim edib. Tomas Bax bayrağı 2022-ci ildə Qış Olimpiya Oyunlarına ev sahibliyi edəcək Pekin şəhərinin meri Jininq Çenə təhvil verib.

“Pekin-2022” Qış Olimpiya Oyunları ilə bağlı təqdimat nümayiş edilib.

Olimpiya məşəli söndürüldükdən sonra xüsusi lazer effektləri ilə şou nümayiş olunub, DJ-lərin ifasında konsert proqramı təşkil olunub.

Bağlanış mərasiminə möhtəşəm atəşfəşanlıqla yekun vurulub.

Norveç millisi “Pxençan-2018” Qış Olimpiya Oyunlarının medal sıralamasında birinci olub. Bu ölkənin hesabında 14 qızıl, 14 gümüş və 11 bürünc medal var. Almaniya (14-10-7) ikinci, Kanada (11-8-10) üçüncü, ABŞ (9-8-6) dördüncü, Niderland (8-6-6) isə beşinci pillədə qərarlaşıb. Ümumilikdə 30 ölkənin idmançıları medalçılar arasında yer alıblar.

“Pxençan-2018” Olimpiya Oyunlarında 92 ölkədən 2952 idmançı iştirak edib. Bu, indiyə qədər Qış olimpiadalarında iştirakçıların sayına görə rekord göstəricidir. Oyunlara ən çox idmançı ilə qatılan ölkə Amerika Birləşmiş Ştatları (242 atlet) olub.

Oyunlarda Azərbaycan dağ xizəkçiliyi yarışlarında təmsil olunub.

Qış Olimpiadasında yarışlar 13 idman obyektində keçirilib. Atletlər 7 idman növündə 102 dəst medal uğrunda yarışıblar. Medalların birinin çəkisi 586 qramdan artıqdır. Bu, Qış Olimpiya Oyunları tarixində çəkisinə görə ən ağır mükafatdır.

XXIII Qış Olimpiya Oyunları 6 yeni ölkənin debütü ilə də əlamətdar olub. Ekvador, Eritreya, Kosovo, Malayziya, Nigeriya və Sinqapur tarixində ilk dəfə Qış Olimpiya Oyunlarında iştirak ediblər.

Ölkə.Az

ŞƏRH YAZ
0
BAĞLA