“Qızıl Məryəm”i öldürən qızı azadlığa çıxmaq istəyir

 “Ölkə.Az”ın məlumatına görə, cinayət məcəlləsinin qəsdən adam öldürmə maddəsinin bir neçə bəndi ilə məhkum olunan Hüseynova Günel Mehman qızı, onun xalası oğlu Eyvazov Nicat Sənan oğlu və Əsgərov Ceyhun Elxan oğlunun məhkəmə prosesinə hakim Hafiz Nəsibov sədrlik edir.  

Xatırladaq ki, 2016-cı il 1 noyabr tarixində Bakı Ağır Cinayətlər Məhkəməsinin hökmü ilə təqsirləndirilən Günel Hüseynova 18 il, Ceyhun Əsgərov 19 və Nicat Eyvazov isə 10 il müddətinə azadlıqdan məhrum edilib. Bakı Apellyasiya Məhkəməsi isə 1-ci instansiya məhkəməsinin hökmünü dəyişdirmədən saxlayıb. 

İttihama görə, 2016-cı il yanvarın 5-də, saat 09.00 radələrində 1965-ci il təvəllüdlü Məryəm Nemətzadənin yaşadığı mənzildə üzərində çoxsaylı kəsilmiş-deşilmiş xəsarətlərlə müşayiət olunan meyiti aşkar edilib. Daxil olmuş məlumat əsasında polis və prokurorluq əməkdaşları məhkəmə-tibb ekspertin iştirakı ilə hadisə yerinə və meyitə baxış keçirib. Əməliyyat-axtarış tədbirləri nəticəsində cinayətin mərhumun qızı, 1988-ci il təvəllüdlü G.Hüseynova, bacısı oğlu, 1998-ci il təvəllüdlü N.Eyvazov və 1997-ci il təvəllüdlü C.Əsgərov tərəfindən törədilməsində əsaslı şübhələr meydana çıxıb və onlar tutularaq istintaqa cəlb olunublar.

Təqsirləndirilən şəxslər Cinayət Məcəlləsinin 120.2.4, 120.2.11 (quldurluqla əlaqədar xüsusi amansızlıqla qəsdən adam öldürmə) və 181.3.3-cü (quldurluq, zərərçəkmiş şəxsin sağlamlığına ağır zərər vurulmaqla törədildikdə) maddələri ilə ittiham edilirlər. Qətlə yetirilən M.Nemətzadə "Qızıl Məryəm" ləqəbli iş adamı kimi tanınıb. O paytaxtda qızıl alveri ilə məşğul olub. "Moskva" univermağında onun mağazaları, paytaxtın ayrı-ayrı ünvanlarında isə bir sıra məşhur qızıl mağazaları olub.

Həbs edilən Günel Hüseynovanın atası Mehman Hüseynov isə Qarabağ qazisi olub. Qarabağ müharibəsi illərindən bəhs edən "Fəryad" filminin də qəhrəmanı məhz odur. Mehman Hüseynov Milli Ordumuzun Şıx batalyonun ilk könüllülərindən və batalyonda tağım komandiri olub.

1991-ci ilin dekabrında Kərkicahanda düşmənlə qeyri-bərabər döyüşdə sonacan müqavimət göstərmiş, sursatları bitmiş, əsgərlərimizin çoxu həlak olmuş, Mehman yaralı vəziyətdə əsir düşmüşdü.

Həmin illərdə 9 nəfər əsgəri ilə mühasirədə olduğu evdən 80 ermənini məhv edən, 2 ay əsirlik həyatından sonra xilas olub. Onun Məryəm xanımla evliliyindən Günel Hüseynova adlı qızları dünyaya gəlib. Anasının qətlində adı hallanan qız məhz həmin qızdır. Qarabağda çətin döyüş yolu keçmiş Mehman Hüseynov isə 2015- ci ilin mayın 12- də qəfildən ürəktutmasından vəfat edib.