“Qızlar Seminariyası”na yekun vuruldu
Bağlanış mərasimində iştirak edən Gənclər üçün Təhsil Mərkəzinin icraçı direktoru Fəxrəddin Həsənzadə bildirdi ki, maarifçilik tariximizdə, dünyəvi təhsilin inkişafında, Azərbaycan qadınının təhsil almasında Hacı Zeynalabdin Tağıyevin Qızlar gimnaziyasının böyük rolu olmuşdur. Bu məktəbi bitirən onlarla azərbaycanlı qız sonradan millətimizin tərəqqisində yaxından iştirak edərək Cümhuriyyət fəallarından olmuşlar. Belə ki, seminariyanın məzunlarından olan Rəhilə Hacıbababəyova, Şəhrəbanu Şabanova, Şəfiqə Əfəndizadə, Səkinə Axundzadə, Məryəm Qembitskaya, Naxçıvanda qızlar məktəbi açan Nazlı Tahirova, Bakıda "Qadın Xeyriyyə Cəmiyyəti"ni yaradan Liza Muxtarova vətəndaş cəmiyyətinin inkişafında qadınların iştirakının artırılmasında əvəzsiz xidmətləri olmuşdur. Məhz Gənclər üçün Təhsil Mərkəzi “Qızlar Seminariyası” proqramında bu tarixi ənənələri qorumağa səy göstərmişdir.
Ümumilikdə 2 ay davam edən “Qızlar Seminariyası” proqramında təhsilli qadın, qadınların ictimai həyatda və siyasətdə rolu, qadın sağlamlığı, qadınların milli geyim ənənələri, qadınların mədəniyyətimizin inkişafında rolu və s. mövzularda tanınmış sənət nümayəndələri və ictimai-siyasi xadimlərlə görüşlər təşkil olunmuşdur.
Mərasimin sonunda idarəetmə bacarıqlarına yiyələnməsi yönümündə təlimlərdə davamlı iştirak edən 50 xanım iştirakçı Mərkəz tərəfindən diplomla təltif edildi.