Qolundakı yara sağaldı, ürəyindəki qubardan dünyasını dəyişdi

Qolundakı yara sağaldı, ürəyindəki qubardan dünyasını dəyişdi
12:31
18.07.2019
2649
Mədəniyyət
A
Yanlış diaqnoz, ürək damarlarında donan qan və qəfil ölüm

Bu gün Telman Adıgözəlovun doğum günüdür.

Bu münasibətlə "Ölkə.Az" lent.az-a istinadən Ramilə Qurbanlının “33 pərdəli dram” kitabından onun haqqında yazısını təqdim edir.

”Anamla bacımı televiziya kanallarında atamın hansısa tamaşasını göstərəndə qoymuram baxsınlar. Dözə bilmirlər, ağlayırlar... Biz hələ də onun yoxluğuna alışmamışıq. Atamın yeri, o boşluq çox hiss olunur. Neyləsək də, o boşluq heç nəylə dolmaz. Bu itki bizi həmişə göynədəcək ” – oğlunun dediklərindən.

Uşaqlığı və…

Abasqulu kişinin ailəsi Balakəndə sovxozda işləyirdi. Ailədə iki oğlan uşağı böyüyürdü, ailə bütün o vaxtkı Sovet ailələri kimi sadə, xudmani dolanırdı. Elə bir dərdi-sərləri də yox idi, ailə sadəcə özlərini yerlərində hiss etmirdilər, elə bil qəribçilikdə yaşayırdılar.

Adıgözəlovlar ailəsi əslən Ordubaddan idilər. Tarixin gedişatı ilə o vaxt Ordubaddan bir çox ailələr Balakənə köçürülüb. Sovet rəhbərliyinin nə isə düşünülmüş siyasəti olub ki, Ordubaddan Balakənə insanları nəsillikcə köçürüb. Bu ailə də daxil olmaqla Balakəndə Ordubaddan olan ailələrin yaşadığı məhəlləyə “Ordubad” məhəlləsi də deyirmişlər.

Bir gün ailənin kiçik oğlu Telman möhkəm soyuqlayır, anası onu çimdirdikdən sonra həyətdə oynamağa qaçan uşaq soyuqlamadan müalicə alır və sağalır. Ancaq uşağın bir qolunda soyuqlamış limfalar şişir, irinləyir sağalmaq bilmirdi. Həkim deyir ki, Balakənin iqlimindən çıxmasa bu uşağın qolu qanqrena eləyəcək, kəsməli olacayıq.

Ailə uşağı da götürüb Bakıya köçməli olur, həm uşağın müalicəsini elətdirmək, həm də nə qədər zaman da keçmiş olsa sürgün həyatının alınlarına vurduğu möhürdən xilas olmaq üçün. Cənnət də olsa Abasqulu kişiyə Balakənə məcburən köçürüldükləri fikri rahatlıq vermirdi.

O vaxt dördüncü sinifdə oxuyan Telman və qardaşı Vaqif üçün Balakən doğma idi, çünki bu dünyaya gözlərini orda açmışdılar, orda dostları, doğma məktəbləri vardı.

Bakıya da tez öyrəşdi, tezliklə özünə yeni dostlar tapdı, yarası da sağalıb keçdi.

Bir gün məktəb yoldaşları ilə dərsdən qaçıb kinoya getmişdilər. O vaxt çox sevilən bir hind filminə baxmaq üçün dərsdən qaçmağa dəyərdi, həm də bunun romantikası yalnız kinoya baxmaq deyildi, dərsdən qaçıb kinoya getməyin öz romantikası vardı.

Kinodan çıxanda bir nəfər Telmana yaxınlaşıb ona televiziyaya gəlməyi təklif etdi. Yuxarı siniflərdə oxusa da hələ peşə seçimi barədə müəyyən bir fikrə gələ bilməyən Telman təklifi qəbul etdi. Dövlət televiziyasında çalışan rejissor Nazim Zeynalov onu “Evrika” verilişində fantastik səhnələrə çəkir. “Yasəmən” televiziya teatrında iştirak edir. Yeddinci sinifdə oxuyanda isə Adil İsgəndərovun kinoaktyor kurslarına yazılır. Beləliklə, Azərbaycan incəsənətinə yeni bir imza gəlir – Telman Adıgözəlov.

İlk obrazları

1975-ci ildə indiki Mədəniyyət və İncəsənət Universitetinin dram və kino aktyorluğu fakültəsini bitirəndə Telman Adıgözəlovu tamaşaçı artıq televiziyadan tanıyırdı. Aktyor beş il Tədris Teatrında, televiziya tamaşalarında, səhnəcəiklərdə işlədi. 1980 –ci ildə Milli Dram Teatrında işə başlayan aktyor ömrünün sonuna qədər bu teatrda çalışdı. Bir-birindən maraqlı, müxtəlif xarakterli obrazlar oynadı. C. Məmmədquluzadənin “Dəli yığıncağı" əsərinin eyniadlı tamaşasında Zəncirvuran obrazından tutmuş , İ.Əfəndiyev "Xurşidbanu Natəvan" Daşdəmir, "Mahnı dağlarda qaldı" Rəhman, Şekspir "Maqbet" Flins, M.İbrahimov "Közərən ocaqlar" Xanəhməd, H.Cavid "İblis" şeypurçu, S.Vurğun "Vaqif" təlxək, S.Rəhman "Nişanlı qız" çeşməkli kişi, E.Baxış "Qədr gecəsi" oyunbaz, Elçin "Ah Paris…Paris!.." də Əhməd, "Mənim sevimli dəlim" də professor, R.Novruz "Hələ "sevirəm" deməmişdilər"də qumarbaz obrazlarına qədər.
Eyni vaxtda dövlət televiziyasında hazırlanmış "Yaşıl eynəkli adam", "Ordan-burdan", "Qonşular", "Azərbaycanfilm" kinostudiyasında istehsal olunmuş "Nəsimi", "Üzü küləyə", "Xatirələr sahili" kimi filmlərdə bəzən xarakterik, bəzən epizodik rollar oynadı. Kinoda bəxti o qədər də gətirməmişdi, bütün öz nəslinin aktyorları kimi onun çəkilə biləcəyi illərdə kinematoqrafiya tənəzzül dövrünü yaşadı. “Nəsimi” filmində yalnız bir epizoda çəkilib, həmin epizod isə artıq Telman Adıgözəlov siması televiziyadan və teatrdan tanış, sevimli olduğu üçün gözə çarpır.
Şəxsiyyət

Telman Adıgözəlov siması olan, şəxsiyyətli insan olub. Nə heç vaxt öz işi üçün kiminsə qapısını döyər, ev üçün, pul üçün, yaxud fəxri ad, rol xətrinə minnətçi düşməzdi. El-obada isə hamının xeyir-şərinə yarayırdı. Kim zəng eləsə ki, mənimlə filan işin arxasınca gedək, sənin xətrinə o iş həll olunar, gedərdi. Bilirdilər ki, Telman Adıgözəlovun adı gələn yerdə ən sərt məmur da yumşalacaq. O tay Azərbaycandan uzaq qohumları gəlib Bakıda işlərini Telman Adıgözəlovun köməkliyi ilə yola verirdilər. Heç kimə imtina etməzdi, təmənnasız onlara yardımçı olardı. Balakənlilər, hətta başqa millətlərin nümayəndələr də onun üstünə kömək üçün müraciətlə gələrdilər.

Evdə bütün problemləri təkbaşına həll edərdi. Ailəsi – xanımı və iki övladı atanın hansı çətinliklər bahasına onların firavan yaşayışını təmin etdiyini bilməzdilər. Pis yaşamırdılar, amma xalq artistlərinin hamısı onlardan daha yaxşı yaşayırdı. Niyə hamısına ev verilir, amma Telman Adıgözəlovun mikrorayonda dar mənzili genişləndirilmir ki genişləndirilmir.

Hamıya prezident mükafatı, təqaüd verilir. Siyahıdan Telman Adıgözəlovun adı çıxarılıb, ötən il aldığı pul bu il artıq ona verilməyəcək, deməli ailə maddi cəhətdən geri gedəcək. Üstəgəl oğlu ordudan qayıdıb, nişanlıdır, amma işləmir. Qızı Tibb Universitetini bitirib işə düzəltmək lazımdır.

Teatrda isə son vaxtlar “Hələ sevirəm deməmişdilər” tamaşasındakı rolundan sonra bir rol oynamayıb. Yaş gedir işləmək, yaratmaq istəyir, rol oynamalıdır, bu gün olmasa sabah gec ola bilər, amma yoxdur. Teatr təmirə dayandığından “Mir” telekanalında onlar üçün ayrılan bir zalda məşqlər edirlər, tamaşalar isə hələ oynanılmır. Yeni rolu olmadığından Telman Adıgözəlov elə vaxt olur ki, heç ora getmir.

Bütün bu fikirlər ona rahatlıq vermir. Yaxşı ki, arada “Müsyo Jordan Dərviş Məstəli şah” tamaşası bir qığılcım kimi parladı onun yaradıcı ruhunda. Müsyo Jordan rolu ürəyincə idi, həvəslə işlədi üstündə.

Bir gün ürək bütün bu yükə tab gətirməyib – bəsdir məni yüklədin dedi, küt, dözülməz ağrı verdi kürək nahiyəsində.

Telman Adıgözəlov birinci dəfə bu ağrıya elə də böyük əhəmiyyət vermədi. Həm də bu qədər problem içində elə bir həkimim, iynə-dərmanım çatmır –deyə ürəyinə cavab verdi.

İkinci dəfə ağrı elə dözülməz oldu ki, fikir verməyə bilmədi. Getdi həkimə, ürəyinin kardioqramasını çıxartdılar, dedilər ki, ürəyində heç nə yoxdur, həkim – görünür, duzlaşmadır deyə ona qarşı müalicə yazdı. Müalicəni keçdi, heç ağlına da gəlmədi ki, bəzən ürəyin çəkdiyini heç bir peşəkar həkim, kardioqrama belə göstərə bilmir.

Müalicə getdi, amma aktyor özündə yaxşılığa doğru bir dəyişiklik hiss etmədi, əksinə.

Yaxın dostu Ramiz Novruz danışır ki, heç bir şikayəti yox idi, amma görürdüm ki, tez-tez təngənəfəs olur, durduğu yerdə tərləyir: “Deyirdim yəqin müalicə duzlaşmanı əridir ona görə belə olur. Sonuncu dəfə də işə gələndə, girdi içəri aktyorlar bufetdə nərd oynayırdılar, zarafat elədi ki, “ey, nardovşiki, xarakteri nardovşiki ” . Qaydayın bir filmində işlədilən bu ifadə ilə zarafat elədi, sonra ikimiz oturub mənim məhz onun üçün, qəhrəmanının onu düşünüb yazdığım pyesi müzakirə elədik. Oxumuşdu çox xoşuna gəlmişdi, istəyirdik tamaşanı hazırlayaq. Hər axşam da zəngləşib bu barədə danışırdıq. Həmin axşam da zəng eləmişdi mənə, danışmışdıq”.

Ağrı

Həmin axşam – Telman Adıgözəlov bir qohum toyuna getmişdi, amma nədənsə tez qayıtmışdı toydan. Çəkilib otağa pyesi oxuyurdu. Daxildə narahatlığı vardı, həm səhhətində, həm də özünə yer tapa bilmirdi, mənən də rahat deyildi, amma bunların heç birini kimsəyə açıb deməmişdi, xoşlamırdı içini kimlərəsə açmağa.

Ömür boyu bir kiməsə öz dərdlərini yükləməyi, bir də ailəsini üzə çıxardıb onlar barəsində danışmağı xoşlamazdı. Nə vaxt zəng edərdin evdə dəstəyi də özü qaldırardı. Şikayət də etməzdi nə səhhətindən, nə daxili problemlərindən, amma simasından hiss olunurdu ki, içində təlatüm var bu adamın, bu adamın haqqı tapdanır. Çünki heç vaxt kiminsə çaldığı havaya oynamazdı, öz musiqisi, sümüyünün öz ritmi vardı, süni havalara girməzdi.

Oğlu Tural danışır: “O gün atamın adi günlərindən biriydi. Həm də həmin gün səhhətində də bir nasazlıq olmamışdı, ağrımamışdı. Mən məşqdən qayıtmışdım. Yorulmuşdum deyə bir az tez yatmışdım. Bir az keçəndən sonra atam yanıma gəldi. Soruşdu, “özünü necə hiss edirsən? Xəstə zad deyilsən ki?” Dedim, “yox, yaxşıyam. Sadəcə bir az yorulmuşam. Vəssalam, bu, bizim son danışığımız oldu. Bir də gecə saat 4-ə işləmiş anamın səsinə oyandım. Uca səslə atamı çağırırdı. Tez onların otağa getdim, gördüm atam xırıldayır, elə bil boğazında nəsə qalıb. Biz əvvəl elə bildik ki, yuxuda təngnəfəs olub. Başladıq silkələməyə ki, yuxudan ayılsın. Amma gördük yox, düşündüyümüz deyil. Artıq rəngi də qaralmışdı. Demə, can verirmiş, biz də bilmirik. Çünki indiyə qədər elə şey görməmişdik. Təcili yardıma zəng vurduq. Nə olduğunu aydınlaşdıra bilmədilər. Təzədən ikinci təcili yardım briqadasını çağırdıq. 10 dəqiqədən sonra ikincisi gəldi. Təzyiqini ölçdülər, sonra da elektroşok elədilər. Amma xeyri olmadı. İki-üç dəfə elədilər, sonra dedilər keçinib. Elə xırıldayaraq canını tapşırdı. Nə bilim, yəqin bu da belə qədərdir ”.

2010-cu ildə aprelin 15-i gecə teatr sənətimiz Telman Adıgözəlovu, yüzlərlə, minlərlə tamaşaçı öz sevimli aktyorunu, ailəsi arxa –dayağını, əzizini itirdi.

Sən demə ürək damarlarında tromplaşma gedirmiş, onu kardioqrama göstərmir, daha müasir aparatlar göstərir, vaxtında düzgün diaqnoz qoyulsaydı yüngülvari müalicəsi varmış, həkim isə ostroxondrozdan müalicə edib onu. Allah hmımızı pis həkimdən qorusun.

Vida

Xalq artistinin ailəsi nə qədər gözlədi dinlənməli instansiyaların səsi çıxmadı. Yalnız yas mərasiminə gələn Mədəniyyət və Turizm nazirliyi bəyan etdi ki, Fəxri Xiyabanda yer olmadığı üçün aktyoru ailəsi harda istəsə orda dəfn edə bilər. Çalışdığı səhnədən isə vida mərasimi olmayacaq, çünki teatrda təmir gedir.

Telman Adıgözəlovu onu sevənlər yaşadığı mənzildən son evinə - Fatmayi məzarlığına qədər yola saldılar. Yol boyu ardıcıl insan axını gedirdi onun tabutunun arxasınca. Hamı onu 57 yaşında itirməyin təəssüfünü yaşayırdı o gün də, ondan sonrakı günlər, illər ərzində də, indi də.

Yas mərasimlərinin xərcini dövlət özü çəkdi, məzarının üstü də dövlət vəsaiti ilə götürüldü.

Qızının sənədlərini özü sağlığında nazirliyə təqdim etmişdi. Qızı çağırıb işə qoydular. Oğlu da indi Fövqəladə Hallar Nazirliyinin sıralarında işləyir.

Ötən ilin martında qızı ailə həyatı qurdu, artıq bir övladı dünyaya gəlib. Telman Adıgözəlov həyatdan köçəndə oğlu nişanlı idi, ötən ilin oktyabrında oğlu evlənib. Xanımı Büllur xanım da həmişəki kimi bağçada uşaqların tərbiyəsi ilə məşğuldur, qəlbinin yarasına onlarla məlhəm qoyur.

Həyat davam edir. Bircə o, yoxdur həyatda, xatirələrdə obrazları, maraqlı jestləri və bir də şəxsiyyəti ilə qalıb – Telman Adıgözəlov. Allah ruhuna rahatlıq versin.

”Anamla bacımı televiziya kanallarında atamın hansısa tamaşasını göstərəndə qoymuram baxsınlar. Dözə bilmirlər, ağlayırlar... Biz hələ də onun yoxluğuna alışmamışıq. Atamın yeri, o boşluq çox hiss olunur. Neyləsək də, o boşluq heç nəylə dolmaz. Bu itki bizi həmişə göynədəcək ” – oğlunun dediklərindən.

ŞƏRH YAZ
0

Fuad Poladovun ailəsində — ÖZƏL GÜN

Fuad Poladovun ailəsində
16:10
24.08.2019
5448
Mədəniyyət
A
Mərhum Xalq artisti Fuad Poladovun nəvəsi dünyaya gəlib.

"Ölkə.Az" xəbər verir ki, bu barədə sənətçinin oğlu Ağarəhim Poladov məlumat verib.

O, ikinci dəfə dayı olduğunu bildirib.

Qeyd edək ki, dünyaya gələn övlad mərhumun qızı Fəridənin övladıdır. Onun bundan başqa, Suad adlı oğlu da var.

ŞƏRH YAZ
0

Məşqdə ölən xalq artistlərimiz — ARAŞDIRMA

Məşqdə ölən xalq artistlərimiz
14:07
23.08.2019
20589
Mədəniyyət
A
Filmlərin çəkilişlərindən, tamaşaların məşq proseslərindən çox yazırıq. O proseslər zamanı elə hadisələr də olur ki, bəzən sevimli aktyorlarımızın həyatı bahasına başa gəlir. Bəzən isə xırda zədələrlə yadda qalır. Kimisi səhnədəcə dünyasını dəyişir, kimisi həmin zədədən, amma bir müddət sonra. Şükür ki, ucuz qurtulanlar da yox deyil.

Məsələn, dünya şöhrətli cazmenimiz Vaqif Mustafazadə Özbəkistanda verdiyi konsert bitəndən sonra tamaşaçılara baş əyib səhnə arxasına keçib və yıxılıb. Yaxınlaşıb görüblər ki, onu pərdə arxasında konsertinin bitməyini gözləyən ölüm mələyi aparıb.

Xalq artisti Məlik Dadaşov Tədris Teatrında məşq zamanı tələbəsinə edəcəyi hərəkəti göstərərkən yıxılıb və gicgahı stolun küncünə zərblə dəyib. Orda da dünyasını dəyişib.

Aktyor Ağadadaş Qurbanov “Arşın mal alan”ın çəkilişləri vaxtı (Soltan bəy roluna) qızı aktrisa Gülşən Qurbanova ilə birgə qaldığı mehmanxananın eyvanında əyləşib çay içirmişlər. Eyvan qəflətən uçur. Ağadadaş Qurbanov həlak olur, balaca Gülşən isə zədə ilə xilas olur.

Eyni hadisə “Dan ulduzu” instrumental qrupunun rəhbəri Gülarə Əliyevanın da başına gəlib. O da eyvanın uçması nəticəsində həlak olur.

Xalq artisti Ələsgər Ələkbərov “Böyük dayaq” filminin çəkilişləri vaxtı başından aldığı zədədən dünyasını dəyişir. Yadınızdadırsa, filmdə Rüstəm kişinin başından çomaqla vurub onu Kürə atırlar. Zərbə planlaşdırıldığının əksinə güclü alınır və aktyor bu zərbənin fəsadlarından uzun müddət müalicə olunsa da, sonda o dərdlə dünyasını dəyişir.

“Axırıncı aşırım” filminin çəkilişlərində isə Əbdül Mahmudova dəyən şillənin barıtı çox olduğundan aktyorun dodağında çapıq qalır.

Xalq artisti Əliağa Ağayev də “Görüş” filmində çaya yıxılarkən başı körpünün suyun altında olan dirəyinə dəyir. Aktyorun sonuncu çəkildiyi “Evlənmək istəyirəm” filmi olsa da, “Görüş”dən aldığı zədə ilə dünyasını dəyişir. “Evlənmək istəyirəm” filminə isə 39-40 dərərcə temperaturda ona vurulan ağrıkəsici iynələrin hesabına çəkilə bilib. Filmin çəkilişləri başa çatanda aktyor artıq dünyasını dəyişmişdi.

Xalq artisti Nəsibə Zeynalovanın sonuncu çəkildi “Məhəllə” filmi olub. Filmin səsləndirmə prosesində Nəsibə xanım artıq rəhmətə getmişdi və filmdə onun səsinin əvəzinə Qorxmaz Əlilinin səsi yazılıb.

Aktrisa Nəcibə Məlikova Hindistanda qastrolda olarkən arxadan çiyninə tullanan meymundan diksinib şəkər xəstəliyinə düçar olub və çox keçmədən rəhmətə gedib.

Bəşir Səfəroğlu da filmə çəkilərkən çoban itlərindən necə qorxubsa, şəkər xəstəliyinə tutulub.

Xalq artisti Firəngiz Şərifova Gənc Tamaşaçılar Teatrında “Mahmud və Məryəm” tamaşasının məşqlərində gözünə düşən projektorun sayəsində yıxılıb və hər iki qolları, qıçı sınıb. O vaxtdan aktrisa səhnəyə çıxa bilmir, müalicədədir.

Həmin teatrın aktyoru Elşən Rüstəmovun Milli Dram Teatrında “Hamlet” tamaşasının məşqlərində Fuad Poladovun polad qılıncı ehtiyatsız fırlaması nəticəsində qıçı sınmışdı.

Xalq artisti Həsən Məmmədov “Dədə Qorqud” filminin çəkilişi vaxtı ilandan qorxub xəstələnib. Bir müddət sonra çəkilişləri davam etdirən Tofiq Tağızadə Həsən Məmmədovun daha çəkilişə gələ bilməyəcəyinin düşünüb təzə “Dədə Qorqud” üçün sınaq çəkilişləri elan edib. Bu vaxt aktyor çəkiliş meydanına gəlib.

“Nəsimi” filmində onun çarmıxa çəkilməsi səhnəsi səhrada bir gün ərzində çəkilib. Çəkilişi yarımçıq qoya bilməyən Rasim Balayevin susuzluqdan halı xarablaşıb.

Xalq artisti Həsənağa Turabov “Bəyin oğurlanması” filminin çəkilişləri vaxtı ilk dəfə hipertonik kriz keçirib. Sonralar ürəyindən əməliyyat olunsa da, aktyor həmin xəstəliklə dünyasını dəyişir. Onu da deyim ki, həmin ilk ürək krizi zamanı Şamaxıda çəkilişə baxmağa gələn yerli camaatdan kimsə aktyora zirinc mürəbbəsi yedirdib və bu mürəbbə ona filmin çəkilişlərini sona çatdırmağa köməkçi olub.

“Əhməd hardadır?” filmindən Əhməd kimi tanıdığımız, əslində sirk ustası Səyavuş Şəfiyev Moskvada qastrol vaxtı mehmanxananın otağında ürək tutmasından dünyasını dəyişir, onu üç gün sonra qapını sındırmaqla tapırlar. (lent.az)

ŞƏRH YAZ
0
BAĞLA