Qucağa tullanan Renka, əlli ilin Nanəsi, Elzanı çapmaq

"Ölkə.Az" milli.az-a istinadən jurnalist İntiqam Valehoğlunun müəllif layihəsi olan "Həftəbecər"i (140-cı say) təqdim edir.

Bilirəm, ilk sualınız bu olacaq ki, ötən həftə niyə yazı olmadı? Nə yalan deyim, Qulpqoyan dayını aparmışdım Batumiyə. Dedi, eşitmişəm oraların gəzməli yerləri var. Mən də ağsaqqalın sözündən keçə bilmədim. Qayıtmağımız da bir az yubandığına görə "Həftəbecər" olmadı. Hələ yaxşı ki kişinin özünü gətirib çıxara bildim. İki dəfə itirdim. Birində gedib Batuminin bulvarından, o birində isə acarların diskotekasından tapıb gətirmişəm. Keçəkmi mövzulara?

Şou-biznesdə təzə mövzu var. Əslində, çoxdanın söhbətidir. Amma aranjimanı yeniləyiblər. Rəqqasə Renka Ağamuradova ilə prodüser Təranə Səmədovanın münasibətləri düzəlmək bilmir. Təranə deyib ki, onu qucaqdan qucağa atılan vaxtından tanıyıram. Söhbətə bax ha. Bu yeni vaxtölçmə metodudur. Məsələn, soruşursan ki, filan müğənnini nə vaxtdan tanıyırsan? Cavab verir ki, onu sponsorun bağında gecələyən vaxtından tanıyıram. Yaxud filankəsi sponsoru arvadının döydüyü vaxtdan tanıyıram. Yeri gəlmişkən, maraqlıdır, Renka uzunluğa və hündürlüyə təxminən nə qədər tullana bilir?

Sosial şəbəkədə bir video gördüm. Deməli, Şəbnəm Tovuzlu hansısa məkandan övladıyla çıxır. Görür ki, kamera var. Kameranı görən kimi uşağını gizlətməyə çalışır. Operatorla müxbir də dirəşirlər ki, yox ey, çəkəcəyik. Axırda Şəbnəm deyir ki, bəs sizin əlinizdən çölə çıxmayaq? Yeri gəlmişkən, bəzi bölgələrdə "çölə çıxmaq" başqa məna verir. Ona görə videoya bir də baxdım ki, görüm Şəbnəm o sözü hansı mənada deyir. Bilməyənlər üçün deyim ki, bəzi bölgələrdə qəbizlikdən əziyyət çəkən adamlar haqqında deyirlər-filankəs çölə çıxa bilmir.

Samiraldo piylərini çıxartdırıb və fotosunu paylaşıb. Çıxarılan hər nədirsə, başqa şeydir, amma piy deyil. Samiraldoda piy nə gəzir?

Aparıcı Nanə özünə 100 minlik "Porşe" alıb. Sağlığına qismət. Bir nəfər də yazıb ki, görəsən ATV-də aparıcılar nə qədər maaş alır? Əşşi, nəyinə lazımdır axı?! Kanallarımızın elə əməkdaşları var ki, ayda bir "çeşka"nın pulunu qazanırlar. Əlli ilin Nanəsidir, deyirsiz bir "Porşe"si də olmasın. Qulpqoyan dayı deyir, pensiyamı yığım, mən də özümə ondan alacam.

Elza Seyidcahanın bədii yaradıcılığı tam sürətlə davam edir. Yeni şeirinin adı belədir: "Çapın məni". "Tikim sizin ağzınızı" şeirindən sonra tam yerinə düşən şeirdir. Aralarında məntiqi bağlılıq da var.

Səhərdən Qulpqoyan dayı soruşur ki, ASAN xidmətdə yaşımı necə azalda bilərəm? Bir gözü də kompüterdə xəbərləri oxuyur. İndi başa düşmüşəm nə məsələymiş. Aygün Kazımova deyib ki, məndən kiçik sevgilim olub. Ağsaqqal da beləcə əldən getdi.