"Rabitə işi": Təqsirləndirilən şəxslər son sözlə çıxış edir
Bu gün Bakı Ağır Cinayətlər Məhkəməsində mənimsəmədə və vəzifə səlahiyyətlərindən sui-istifadə etməkdə təqsirləndirilən keçmiş Rabitə və Yüksək Texnologiyalar Nazirliyinin (RYTN) sabiq Aparat rəhbəri Vidadi Zeynalov, "Aztelekom" MMC-nin sabiq baş direktoru Məhəmməd Məmmədov, "Bakı Telefon Rabitəsi" İstehsalat Birliyinin sabiq rəhbəri Beytulla Hüseynov, "Bakı Telefon Rabitəsi" İstehsalat Birliyinin baş mühasibi Anar Mustafayev, “AzİnTelekom” MMC-nin sabiq baş direktoru Cəlil Cəfərov, “Azərpoçt” MMC-nin sabiq baş direktoru Qəmbər Bəybalayev, “Optik Rabitə, Tikinti və Quraşdırma” MMC-nin keçmiş baş mühasibi Səhrab Hümbətov, həmçinin Emin Məmmədov, “Bakı Rabitə Təmir Tikinti” və “Təmir Təchizat Servis” MMC-lərinin direktoru Bayram Vəliyev, "Optik Qurğular" İdarəsinin rəisi Namazəli Məmmədov və “Aztelekom” MMC-nin baş mühasibi Oktay Rüstəmovun cinayət işi üzrə məhkəmənin növbəti iclası keçirilib.
"Ölkə.Az"ın Report-a istinadən məlumatına görə, hakim Əfqan Hacıyevin sədrliyi ilə keçirilən prosesdə BTRİB-in baş mühasibi A.Mustafayev son sözlə çıxış edib.
O, çıxışında günahsız olduğunu bildirib: "Maliyyə Nazirliyinin mütəxəssisləri səhv edib. Elə bir qurum varmı ki, xeyirsiz işləsin? Onların hesablamalarına görə biz borca işləmişik. Nazirliyin mütəxəssisləri məhkəməyə dəvət edilsin, onlara sual verək. Kotirovka oldu. Namazalı ilə Emin müəllim gəldi, heç biri işləmədi. Onlar dedilər ki, sərf eləmir. Lakin istintaq da yazır ki, 51 faiz şişirdilmə var. Belə çıxır ki, şirkət mənfəət götürmədi. Büdcədən bizə bu işlərin görülməsi üçün 7 milyon manat vəsaət ayrıldı. Maliyyə Nazirliyi bizim 16 əmsalla qiymətləndirdilər. Sonra 17 əmsalla. Bir qədər keçəndən sonra dedilər ki, "gəlin 21 əmsalla aparın". Bu ittihamı Maliyyə Nazirliyinə vermək lazım idi. Maliyyə Nazirliyinin yazdığı yalandır. Vəkillərim bəraət istədi, amam razı olmadım. Bu o demək deyil ki, mən bəraət istəmirəm. Əlbəttə, alacam".
O, son nitqi zamanı təqsirləndirilən rəhbər şəxslərdən halallıq istəyib: "Məhkəmənin ədalətinə güvənirəm. Xahiş edirəm ədalətli qərar çıxarasız".
Daha sonra N.Məmmədov son sözlə çıxış edib. O, çıxışında verilən ittihamların heç birini qəbul etmədiyini deyib: "Mən özəl bir təşkilatın rəhbəriyəm. Rabitəçi kimi deyirəm ki, mən nüfuzumu və rabitəçiliyimi qoruyub saxlamışam. Əli Abbasovdan da onu kirlətməyini gözləməzdim. Mən qazandıqlarımı tək yesəydim, başımın altında nağd şəkildə pulum və işləyən obyektlərim olardı. Xahiş edirəm dediklərimi ciddiyə alasınız və ədalətli qərar verəsiniz. Mən Rabitə Nazirliyinin indiki rəhbərliyinə öz dərin minnətdarlığımı bildirmək istəyirəm. Sağ olsunlar ki, Əli Abbasovun yerə vurduğu rabitəçi kimi nüfuzumu onlar çox yüksəklərə qaldırdılar. Onların mənə verdiyi məktubu siz nəzərə almasanız da, o məktub mənim üçün azadlıq deməkdir".
Hazırda məhkəmə iclası davam etdirilir.
