Ramin Musayevin \"killerləri\" və zavallı \"Neftçi\"
İntiqam VALEHOĞLU
Futbol üzrə Azərbaycan çempionatının ikinci dövrəsi başladı. Özü də necə? Əslində, şou çoxdan başlamışdı, amma bu dəfə dekorlar, dizayn, hətta işıq effektləri də daha səviyyəli şəkildəydi.
Artıq üç turdur ki, şou tam gücüylə davam edir, hakimlər isə həmişəki kimi iş başındadırlar. Ramin Musayev-Xəqani Məmmədov tandemi də fəaliyyətlərini davam etdirirlər. İntəhası, anlaşılmayan məqam cütlüyün qorxu içərisində olmalarıdır. Elə bu yazıda da həmin qorxunun səbəbləri barədə danışmağa çalışacağıq.
Qış fasiləsindən əvvəl əksər klublar maliyyə sıxıntısı çəkdiklərini iddia etsələr də, edilən transferlər göstərdi ki, bu, sadəcə görüntüdür. Şübhəsiz ki, "transfer pəncərəsi"ndə ən çox pul xərcləyən klub "Neftçi" idi. Transfer edilən səkkiz oyunçu üçün flaqmanın büdcəsindən təxminən 2 milyon manat xərcləndi.
Təsəvvür edirsinizmi, klub rəhbərliyi (əslində, bu rəhbərliyin adı var, fəaliyyəti görünmür) maddi durumun zəif olduğunu iddia edir, amma klub transferlərə 2 milyon vəsait xərcləyir.
Hər halda "Neftçi"nin yubiley ili olduğunu nəzərə alsaq, iki milyonu xərcləməyə dəyər.
Ancaq maraqlıdır ki, "Neftçi"nin qeyri-rəsmi sahibi Elxan Məmmədov bu məsələdə bir az gec ayılıb. Çünki flaqman tarixində heç vaxt belə biabırçı nəticə göstərməyib, turnir cədvəlinin zirzəmisində olmayıb. Bir tərəfdən də komandanın keçmiş rəhbərləri necə deyərlər, indiki rəhbərliyi mətbuatda yıxıb-sürüyür. Ramin Musayev-Xəqani Məmmədov tandeminin hakimlərin əliylə komandanın başına açdığı oyunları da nəzərə alanda, flaqmanın nə dərəcədə acınacaqlı durumda olduğunu görməmək olmur.
Tandemin belə qayğılanmasının səbəbi futboldan anlayışı olan şəxslər üçün elə də qaranlıq deyil. "Neftçi" güclənir, Məmmədovun dəstəyi ilə dördüncü yerlə avrokuboklara vəsiqə qazana bilər və çox böyük ehtimalla bu belə olacaq.
Məhz bu səbəbdən də hakim "killerlərini" işə salaraq duruma nəzarəti əldən buraxmamağa çalışırlar. Elə ilk iki turda "Qarabağ" və "Qəbələ" ilə oyunlarda "Neftçi"nin 5 xalı əlindən alındı, rəqiblərinə isə dörd xal bağışlanıldı.
"Qarabağ" və "Zirə" indidən özlərini Avropada hiss edə bilərlər. Çünki arxalarında Musayev Ramin Namaz oğlu kimi sözündə və əməlində düz insan durub.
Eyni zamanda Ramil Diniyev, Orxan Məmmədov, Rəhim Həsənov kimi ""Qarabağ" aşiqlərini" də unutmaq olmaz.
Ortada müəmmalı bir məsələ qalır ki, onu da aydınlaşdırmağa çalışacağıq. "Qəbələ"yə belə hörmətin sirri nədir? Axı "Qəbələ" futbol təsərrüfatına rəhbərlik edən şəxslərin sevmədiyi, Qriqorçuk isə kabusuna çevrilmiş mütəxəssisdir.
"Qəbələ" qarşıdakı növbəti iki tura "hazırlaşdırılır". "Zirə"-"Qəbələ" və "Qəbələ"-"Qarabağ" oyunlarında bu kluba qarşı ediləcək haqsızlıqlara göz yumulsun deyə, indidən qəbələlilərin ayağına yağ sürtürlər, könlünü alırlar.
İşdir, birdən o oyunlardan sonra "Qəbələ"dən kimsə desə ki, bizə qarşı haqsızlıq edildi. Cavab indidən hazırdır-"Neftçi" və AZAL ilə oyunlarda sizə 6 xalı bizim göstərişimizlə hədiyyə ediblər.
Bax belə. Görək şounun növbəti turunda daha nələr baş verəcək.
Ölkə.Az
