Rasim Balayev İbrahimbəyovun Kinematoqrafçılar İttifaqından birdəfəlik imtina etdi

Bu barədə “Ölkə.Az”a görkəmli aktyor Rasim Balayev özü məlumat verib. 

Azərbaycan Kinematoqrafçılar İttifaqından hələ 2013-cü ildə istefa verdiyini vurğulayan R.Balayev indiyədək sənədlərinin sözügedən təşkilatda saxlandıldığını söyləyib:

“Rüstəm İbrahimbəyovun çəkdiyi xoşagəlməz həmin filmə baxdıqdan sonra dərhal Azərbaycan Kinematoqrafçılar İttifaqı ilə əlaqə saxlayıb sənədlərimin hamısının geri göndərilməsini tələb etdim. Ümumiyyətlə, Azərbaycan Kinematoqrafçılar İttifaqından ilk istefa verən mən olmuşam. 2013-cü ildə bu təşkilatın adı siyasi məsələlərdə hallananda gördüm ki, burada mənim yerim yoxdur. Mən yaradıcı insanam və həmin təşkilat da yaradıcı fəaliyyət aparmaq üçün təsis edilib. Çox təəssüf ki, Azərbaycan Kinematoqrafçılar İttifaqının adı siyasi məsələlərdə hallanır”. 

Xalq artisti ssenari müəllifi Milli Şuranın fəxri sədri Rüstəm İbrahimbəyov olan “Qafqaz triosu” adlı filmlə bağlı da kəskin etirazını bildirib:

“Ümumiyyətlə, bədii baxımdan bu film çox zəifdir. Bu filmi biz çox müzakirə etdiyimiz üçün onun reytinqini qaldırırıq. Bəlkə də bizim tənqidlərimiz Rüstəm İbrahimbəyova təsir etmir. Həmin filmdə azərbaycanlılar vəhşi, ermənilər isə bacarıqlı və cəsarətli göstərilir. Adam filmə baxandan sonra Rüstəm İbrahimbəyova nifrət edir. Ona sual olunur, axı nə üçün sən bunu etdin? Bu yaşında millətinin hörmətini qazanmaq əvəzinə onun nifrətini qazanmağa can atırsan. Bu çox səhv strategiyadır. Guya biz bilmirik ki, ermənilər kimdir, erməni xisləti nədir? Ermənilər hər zaman qorxaq millət olublar. İndi rusun əli ilə gəlib Qarabağı işğal ediblər. Bunu hamı yaxşı bilir. Rüstəm İbrahimbəyov, sən xalqını və özünü aşağılamaqla nə demək istəyirsən? Demək istəyirsən ki, azərbaycanlılar qorxaqdır? Mənim ona veriləsi xeyli suallarım var. Çox heyf ki, onunla heç bir əlaqəm yoxdur. Amma onunla üzbəüz gəlsəm, etirazımı bildirəcəm”.

Rasim Balayev bildirib ki, Azərbaycan dövləti Rüstəm İbrahimbəyov üçün bütün imkanları yaratmışdı:

“Allah Ulu Öndər Heydər Əliyevə qəni-qəni rəhmət etsin. Yaxşı yadımdadır ki, Heydər Əliyevin qəbuluna düşə bilməyən nazirlər gəlib Rüstəm İbrahimbəyovdan xahiş edirdilər ki, Ulu Öndərə desin, onları qəbul etsin. Sonra Rüstəm İbrahimbəyov da zəng edib xahiş edirdi. Yəni, Rüstəm İbrahimbəyovun dövlətin və prezidentin yanında belə böyük hörməti var idi, o bu sahədə avtoritet idi. Bu cür münasibətləri, hörməti məhv etdi”.

Vasif Həsənli
Ölkə.Az