"Rasim Balayevin qonorarı çəkiliş meydançasında ödənilib" — MÜSAHİBƏ

16:28
12.04.2017
412
Mədəniyyət
A
Bu yaxınlarda qala gecəsi keçirilən "Sara" filminin quruluşçu rejissoru Elvin Əhmədov "Ölkə.Az"-ın suallarını cavablandırıb.

- Elvin bəy, filmə olan münasibətdən razısınızmı?

- Aprelin 6-da filmin təqdimatı oldu, qala gecəsindəki münasibətdən də çox razı qaldım. İlk alqışlardan başa düşdüm ki, iş uğurlu alınıb. Bundan yaxşı nə ola bilər? Həmin alqışların özü bizdə motivasiya yaratdı ki, millət filmə maraqla gedəcək. Çünki hər şey qaladan başlayır. Film mütəxəssislərinin-rejissorların, ssenaristlərin də film haqqında müsbət fikirləri var idi.

- Filmdə peşəkar aktyorlar üstünlük təşkil edir. Onları yola gətirmək, anlaşmaq çətin olmadı ki?

- Demək olar ki, "Azərbaycanfilm" kinostudiyasında böyümüşəm. Orada ancaq peşəkar aktyorlar görmüşəm. Qarşıma məqsəd qoymuşdum ki, kommersiya filmi olsa belə, onlarla işləmək lazımdır. Heç biriylə də çətinliyim olmadı. Sənətkarlarımızın hamısına da ssenarini təqdim edəndə, bildirdim ki, etirazınız olsa deyərsiniz. Qurban İsmayılovla, Fuad Osmanovla, Rasim Balayevlə görüşdük, sağ olsunlar, razılıq verdilər. 

- Yanılmıramsa ilk işinizdir...

- Bəli, quruluşçu rejissor kimi ilk işimdir. 

- Bildiyimə görə, filmə maraq o qədər də böyük deyil.

- Bəli, filmə maraq gözləniləndən çox aşağıdır. Gözləmirdik ki, respublikanın xalq artisti, köhnə filmlərimizin qəhrəmanı, "Şöhrət" ordenli Rasim Balayev filmə çəkiləcək və millət gedib baxmayacaq. Film kassaya çıxmamışdan internetdə reklam edirdik. İnsanlar yazırdılar ki, böyük məmnuniyətlə gedəcəyik, komediyalardan bezmişdik, axır ki, bir ciddi film çəkən oldu və sair. Ancaq təəssüf ki, hər şey əksinə oldu. Deyim ki, o sözlər bizi çox ruhlandırmışdı, ümidləndirmişdi.

- Filmə bir həftə ərzində nə qədər baxış olub?

- Təxminən iki min nəfər baxıb.

- Gözləntiləriniz nə qədər idi?

- İlk həftəyə ən azı on min nəfər gözləyirdik. Filmin prodüseri və Bəxtiyar rolunun ifaçısı Cəmil Cəfərov yaxın dostumdur. Onun və özümün adından bir mesaj vermək istəyirəm. Xalqımız "Sara"ya baxmaq istəməsə, məcbur olub filmə Azərbaycanda qadağa qoyula bilər.

- Bu kimin qərarıdır?

- İstehsalçı və maliyyəni buraxan odur. Əsas qərar onundur. Amma mən də qərarı dəstəkləyə bilərəm. İki il əziyyətlə bu filmi çəkmişəm və istəyirəm ki, xalqımız gedib baxsın, sənətkarlarımızı görsün.

- Sirr deyilsə, "Sara" neçəyə başa gəldi?

- Deyirlər, bu filmə yüz min pul xərclənib. Sadəcə, film nəzərdə tutulduğundan daha baha başa gəldi.

- Səbəb?

- Şəxsi məsələdir, açıqlaya bilməyəcəyəm. Amma yüz min söhbəti konkret yalandır.

- Bildirilir ki, Rasim Balayev qonorarını tam ala bilmədiyi üçün qala gecəsinə qatılmayıb.

- Rasim müəllimlə biz qonorar məsələsini çəkiliş meydançasında həll etmişik. Bu barədə artıq danışmaq istəmirəm. Onun adından demək istəyirəm ki, o səhhətindəki problemlərə görə qala gecəsinə gələ bilməmişdi. Özüm danışdım, telefonda səsi güclə çıxırdı. 

- Bundan sonra komediya çəkəcəksən, yoxsa yenə ciddi film?

- Komediya çəkməyəcəyəm və çox çətin janrdır. Yaxşı komediya çəkmək üçün rejissor psixoloji adaptasiya olmalı, düzgün ssenari seçməlidir. Komediya çəkmək fikrim yoxdur. 

- Ara-sıra özünüz də film və seriallara çəkilirsiniz. Aktyorluğu əsas peşəniz hesab edirsiniz, yoxsa rejissorluğu?

- Rejissorluq çətin işdir. Aktyor doğulmaq lazımdır, kaprizlidir. Hələ ki gəncəm, digər rejissorlar da dəvət edir. Öz filmimdə də uyğun obraz olanda çəkilirəm. 

- Belə anladım ki, narazılığınız tamaşaçılardandır.

- Elədir, aktyorlarımızı dəyərləndirmirlər. Fuad Osmanov, Qurban İsmayılov, xüsusən Rasim Balayevi lazımınca qiymətləndirmirlər. 

- Sizcə niyə Azərbaycanda ciddi filmlərə maraq yoxdur?

- Səbəbini bilmirəm, bəlkə sizin bir rəyiniz olar.

- Bəlkə tamaşaçı düşünməkdən daha çox gülmək istəyir?

- Ola bilər. Azərbaycan xalqı həmişə düşünüb. Bütün dünyada problem var. Mənə elə gəlir ki, bu, düzgün bəhanə deyil.

- İndiki durum sizdə xəyal qırıqlığı yaradırmı?

- Əlbəttə xəyal qırıqlığı yaradır. Çünki daha ümidliydik.

- Çox güman ki, film öz xərcini çıxartmayıb.

- Bəli. Film hələ kassadadır və yetərincə seansımız var. Gün ərzində 9-10 seansımız olur. "Sara" Azərbaycanda yeddi kinoteatrda yayımlanır və orta hesabla gün ərzində yeddi seans olur. Əksər kinoteatrlarda film nümayiş etdirilir. Tamaşaçılara demək istərdim ki, nə qədər gec deyil, filmə baxa bilərlər. Prodüserin və öz adımdan deyirəm ki, MDB ölkələrindən və Türkiyədən təkliflər var. Baxılmasa, çox güman ki, film satılacaq və burada yayımına qadağa qoyulacaq.


İntiqam VALEHOĞLU
Ölkə.Az

ŞƏRH YAZ
0

"Bunu hələ də özümə bağışlamıram" — Xalq artisti oğurluq etdiyini illər sonra ETİRAF etdi

22:50
22.06.2018
726
Mədəniyyət
A
"Yanan işığı gərək daha da alışdırıb, yandırasan".

"Ölkə.Az" xalq artisti Arif Quliyevin Milli.Az-a müsahibəsini təqdim edir.

- Arif müəllim necəsiz?

- Şükür Allaha, özümü çox yaxşı hiss edirəm. Əsasən də, teatrdan, kinodan danışanda.

- Bugünkü komediyalardan razısınız?

- Əlbəttə, hamısından razıyam. Komediya nə qədər çox olsa, ondan alacağımız məhsul bizi az qane edər. İndiki komediyaları ona görə bəyənirəm ki, hərəsində bir gözəllik var. Biri zəif ola bilər, biri üstün. Lakin bunların hamısının öz çəkisi var. Komediya özü silahdır, biri var güllə ilə birini vurasan, biri də var söz gülləsi ilə. İndi Arif Quliyev dincəlir, yeni komediya aktyorları gəlir.

- Mən çox sevinirəm ki, siz fəaliyyətdə olan gənclərə bu cür dəstəksiniz.

- Yanan işığı gərək daha da alışdırıb, yandırasan. Teatr işığı alışdırır, yandırır. Biz sənətkarlar da o istinin şüasından alıb, bizi sevən tamaşaçılara ötürürük. Bu cür gəncləri mən həmişə alqışlayıram.

- Mən bilirəm ki, siz bir baba kimi nəvələrinizi çox sevirsiniz. Onlara vaxt ayıra bilirsiz?

- Əlbəttə, vaxt ayırıram. Nəvəsiz həyat yoxdur! Evə daxil olan kimi belimə minirlər (gülür). Nəvə heç nəyə baxmır, istəyir titulun olsun, istəyir olmasın. Onlar mənə bütün dərdi-qəmi unutdurur, başımı qatır.

- Həyatda peşman olduğunuz məqamlar çox olub?

- Mən bir dəfə oğurluq etmişdim, onda peşman oldum. Onu indiyə kimi özümə bağışlaya bilmirəm.

- Nə oğurluğu idi?

- Bir dəfə vağzaldakı qadının balıq bağlamasını oğurlamışam. İndiyə qədər onun peşmanlığını çəkirəm. Bunu özümə bağışlaya bilmirəm.

- Həyat  sizi çox sınasa da güclü olmusunuz...

- Həyatdır da. Allah məndən bir yandan alıb, bir yandan da mənə insanların məhəbbətini verib. Canıma, qanıma elə bir sənət hopdurub ki, o sənət vasitəsilə məni görüb tanıyıblar. İnsanların ürəyindən qəmi, kədəri, qüssəni qopardıb yerinə həmişə istəmişəm ki, gülüş toxumu səpim. Çünki mənim həyatım çox keşməkeşli olub.

- Həyatda nə ürəyinizcə deyil?

- Hər şey ürəyimcədir. İndiyə kimi o sevgi, məhəbbət varsa insanlarda, deməli, mən xoşbəxtəm. Başqa heç nə istəmirəm. Aktyor üçün bundan böyük nə ola bilər?

Ölkə.Az

ŞƏRH YAZ
0

Hacı Nuranın vəziyyəti ağırlaşdı

Hacı Nuranın vəziyyəti ağırlaşdı
15:57
22.06.2018
804
Mədəniyyət
A
Ötən gün xəstəxanaya yerləşdirilən aparıcı Nuran Hüseynovdan onkoloji şiş tapılıb.

"Ölkə.Az" xəbər verir ki, bunu “Qafqazinfo”ya açıqlamasında aparıcının köməkçisi məlumat verib. 

Bildirib ki, N. Hüseynov təcili olaraq Almaniyaya aparılmalıdır: “Təzyiqi qalxıb-düşürdü. Zəifləmişdi, immuniteti aşağı düşmüşdü. Analizlər verilib və birinin cavabları çıxıb. Ağciyərində onkoloji şiş tapılıb.  Bu səbəbdən təcili Almaniyaya getməlidir, müalicəsi davam etdirilməlidir”. 

ŞƏRH YAZ
0
BAĞLA