Rauf Əliyev: \"Avropa Gənclər Yay Olimpiya Festivalının Bakıda keçirilməsi Azərbaycanın idman ölkəsi olduğunun bariz göstəricisidir\"

 Bunu fikirləri “Ölkə.Az”a açıqlamasında millət vəkili Rauf Əliyev səsləndirib.

Onun sözlərinə görə, davamlı olaraq beynəlxalq səviyyəli idman yarışlarının, o cümlədən  “Bakı-2019” Avropa Gənclər Yay Olimpiya Festivalının  Azərbaycanda keçirilməsi ölkəmizin idman ölkəsi olduğunun bariz göstəricisidir:

“Bu siyasətin bünövrəsi Ulu Öndər Heydər Əliyev tərəfindən və Prezident İlham Əliyevin hələ 90-cı illərdə Milli Olimpiya Komitəsinə rəhbərlik etdiyi dövrdə qoyulub.  Bu siyasət nəticəsində Azərbaycanda idmanı inkişaf etdirmək üçün güclü maddi-texniki baza və infrastruktur yaradılıb. Azərbaycan idman sahəsində əldə etdiyi uğurlar və güclü maddi- texnika bazanın, infrastrukturun yaradılması nəticəsində mötəbər idman yarışları ölkəmizdə keçirilməyə başladı. Belə idman maddi-texniki baza və infrastruktur heç də hər ölkədə yoxdur.  Azərbaycan belə mötəbər yarışların keçirilməsi, təşkili, ev sahibliyi, təhlükəsizliyi sahəsində yetərincə təcrübə əldə edib.  Artıq beynəlxalq idman federasiyaları, komitələri özləri belə mötəbər yarışların Azərbaycanda keçirilməsində maraqlıdırlar". 

Deputat qeyd edib ki, belə yarışların Azərbaycanda keçirilməsi ölkəmizə olan inamdan, belə yarışları layiqincə, yüksək səviyyədə keçirmək qabiliyyətinə malik olmasından irəli gəlir:

"Davamlı olaraq mötəbər idman tədbirlərinin ölkəmizdə keçirilməsi Azərbaycanın beynəlxalq səviyyədəki nüfuzundan xəbər verir. Belə yarışlara ev sahibliyi etmək Azərbaycan mədəniyyətinin, həqiqətlərinin dünyaya tanıdılması baxımdan önəmlidir. Növbəti yarışlar zamanı da 4000 yaxın idmançı və texniki personal yarışda iştirak edəcək. Bunun indiki məqamda Azərbaycanın dünyaya tanıdılması və iqtisadiyyatının, turizm sektorunun inkişafı baxımından müstəsna rolu olacaq. Bu yarışa da ev sahibliyi etməsi Azərbaycanın beynəlxalq aləmdəki nüfuzunun möhkəmlənməsinə  xidmət edəcək ”.

Mürtəza
Ölkə.Az