Razi Nurullayev: “Kreslosuz da xalqın yanında olmaq, onun liderinə çevrilmək mümkündür”

Hər kəsin idarəçiliyinin sonu bilinməlidir. Sonsuz olan hələ ki, kainatdır. İstər prezidentin, istərsə də siyasi rəhbərlik iddasında olan kəslərin seçilmə müddətinin aydın olması zərurətdir.

Biz iqtidarı, Prezident İlham Əliyevi, ümumilikdə YAP-ı hakimiyyəti əldən verməməkdə, hər vəchlə hakimiyyəti əllərində saxlamaq üçün müxtəlif vasitələrdən istifadə etməkdə günahlandırırıq. Xalq da bunu görür. Lakin, həm xalqda, həm də elə məndə bir sual yaranır. Əgər biz qarşımızda duran siyasi opponenti siyasi hoqqabazlıqda və represiyalarda ittiham ediriksə, bəs özümüz müxalifət olaraq onlarla eyni yolu getmirikmi?

Azərbaycan Xalq Cəbhəsi Partiyasının sədri Razi Nurullayev illərdir eyni postda qalan müxalifət liderlərinə səslənib. Sədr bildirib ki, bu gün elə müxalifət təmsilçilərinin də çoxu qədimdən qalma siyasi eksponatlardır:

“Bütün partiyaların nizamnamələri müddətsiz sədr seçkisini - yəni müddətsiz kreslo vəd edir. Bu doğrudurmu? Uğrunda döyüşdüyümüz, mübarizə apardığımız dəyərlərə özümüz əməl etmiriksə, qarşımızdakı siyasi opponentin haqsız olduğuna xalqı necə inandıra bilərik?
Biz AXCP olaraq 18 oktyabr 2015-ci ildə keçirilən qurultayımızda Nizamnaməmizi dəyişdik və ora məhdudlaşdırıcı bənd əlavə etdik. Eyni şəxs iki dəfədən çox sədr seçilə bilməz. Bunu ilk olaraq Azərbaycanın syasi tarixində biz etdik. Gözümüz kresloda deyil, xalqın yanında olmaqdır. Kreslosuz da xalqın yanında olmaq, onun liderinə çevrilmək mümkündür.

Sual oluna bilər ki, Avropada da partiya nizamnamələrində sədr seçilməyə məhdudlaşdırıcı bəndlər yoxdur. Doğru, amma bir çox demokratik ölkələrin də Konstitusiyasında prezident seçimi ilə bağlı müddət yoxdur. Amma, onlar iki dəfədən çox namizəd və ya prezident seçilmək istəmirlər. Bu artıq siyasi mədəniyyət və ya oturuşmuş siyasi ənənədir. Bizim siyasi partiyalarımız nizamnamələrinə sədr seçilməsinin müddəti ilə bağlı məhdudlaşdırıcı bənd əlavə etsələr, çox yaxşı olar. Siyasi mədəniyyət və ənənələrimiz Avropa səviyyəsinə çatanda yeni nəsil siyasətçilər bu məhdudiyyəti aradan götürərlər.

Azərbaycandakı bütün siyasi partiyaları nizamnamələrinə eyni şəxsin iki dəfədən çox dalbadal sədr seçilməsinə məhdudiyyət qoymağa səsləyirəm”.

Ölkə.Az