“Rüstəm İbrahimbəyov Azərbaycan xalqının düşməni elan edilməlidir”

R.Qazıyev “Ölkə.Az”a açıqlamasında Azərbaycan cəmiyyətini Rüstəm İbrahimbəyovu lənətləməyə çağırıb:

“Hesab edirəm ki, Rüstəm İbrahimbəyov Azərbaycan vətəndaşları tərəfindən lənətlənməlidir, Azərbaycan xalqının düşməni elan olunmalıdır. Bununla bağlı rəsmi bəyanat verilməlidir. Əgər onun Azərbaycan vətəndaşlığı varsa, dərhal ondan məhrum edilməlidir”.

Sabiq nazir təklif edib ki, Azərbaycanın tanınmış ziyalılarının iştirakı ilə “dəyirmi masalar” təşkil olunmalı və Rüstəm İbrahimbəyovun sözügedən hərəkəti pislənilməlidir:

“Çox yaxşı olardı ki, həmin müzakirələrə Rüstəm İbrahimbəyov da qatılsın və öz əməlləri ilə bağlı izahat versin. Rüstəm İbrahimbəyov gəlib cavab verməlidir ki, o hansı əsasla Azərbaycan millətini bu qədər alçaldıb. Ümumiyyətlə, Rüstəm İbrahimbəyova elə bir cavab verilməlidir ki, bu onun kimi düşünənlərə dərs olsun. Axı bu millətin çörəyini yeyib, suyunu içib, havasını udub nə qədər onu alçaltmaq olar? Mən çox təəssüf edirəm ki, tərif gələndə sıraya düzülən və özlərini görkəmli ziyalı hesab edən yazıçı Anar Rzayev, bəstəkar Fərhad Bədəlbəyli və digərləri hələ də susurlar. Gözləyirlər ki, yuxarıdan komanda verilsin? Azərbaycan ziyalıları güclü bəyanatla çıxış etməlidir. İctimaiyyət bu cür hallara susqunluq nümayiş etdirməməlidir”. 

R.Qazıyev Rüstəm İbrahimbəyovun əməllərini xəyanat hesab etdiyini bildirib:

“Mən İbrahimbəyov qardaşlarının heç birində bu Vətənə qarşı sevgi, məhəbbət görməmişəm. Onlar hər zaman azərbaycanlılara yuxarıdan aşağı baxıblar. Baxmayaraq ki, İbrahimbəyov qardaşları Azərbaycanın havasını udublar, çörəyini yeyiblər, ancaq heç zaman bizim milləti bəyənməyiblər. Azərbaycan xalqının və millətinin sadəliyi, mehribançılığı və qonaqpərvərliyi İbrahimbəyov, Əkrəm Əylisi kimi adamları qudurdub. Axı insan da öz millətinə bu qədər açıq düşmən münasibətdə olarmı? Hesab edirəm ki, Azərbaycan hakimiyyəti Rüstəm İbrahimbəyova sərt şəkildə reaksiya verməlidir”.

Vasif Həsənli
Ölkə.Az