"Rejissorun həyat yoldaşı aramızdakı münasibəti bilib çəkiliş meydançasına gəldi və..." — GƏNC AKTRİSA İLƏ QALMAQALLI MÜSAHİBƏ

14:32
19.04.2017
1283
Maqazin
A
Bir neçə gün öncə təqdimatı olan "Mahmud baba" filmi ətrafında qalmaqal davam edir.

Bildirilir ki, ekran işinin büdcəsi 210 min manat olsa da, sonda bu məbləğin 60 mini xərclənib. Hətta o qədər "qənaət edilib" ki, filmdəki Məsmə roluna "Mahmud baba"nın qrim ustasını çəkiblər. Digər bir məqam isə rejissor Samir Kərimoğluyla gənc aktrisa Mələk Kazımova haqqında dolaşan şayiələrdir. İddialara görə, rejissorla aktrisanın sevgi macərasından xəbər tutan rejissorun həyat yoldaşı çəkiliş meydançasına gəlib. Hətta xanımı rejissora özünün də filmə çəkiləcəyi barədə şərt qoyub. Məhz bundan sonra Mələk Kazımovanın çəkildiyi bir neçə səhnə "kəsilib", əvəzində ssenari dəyişdirilib və Kərimoğlunun həyat yoldaşı ekran işində rol alıb. Doğrudanmı, 42 yaşlı rejissorla 20 yaşlı aktrisa çəkiliş prosesində eşq macərası yaşayıblar? Həqiqətənmi indiyədək qonorarını almayan aktyorlar var? 

"Ölkə.Az"-ın bu və digər suallarını "Mahmud baba"nın Leylası Mələk Kazımova cavablandırıb:

- Mələk xanım, "Mahmud baba" adlı filmə çəkilmisiniz. Əldə etdiyimiz məlumata görə, filmdən qonorarınızı tam ala bilməmisiniz.

- Bəli, qonorarımı tam ala bilmədim. 

- Bəs çəkildiyiniz səhnələrin bir neçəsi niyə "kəsilmişdi"?

- Çünki orada başqa problemlər oldu. Rejissorla bağlı problem idi. Təbii ki, bu çəkiliş meydançasında baş verən problem deyildi.

- Yanılmıramsa, rejissor Samir Kərimoğlunun həyat yoldaşıyla aranızda narazılıq olmuşdu.

- Bəli, elədir.

- Qısqanclıq?

- Bəli, bəli.

- Yəqin ki, rejissorla aranızda müəyyən münasibət var idi.

- Mən bu barədə danışmaq istəmirəm. Amma qısa onu deyə bilərəm ki, filmdə səhnələrimin kəsilməsi, səsimin dublyaj edilib təqdim olunması başqa məsələlərlə bağlıydı.

- Öz səsiniz deyil?

- Öz səsim deyil. Səhnələrimin silinməsinə görə məlum məsələdir ki, filmdə gedişat da başqa cür alındı.

- Film uğursuz oldu?

- Uğursuz deməzdim, sadəcə, silindiyim səhnələrə görə məcburan sonluq başqa cür alındı. Mənə elə gəlir ki, dəyişikliklərə görə film bir az maraqsız alındı.

- Rejissorun həyat yoldaşının ssenaridən kənar filmə çəkilməsiylə bağlı xəbərlər var. Bu doğrudurmu?

- (gülür) İnanırsınız, özüm hələ gedib filmə baxmamışam, ona görə də fikir deyə bilməyəcəyəm. Bilmirəm, onun həyat yoldaşı orada çəkilib, ya yox.

- Sizin 20, rejissorun 42 yaşı var. Münasibətiniz haqda deyilən fikirlərə rəylər də fərqlidir...

- Əslində, bu mövzu barədə danışmağa yaxınlarım, valideynlərim icazə vermirlər, söhbət bağlanıb. Qısa şəkildə deyə bilərəm ki, mənə də, qarşı tərəfə də haqq qazandıranlar oldu. Özünüz də yaş fərqimizi bilirsiniz. Ortada başqa nədən söhbət gedə bilər ki? Mən onun yaşında deyiləm ki, deyim, belə münasibət, elə münasibət. Düşünürəm ki, burada mənim də ağılsızlığım oldu.

- Hər halda ortada münasibət var idi.

- Var idi deməzdim. Nə münasibət var idi, nə münasibət yox idi. Belə bir durum idi.

- Yəni sözdə var idi, real yox idi?

- Bəli. Hər kəsin ailəsinə hörmətlə yanaşıram. Onun da ailəsi, övladları var. Düşünürəm ki, münasibətdən söhbət gedə bilməzdi. Amma ona oxşar bir şey var idi. 

- Demək real münasibət varmış...

- Tam sayılmaz.

- İlk addım qarşı tərəfdən gəlmişdi?

- Bəli. 

- Siz də qəbul etmişdiniz.

- Qəbul etmişdim sayılmaz. Mən də əvvəlcə düşündüm ki, alınmaz. Amma sonradan nəsə inandım da mən (gülür).

- Sizi nə ilə inandırdı?

- O barədə danışmaq, çox dərinə getmək istəmirəm.

- Bəlkə boşandığını, yaxud boşanacağını demişdi?

- Xeyr, o həmişə ailəsinə hörmətlə yanaşıb.

- Samir Kərimoğlunu həyat yoldaşı sizə etirazını nə formada bildirdi?

- O qadının qırxa yaxın yaşı var. Düşünürəm ki, o yaşda qadın özünü sivil və daha mədəni formada aparmalı və fikir bildirməliydi. Başa düşürəm, yoldaşıdır. Onun yerinə mən də olsam, bəlkə belə hərəkət edərdim.

- Çox pis davrandı?

- Çox pis deməzdim, amma yaşına yaraşmayan tərzdə danışdı, kobudluq elədi. Bir tərəfdən də düşünürəm ki, mən də belə davranardım.

- Məsmə obrazına qrim ustası çəkilmişdi. Aktrisa tapılmamışdı?

- Bəli.

- Gündəlik qonorar danışılmışdı?

- Bəli, amma ala bilmədiyim üçün yadımdan çıxıb. Bu söhbətlərdən başım çox ağrıyıb deyə, hər şeyi unutmuşam.

- Çəkilişlər nə vaxt olub ki, artıq yadınızdan çıxıb?

- Çəkilişlər yay aylarında olmuşdu.

- Siz hələ tələbəsiniz.

- Bəli. 

- Qonorarınızın verilməməsinə səbəb kimi nə göstərilib?

- Samir Kərimoğlu məni orada kastinq direktoru vəzifəsinə də qoymuşdu. Üç ayın məvacibini almışdım.

- Aylıq nə qədər idi?

- Hər ay üçün 400 manat pul verilmişdi.

- Kastinq direktoru çox önəmli işdir, siz isə tələbəsiniz. Niyə belə məsuliyyətli işə razı oldunuz?

- Orada bu işi görən tək mən deyildim. Təbii ki, ikinci rejissorumuz Elvin Abdullayev işin çoxunu görürdü.

- Siz kastinq direktoru təyin ediləndə Samir Kərimoğluyla münasibətiniz başlamışdı?

- Bəli, başlamışdı və ondan sonra məni kastinq direktoru təyin etdi.

- Bəs necə oldu ki, sizi bu qədər çox istədiyi, güvəndiyi halda, qonorarınızı vermədi?

- Bir söz deyə bilmərəm. Fikrimcə, ailə problemləri onu daha çox narahat elədi. Hətta evindəki problemlərə görə filmə konsentrasiya oluna bilmirdi.

- Rəsmi müqaviləylə işləyirdiniz?

- Müqavilə yox idi, danışıq oldu və işimizi gördük. Amma bu mənimçün dərs oldu.

 
P.S. Səsləndirilən ittihamlarla bağlı rejissor Samir Kərimoğlunun da münasibətini təqdim etməyə çalışacağıq.

İntiqam VALEHOĞLU
Ölkə.Az

ŞƏRH YAZ
0

"Keçmiş həyat yoldaşımın arxasınca danışdıqlarım kişiyə yaraşmır" — SƏMƏD SƏMƏDOVDAN HEÇ VAXT ETMƏDİYİ ETİRAFLAR

12:13
Bu gün
1371
Maqazin
A
Xalq artisti Səməd Səmədov "Ölkə.Az"ın suallarını cavablandırıb.

- Səməd müəllim, müsahibəmizə sənət yeniliklərinizdən başlayaq...

- İyirmi beş ildir ki, oxuyuram və bu müddətdə yüz əlli mahnı oxumuşam. Eldar Mansurov, Faiq Sücəddinov, Nadir Əzimov, Xanım İsmayılqızı, Novruz Aslan, Sirus Abasbəyli, Vahid Əziz, Nüsrət Kəsəmənli kimi söz və musiqi müəllifləri, sənətkarlarla işləmişəm. Elə il olmur ki, Səməd Səmədov bir dənə hit buraxmasın. İki il əvvəl oxuduğum "Mənə belə gözəlsən" və "Öz sevdiyimlə evlənirəm" mahnıları hələ də dəbdədir.

- Mahnıları oxuyanda hit olub-olmayacağını hiss edirsiniz?

- Yox, hiss etmirəm. Mən böyük müğənni deyiləm. Bakıda iyirmi müğənni varsa, mən iyirmi birinciyəm. Müğənni ayrı sənətdir. Mən toy aparıcısıyam.

- Çox əla etirafdır...

- Müğənni kimi iyirmi birinci olsam da, iştirak etdiyim toyda ayrı müğənniyə ehtiyac olmur. Elə şou yaradıram ki, başqasına ehtiyac qalmır. Bu il də "Dəbdəyəm, gündəmdəyəm" adlı mahnı oxudum.

(Söhbətimizin bu yerində sözügedən mahnısını oxuyur)

- Deyəsən bu mahnı sizi tənqid edənlərə mesaj xarakterlidir.

- Bəli.

- Deyəsən o mesajdan mənə də pay düşür.

- (qəhqəhə çəkir) Sənətimə şübhəsi olanlar üçün oxumuşam.

- Oğlunuz Anar Səmədoğlu da müğənniydi, amma sonradan bu sahədən uzaqlaşdı. Deyəsən siz belə məsləhət bilmişdiniz.

- Oğlumun qarşısına Elton, Elnur, Ayaz, Zamiqin diskini atdım. O vaxt hələ Abbas, Nadir Qafarzadə, Ramal, Vasif Məhərrəmli gündəmdə yox idi. Dedim ki, görürsən kimlər gəlir? Nə qədər gec deyil, çıx aradan.

- (zarafatyana sual) Nə əcəb oğlunuza qoşulub, özünüz də aradan çıxmadınız?

- Mən hələ də dəbdəyəm. Ard-arda efirlərə dəvət alıram.

- "Toylar kralı" titulunu sizə kim vermişdi?

- O titulu mənə İlhamə Quliyeva vermişdi. Ancaq o titula layiq olmasaydım, bir neçə aya silinəcəkdi, qalmayacaqdı. İyirmi il mən o adı daşıdım. Deyim ki, brilyantdan olan həmin tacım evdədir. O tacı Niyaməddin Musayev, Flora Kərimova, İlhamə Quliyeva, Nüşabə Ələsgərli, Almaz Ələsgərova, Mətanət İsgəndərlinin qarşısında Novruz bayramı axşamı Mirzə Babayev mənim başıma qoydu və dedi ki, əsl toylar kralısan, mən sənə xeyir-dua verirəm.

- Sonradan eyniadlı televiziya layihəsi təşkil edildi. Nə əcəb həmin layihədə iştiraka razılıq verdiniz?

- Bəli, "Toylar kralı" yarışmasında Manaf Ağayev qalib gəldi və mən ona zəng vurub təbrik edən ilk şəxs oldum. Bunu özündən də soruşa bilərsiniz. Hələ studiyada mükafat təqdim edilərkən Manafa zəng vurmuşdum. Amma ondan sonra nə qədər "Toylar kralı" yarışması keçirildi.

- Sizcə "Toylar kralı" deyəndə ilk yada düşən kimlər olur?

- Səməd Səmədov və Manaf Ağayev.

- Digərlərini qondarma sayırsınız?

- Bəli. Mən artıq respublikanın xalq artistiyəm və bu dövlət tərəfindən verilmiş qiymətdir.

- Yeri gəlmişkən, sizin xalq artisti olmağınızla bağlı tənqidlər səsləndirilir, hətta sizin bu ada layiq olmadığınızı düşünənlər, deyənlər var. Hətta düşünürlər ki, müxtəlif dost-tanışların vasitəsiylə adınız fəxri ad siyahısına təqdim edilmişdi. İstərdim bu fikirlərə də aydınlıq gətirəsiniz...

- Bildiyiniz kimi Mədəniyyət Nazirliyi iyirmi-otuz namizədin adını ölkə rəhbərinə təqdim edir və o, adları oxuyur. Sonradan layiq olanların namizədliyi təsdiqlənir.

- Təbii ki, məlum məsələdir. Ancaq ola bilərmi ki, təqdimatı edən şəxslərlə dostluq əlaqələriniz var?

- Nazir o adları təqdim edir.

- Nazirlə münasibətiniz necədir?

- Mənə xalq artisti fəxri adı təqdim ediləndə görmüşəm, heç vaxt ünsiyyətim olmayıb. O ki qaldı tənqidə, bu, təbii şeydir.

- Söhbətimizin əvvəlində bildirdiniz ki, Bakıda iyirmi müğənni varsa, siz iyirmi birinci ifaçısınız. Düşünmürsünüzmü ki, daşıdığınız fəxri ada sizdən daha layiqli sənətçilər var?

- Bəli, haqlısınız.

- Kimləri dinləyirsiniz?

- İlqar Muradovu, Eyyub Yaqubovu, Vasif Məhərrəmlini, Teymur Əmrahı dinləyirəm. Qadınlardan Aygün Kazımova, Röya, Brilyant Dadaşova, Zülfiyyə Xanbabayevaya qulaq asıram. Əli Mirəliyev həmişə sinəsinə döyə-döyə deyir ki, ay camaat, ay millət, Səməd Səmədov oxuyan deyil (gülür).

- Bu dəfə siz ona atmaca atdınız ha...

- Əli Mirəliyev "Dan ulduzu"nda oxuyub...

- Deyəsən siz də səs rejissoru olmusunuz...

- Bəli, o vaxtlar sintezator yox idi, mən ionika ifa edirdim, həm də səs rejissoruydum.

- Bəlkə Əli müəllim buna görə sizi qəbul edə bilmir...

- Əli qəbul edə bilmir ki, mən dünənki "aparaturşik", dünənki ionika ifaçısı xalq artisti oldu. Amma mənim də haqqım var. Azərbaycanın rayonlarını qarış-qarış gəzmişəm. Konsertlərdən əlavə toylarda olmuşam, hərbçilər qarşısında çıxışlarım olub.

- Sizcə Əli Mirəliyev də fəxri ada layiqdirmi? Ümumiyyətlə, o necə oxuyur?

- Əli yaxşı da oxumur, amma hər halda məndən pis də oxumur.

- Məncə, ilk dəfə hansısa müsahibənizdə bu qədər səmimisiniz. Düşünmürsünüzmü ki, belə səmimi danışmağınız sizə problem yaradar? Məsələn, deyərlər ki, özünüz demisiniz iyirmi birinci oxuyansınız.

- İyirmi bir "oçko"dur (gülür). İndiyədək mənim zirvədə olmağımın sirrini heç kim bilməyib. İyirmi beş ildir ki, bunu heç kimə demirəm.

- Buyurun, açıqlayın.

- İnsan əgər xeyriyyə işi görürsə, onu efirə açıqlamamalıdır, piar etməməlidir. Müğənnilər heç bilmirlər Əlillər evi haradadır. Əlillər Evi Ramanada, Qocalar evi Bilgəhdə, Uşaq evi Saraydadır. Bağım Fatmayıdadır və o kəndin məscidində mənim də əməyim var. Artıq yaşa dolmuşam və istəyirəm ki, indi bunu insanlar bilsin. İllərdir dediyim bu yerlərə bacardığımı etmişəm.

- Son bir-iki ilə qədər şəxsi həyatınızdan elə də çox məlumatlı deyildik. Ancaq son vaxtlar şəxsi həyatınızdan çox danışdınız...

- Məni təxribata çəkdilər.

- Yetərincə təcrübəlisiniz...

- Hər insanı təxribata çəkmək mümkündür. Məni telekanallardan birinin aparıcısı çəkmişdi. Antireklam da reklamdır. Bir var bəzi müğənnilər kimi biabır olasan, bir də var şəxsi həyatdan danışasan. Etiraf edirəm ki, şəxsi həyatımı gündəmə gətirməklə böyük səhvə yol verdim. Ümumiyyətlə, kişi qadının ardınca danışmamalıdır.

- Məmur dostlarınız varmı?

- Bu yaxınlarda Araz Ağalarov dostumun bağındaydı. Dostum da Özbəkistanda altmış min üzvü olan Azərbaycan diasporunun sədriydi, hazırda Bakıya köçüb. Bağa çağırdı və məni Araz Ağalarova təqdim etdi. Dedim ki, Araz müəllim, biz sizinlə fəxr edirik, ölkəmizi dünyada təmsil edirsiniz.

- Elmar Məmmədyarovu tanıyırsınız?

- (bir anlıq pauza) ...

- Xarici işlər nazirimizdir.

- Bəli, bəli xatırladım.

- Sizə deyiblər ki, Elmar müəllimlə danışıq tərziniz oxşayır? Çünki o da Azərbaycan dilində sizin kimi danışır.

- (Ucadan gülür) Mən rusdilliyəm axı. Mən eşitmişəm ki, Balaş Qasımovu İTV-nin rəhbəri qoyublar. Biz onunla da fəxr etməliyik. "Çto? qde? koqda" dünyada izlənilir və bizim orada üç həmyerlimiz var.

- Azərbaycan dilini bilmədiyinizə görə yetərincə tənqid edilirsiz. Heç bilmədiyiniz sözləri öyrənməyə cəhd edirsiniz?

- İndi sizinlə sərbəst danışıram. Bilmədiyim sözləri də tanışlarıma zəng vurub maraqlanıram.

İntiqam VALEHOĞLU
Ölkə.Az

ŞƏRH YAZ
0

"Qadınlar işləyir, kişilər evdə oturub qeybət edirlər" — Vüsalə

11:16
Bu gün
2194
Maqazin
A
Aparıcı Vüsalə Kərimova "Space" telekanalında Kamran Həsənlinin aparıcısı olduğu "Onda başladıq" verilişində kişilərin qeybət etməsindən danışıb.

"Ölkə.Az"ın məlumatına görə, Kərimova bildirib ki, keçmişdən fərqli olaraq, indi kişilər qeybət etməyə daha çox meyllidirlər:

"İndi əksər ailələrdə qadınlar işləyir, kişilər isə bekarçılıqdan qeybət edir. Bekarçılıq olan yerdə qeybət də mütləqdir. Qeybət etməyin başqa səbəbi isə savadsızlıqdır".

Qeyd edək ki, həftə içi 10-da başlayan "Onda başladıq" verilişinin informasiya dəstəkçisi "Ölkə.Az" saytıdır.

Ölkə.Az

ŞƏRH YAZ
0
BAĞLA