“Rüfət Aslanlı QHT-lərin üzləşdiyi problemin aradan qaldırılması üçün banklara göstəriş verdiyini bildirdi”

Görüşdə iştirak edən Bütöv Azərbaycan Xalq Cəbhəsi Partiyası (BAXCP) sədrinin müavini, eyni zamanda QHT sədri Niyaməddin Orduxanlı "Ölkə.Az"-la görüş barədə təəssüratını bölüşüb. 

Onun sözlərinə görə, tədbirdə MBNP-nin Direktorlar Şurasının sədri Rüfət Aslanlı, Prezident Administrasiyası İctimai-siyasi məsələlər şöbəsinin gənclər təşkilatları ilə iş sektoru müdiri Vüsal Quliyev, Prezident Administrasiyasının ictimai-siyasi məsələlər şöbəsi müdirinin müavini Tahir Süleymanov və Beynəlxalq Bankın idarə heyyətinn sədri Xalid Əhədov da iştirak edib:

“Görüşdə QHT rəhbərləri və KİV-lərin rəhbərləri iştirak edirdi. Görüşdə QHT təmsilçilərindən Sahib Məmmədov, Əliməmməd Nuriyev, Mirhəsən Seyidov, mən və başqaları iştirak edirdi”.

Niyaməddin Orduxanlının fikrincə görüş səmərəli və işgüzar xarakterli olub:

“Ölkədə QHT ilə razılaşma əməliyyatında bank sistemində yaranmış problemlər QHT-ləri çox ağır bir duruma salmışdı. Buna görə, neçə gün idi ki, QHT-lər Dövlət Dəstəyi Şurasından qalib olduqları layihələrin icra olunmasını həyata keçirə bilmirdilər. Banklar 5000 manatdan artıq vəsaiti nağdlaşdırmağa məhdudiyyətlər qoymuşdular. Bu da ölkədə QHT sistemində ciddi problemlər yaratmışdı. Bununla bağlı 250-dən artıq QHT sədri və 105 gənclər təşkilatının rəhbəri ölkə rəhbəri İlham Əliyevə müraciət etmişdi. Müraciətdə prezidentin bu prosesə müdaxilə etmək xahiş olunurdu. Müraciətdən sonra adlarını çəkdiyim şəxslərlə birgə görüş keçirildi”.

Niyaməddin Orduxanlı deyir ki, görüşdə çıxış edən MBNP-nin Direktorlar Şurasının sədri Rüfət Aslanlı məsələnin tam mahiyyətini, yaranmış problmelərin texniki səbəbdən olduğunu bildirib:

“Burada söhbət ondan gedir ki, MBNP-nin bankalar göndərdiyi arayış düzgün qəbul edilməyib. Xüsusən də Beynəlxalq Bank tərəfindən anlaşılmazlıq olub. 2016-cı il Prezident İlham Əliyevin imzaladığı 16 dekabr tarixli qanunda nəzərdə tutulub ki, razılaşdırma əməliyyatını 1 ay ərzində 15000 manata qədər olan vəsaiti nağdlaşdıra bilər. Məsələnin kökündə banklarda, xüsusən də Beynəlxalq Bankda yaranmış 80 faiz problem dururdu. Düşünürəm ki. Elə buna görə də, Beynəlxalq Bankın nümayəndəsi bu görüşdə iştirak edirdi. Bank sədrinin verdiyi məktubda problemin anlaşılmazlıqdan yarandığı bildirilirdi. Yəni bu sırf texniki problmedir. MBNP rəsmisi bildirdi ki, QHT-lərin razılaşma əməliyyatına qadağa qoymayıb. Sadəcə onlar məktubu düzgün oxumayıblar və düzgün nəticə çıxartmayıblar. Rüfət Aslanlı tam məsuliyyətlə bildirib ki, birinci gündən QHT-lər və KİV nümayəndələri bir ay müddətinə 15000 manata qədər həyata keçirə bilərlər. 

QHT sahəsində bu problemi Rüfət Aslanlı həll etdi. O, təkidlə bu məsələni vurğuladı ki, yaxın gündə Beynəlxalq Bankın bütün şöbə müdirlərinin iştirakı ilə iclas keçirəcək. Bütün banklara təlimat kimi məktub göndəriləcək. Düşünürəm ki, birinci gündən QHT-nin bu problemləri həll olunacaq. Bir daha xüsusi qeyd etmək istəyirəm ki, bu problemin həll olunmasında ilk növbədə İlham Əliyevin böyük rolu olub. Prezidentə xüsusi təşəkkürümü bildirmək istəyirəm. Çünki onun müraciətindən sonra bu məsələ il əbağlı görüşün təşkil olunması irəli sürüldü. Məsələ müsbət həll olunduğuna görə, Rüfət Aslanlıya təşəkkür etmək istəyirəm”. 

N.Orduxanlı əlavə edib ki, tədbir zamanı o, Rüfət Aslanlıya məsələnin mahiyyətini QHT nümayəndələrinə tam aydın şəkildə açıqladığı üçün təşəkkürünü bildirib: 

“Tədbirdə KİV nümayəndələrinin razılaşmadığı hissələr də var. Söhbət onların ay ərzində həyata keçirtdiyi 15000 manat vəsaitin nağdlaşmasını az hesab etmələrindən gedir. Bu məsələ də müzakirə predmeti oldu”. 

Bundan başqa, tədbirdə çıxış etdiyini bildirən N.Orduxanlı ölkədə fəaliyyət göstərən QHT-lərin prinsipini və funksiyalarından bəhs edib. Təşkilat rəsmisi bildirib ki, yaranmış problem dövlətçilik mənafelərini qoruyan QHT-lərin fəaliyyəti üçün keçilməz bir əngəl idi. Bu problemi həll etdiyi üçün N.Orduxanlı xüsusən Rüfət Aslanlıya minnətdarlığını bildirib:

“Görüşdə çıxış edərkən bildirdim ki, QHT ölkənin vətəndaş cəmiyyətini formalaşdıran və ictimai nəzarəti həyata keçirən bir qurumdur. Beynəlxalq əlaqə ilə imkanları olan bir sahədir. Bu sahədə 2 növ QHT fəaliyyət göstərir. Bir var, Azərbaycan dövlətinin əleyhinə fəaliyyət göstərən, müəyyən xarici təşkilatların təsirində olan QHT-lər. Ötən ay 30-a yaxın QHT rəsmən beynəlxalq qurumlara müraciət etmişdi ki, Azərbaycan bu təşkilatlardan çıxarılsın. Onların mənşəyi də bəllidir. Onlar Azərbaycanın milli maraqlarını sevməyən, erməni diasporası ilə yaxından əməkdaşlıq edən, beynəlxalq təşkilatların təsirində olan insanlardır. Bir də var, 20-25 ildir Azərbaycan dövlətçiliyi üçün çalışan, vətəndaş cəmiyyətinin inkişafında xüsusi yeri olan və bir çox beynəlxalq təşkilatlarda tanınan, dövlətçiliyi müdafiə edən QHT-lər. Bu problem məhz Azərbaycan dövlətçiliyini müdafiə edən QHT-lər üçün böyük bir əngəl idi”. 

Ziya Səccad
Ölkə.Az