Ruhanidən Trampa “sillə” kimi

“Ölkə.Az” xəbər verir ki, bu barədə İran prezidenti Həsən Ruhani bildirib. Onun sözlərinə görə, bu fikirlərdən İrana qarşı nifrət, kin və ədavət yağır.

“Absurd və laqeyd ritorika, əsassız fikirlərlə dolu ifadələri ABŞ kimi nəhəng dövlətin liderinin dilindən eşitmək çox gülüncdür. Onun BMT iclasında mühüm məsələlərdən danışmaq əvəzinə, belə cəfəngiyyat fikirlər deməsi biabırçılıqdır. Bu ifadələr bizim dövlətimizə təhqirdir. Eyni zamanda dünya ölkələrinə qarşı hörmətsizlikdir. Tramp terrorla mübarizədən danışmaq əvəzinə İrana qarşı böhtanlar atmaqla həm öz hökumətini, həm də digər dövlətləri ələ salır”, - deyə Həsən Ruhani bildirib.

Qeyd edək ki, ABŞ prezidenti İranın Hizbullah və Bəşər Əsəd rejimini dəstəkləyərək regionda böhrana səbəb olduğunu iddia edərək "İranla nüvə anlaşması ABŞ üçün utanc mənbəyidir. Bu mövzudə hələ son sözümüzü deməmişik"-deyib.

Tramp çıxışında İran liderlərini də ittiham edib: "İran liderlərinin ən çox əziyyət çəkən qurbanları öz xalqıdır. Resursları iranlıların inkişafına ayırmaq əvəzinə neft gəlirlərini məsum müsəlmanları öldürən, ərəb və israillilərə hücum edən Hizbullah və digər terrorçulara ayırırlar. Bu pullar həm də Bəşər Əsədə və Yəməndəki vətəndaş müharibəsinə də xərclənir".

Ziya Səccad
Ölkə.Az