"Ruhəngiz Allahverdiyevayla məclisə düşəndə ürəyim açılır" — GƏNC MUSİQİÇİDƏN MARAQLI AÇIQLAMALAR

15:10
14.11.2017
1905
Maqazin
A
Son zamanlar sosial şəbəkələrin fenomeninə çevrilmiş gənc klarnet ifaçısı Kamil Rəhimov "Ölkə.Az"ın suallarını cavablandırıb.

- Kamil, səni istedadlı musiqiçi kimi tanıyırıq. Amma istərdim əvvəlcə özün özün haqda bir neçə kəlmə məlumat verəsən.

- 1990-cı ildə Bakıda anadan olmuşam, əslən Qərbi Azərbaycandanam. Memarlıq və İnşaat Universitetini bitirmişəm. Altıncı sinifdən balabanla məşğul olmuşam. İki dəfə respublika səviyyəli müsabiqələrin laureatıyam. Yadımdadır ki, biri Tarzən Hacı Xanməmmədov xatirəsinə həsr olunmuş festival idi. Orta məktəbi yaxşı oxuduğuma görə musiqidən uzaqlaşdım, bir il ümumiyyətlə alətə yaxın durmadım. Hazırlaşıb ali məktəbə daxil oldum. Ancaq musiqiyə marağım həmişə dəhşətli dərəcədə olub. Sonra bir dostum mənə kaset verdi ki bax. Kaseti qoyub baxdım ki, Zahid Sabirabadlının pərəstişkarı çəkib. Ştativi qoyub əvvəldən axıra qədər Zahidi çəkib. O məclisdə Ənvər Sadıqov da var idi. Kasetə baxdıqca dedim ki, bu nə yaxşı alətdir. Həm də Zahidin oturuşu, aləti tutmağı çox xoşuma gəldi. Düşündüm ki, bir az da balaban çalmışam, bu aləti də öyrənəcəyəm. Gedib öyrənmək üçün bir klarnet aldım. Elə o kasetə baxa-baxa klarnet çalmağı öyrəndim. Mənim ilk müəllimim həmin kaset oldu. İlk iki ildə lap çox məşğul olurdum. Hətta universitetə də getmirdim. Universitetlərarası festival keçirildi, bizim ali məktəbdən də mən seçilmişdim. Rəhmətlik Telman Adıgözəlov, Cavan Zeynallı, Kemal Cenk İçten münsiflər heyətindəydi. O festivalın da laureatı olmuşdum. Həmin festivaldan sonra universitetdə də mənə hörmət edirdilər ki, musiqiçidir də.

- Sonra toy məclisləri başladı...

- Tədricən məclislərə getməyə başladım. Əvvəlcə hamı kimi gəlingətirdiyə gedirdim. Yeddi-səkkiz ay sonra getmədim və dedim ki, bundan da yaxşı ifa etmək istəyirəm. Ondan sonra davamlı şəkildə toylara getdim. Üstündən iki il keçəndən sonra Zahid Sabirabadlıyla şəxsən tanış oldum.

- Bildiyimə görə Zahid Sabirabadlının indiyə qədər tələbəsi olmayıb və sən onun yeganə tələbəsisən. 

- Zahid oturub heç kimə nəsə başa salmayıb, amma mənə sənətlə bağlı çox şeylər göstərib, çox tövsiyyələr verib. 

- Zahid Sabirabadlıyla tanışlıq tarixçəniz maraqlıdır...

- Xırdalanda dostlarımız məclis təşkil etmişdilər. Mənə dedilər ki, bura gəl, getdim. Getdim ki, Zahid də ordadır. Təsəvvür edin ki, göydə axtardığımı yerdə tapmışam. Dostlarımız dedilər ki, bu uşaq səni çox istəyir. Soruşdu ki, nə işlə məşğulsan? Dedim ki, boş-bekar gəzirəm. Uşaqlar dedilər ki, sənə qulaq asır, özü də klarnet çalır. Dedi, qalx bir mahnı ifa et, qulaq asaq. Çox isrardan sonra  türk mahnısı ifa etdim. Təsəvvür edin ki, mənim bir diskim vardı, ordakı üç yüz mahnıdan iki yüz səksəni Zahidin ifalarıydı. O disk evdə iyirmi dörd saat oxuyurdu. Gecə də həmin disklə yuxuya gedirdim. Klarnet elə alətdir ki, bir aləti ayrı-ayrı əlli ifaçı ifa etsin, hamısında fərqli səslər çıxacaq. Amma mən Zahidə o qədər qulaq asmışdım ki, səsi beynimə girmişdi. Artıq mən nə etsəm də, beynimdə o səs gəlir. İfa edəndə də Zahid dedi ki, eynilə mənim səsimi almısan ki. O məclisdən sonra dostluğumuz başladı və bu günə qədər ondan öyrənirəm. Tanış olandan sonra gördüm ki, sənəti qədər də insanlığı var. Özünə də deyirəm ki, əvvəl sənin sənətini çox istəyirdim, amma indi bilmirəm, insanlığın üstündür, yoxsa sənətin. Təsəvvür edin ki, tanış olduğumuz gün xəstə olduğumu bilirdi. Səhəri gün zəng vurdu ki, dədə, dünən xəstələnmişdin, indi necəsən? Siz insanlığa baxın da. 

- Yeri gəlmişkən, Zahidin musiqi təhsili var?

- Heç bir musiqi təhsili yoxdur.

- Adətən böyük sənətkarlar tələbələrinə nələrisə öyrətməməyə çalışırlar. Yəni, axıra qədər öyrətmirlər. Belə halla olur?

- Zahidə bir sual verirsən, üç sualın cavabını alırsan. Özündən bu barədə soruşmuşam ki, nə əcəb hamısını axıra qədər göstərirsən. Deyir ki, mən bunun əlli formasını sənə göstərəcəm, sabah özüm əlli birinci formada ifa edəcəyəm. Çünki öz fantaziyası, sənəti çox böyükdür. 

- Zahid Sabirabadlının sənətinə olan fanatlığın məlumdur. Bəs peşəkar musiqiçi kimi yanaşanda onu digərlərindən fərqləndirən nədir?

- Azərbaycanda yaxşı klarnet ifaçıları çoxdur və bunu heç kim dana bilməz. Zövq məsələsi var. Mənə və mənim kimi də böyük bir kütləyə görə Zahid Sabirabadlı bir dənədir, ustaddır. 

- Konkret olaraq...

- İfalarını dinlədikdə nə ilə fərqləndiyini görmək olur. Zahid əziyyətli yolu rahat edib. Məsələn, biz "A" klarnetdə ifa edirik, o isə "sol" klarnetdə ifa edir.  Onun ifa etdiyi klarnet qarmondan, yəni ana kökdən bir ton bəmdir. Bizim ifa etdiyimiz isə qarmonla eyni kökdədir. Bizim ifa etdiyimiz klarnet daha rahatdır. O, bizim asan klarnetdə edə bilmədiklərimizdən artığını çətin klarnetdə edir. 2000-ci ilə qədər o da bizim indi ifa etdiyimiz klarnetlə çalıb. O çalğının qarşısına çıxa bilən varssa. desin ki, çıxıram. 

- Onun ifa etdiyiylə digər musiqiçilərin ifa etdiyi klarnetin çəkisində də fərq olmalıdır...

- Bəli, çəkisi artıqdır, barmaqlar aralı qalır, uzunluğuna görə daha çox nəfəsə ehtiyac var, kökləri başqadır. Zahid hər şeyi "qara pərdələr"də çalır. Bu faktlara əsasən deyirəm ki, o, bir nömrədir. Azərbaycan musiqisini yüksək səviyyədə ifa edir, türk musiqisini də heç də türkdən geri ifa etmir. Hind çalır, elə bilirsən ki, hind kinosuna baxırsan. Digər millətlərin klarnet ifaçıları ancaq öz musiqilərini mükəmməl ifa edə bilirlər. Türk gəlib Azərbaycan musiqisini ifa etsin. Edə bilməz. 

- İxtisasca inşaatçısan. Nəyə görə indiyə qədər musiqi təhsili də almamısan? Hər halda təhsil vacib faktordu.

- Valideynlərimin arzusunu yerinə yetirmək üçün ali təhsil aldım. Musiqiylə onsuz da məşğul oluram da. 

- Bir az da özündən danışaq. Özünü gənc ifaçılar arasında neçənci görürsən?

- Onu mən deyə bilmərəm. Yaxşı ifaçılar çoxdur. Zahid həmişə deyir ki, heç kimin ala bilmədiyi şey var ki onu sən almısan. Məsələn, onun ifa etdiyi səsi məndən başqa heç kim ala bilmir. Səsi tapmağın özü də böyük işdir. 

- Ustadını sənətdə yüz hesab etsək, onda sən neçə olursan?

- (düşünür) Mən onunla müqayisə oluna bilmərəm. Beş olsam böyük şeydir. 

- Bəs ondan sonra ən yaxşı hesab etdiyin ifaçı kimdir?

- İlkin Kamal Zahidə ən yaxın ifaçıdır. 

- Belə fikirlər var ki, hazırda Zahid Qubadlı və Zahid Sabirabadlı ən yaxşı iki klarnet ifaçılarıdır.

- Zahid Qubadlı da gözəl ifaçıdır. Bu yaxınlarda Rusiyada toyda idik. Onun da ifasına heç kim pis deyə bilməz. Klarnet sənətində ilk beşlikdə olan sənətkardı.

- Niyə bizdə gənc istedadların üz tutduğu ilk ünvan toyxana olur? Məsələn, özün də bu peşənin, sənətin təhsilini alıb səhnə ifaçısı ola bilərdin. Efirlərə də çıxmırsan, yaxud da bəlkə çağırmırlar. Daha çox sosial şəbəkələr vasitəsilə tanınırsan.

- Pul şirin şeydi. Aləti bir az öyrənəndən sonra pul haqda düşünürük.

- Bəlkə daha yaxşı öyrənsən, bundan da çox qazana bilərsən?

- Azərbaycan musiqiçilər toylarda tanınır da. Bəli, böyük musiqiçilərimiz də var. 

- Toylara solo ifaçı kimi gedirsən?

- Bəli, dinlədiyim elə janrdır ki, solo ifa etməliyəm. 

- Bəs çox zəif ansamblla eyni məclisə düşəndə ?

- Elə də olur. Yaxşı ifa həmişə alınmır. 

- İstərdim qonorarını da öyrənək. 

- Əgər Rusiyaya toya gediriksə, 1000-1500, Azərbaycanda isə 300-500 manata toya gedirəm.

- Kimlərlə eyni məclisə düşmək səninçün maraqlıdır?

- Sintezator ifaçısı Zaur Qəniyev var, onunla bir məclisə düşmüşdük, çox həzz aldım. Müğənnilərdən böyük sənətkar, əməkdar artist Ruhəngiz Allahverdiyevanın dəstəyini hər zaman hiss etmişəm. Onunla bir məclisə düşəndə həvəsim açılır. 

- Hansı bölgənin toylarında sənin ifanı daha yaxşı başa düşürlər?

- Sabirabad, Hacıqabul, Saatlı, Şirvan zonasında Zahid Sabirabadlı klarneti elə təmsil edib ki, hər kəs klarnetə düşürlər. Orada ifa etmək də maraqlıdır. Toyun axırına yaxın bir saat sadəcə musiqi dinləyirlər.

- Deyəsən sənə "Bala Zahid" deyirlər.

- Zahid özü məni "Kamilim, Kamilim" çağırır, musiqiçi dostlar isə "Bala Zahid" deyirlər. 

- Hətta saç düzümünü də ona oxşadırsan deyəsən.

- Əvvəldən saçım belə olub. O gün "Instagram"da bir xanım yazıb ki, siz Zahidin oğlusunuz? (gülür) Dedim ki, böyük qardaşımdır. Toyumu da o ifa edib. Hətta toyumun açılışında da sözü ona vermişdim. O da mikrofonu atama uzatdı ki ağsaqqal danışmalıdır. 

- Son zamanlar musiqiçilər deyirlər ki, oğluma müğənni qız almaram, qızımı musiqiçiyə ərə vermərəm. Toyxanalarda siz nə işlə məşğul olursunuz ki, haqqınızda belə fikirlər səsləndirilir?

- Deyirlər ki, qurunun oduna yaş da yanır.

- Sizin sahədə quru çoxdur, yoxsa yaş?

- Onu mən deyə bilmərəm.

- Məsələn, sən ailə quranda qız evinin tərəddüdü oldu?

- Xeyr. Dedilər ki, musiqiçidirsə lap əla. Qaynatam musiqi həvəskarıdır. 

- Toyxanalarda nə baş verir?

- Çox şey baş verir, amma bəzən də heç nə baş vermir.

- Çox şey baş verdiyi vəziyyətlə çox olur, yoxsa heç nə baş verməyən hallar?

- Çox şey baş verən hallar çox olur ki məsələ bu qədər aktuallaşır da. 

- Toya gənc xanım sənətçi gələndə oxumağından hiss edə bilirsənmi ki, bu "çox şey baş verəndən" sonra məclisə gəlib?

- (sualdan yayınmağa çalışır) Heç kim haqqında ön yarqılı davranmıram.

- Məsələn, oxuya bilmirsə, məclisə necə düşə bilər?

- Reklamı var, gəlib düşüb də.

- Bəlkə reklamı da yoxdur, administratorla dostdur?

- Bəlkə məclisdə kiminsə ondan xoşu gəlir. Onun da öz tamaşaçısı var.

- Sənətlə bağlı planlardan danışaq.

- Yeni musiqilər yazdıracağam. Dostumuz, müğənni Rza Zaman sadə, gözəl klip çəkdirib. O mahnını da mən ifa etmişəm.

- Bu yaxınlarda Nazənini müşayiət etdiyini gördüm. Əziyyət çəkmədin ki?

- Yox, yaxşı alındı.

- Nazənin necə oxuyur?

- Özüm kiməm ki kiminsə haqqında nəsə deyim? Məhz həmin ifası çox xoşuma gəldi. 

-Bəs digər ifaları?

- Göz önündədir də, nə oxuyursa, hit olur. Deməli. yaxşı oxuyur.

- Səncə sənət meyarı budur?

- Yox, bu sənət meyarı deyil. Amma bu dəqiqə sevilirsə, deməli, yaxşıdır da. 

İntiqam VALEHOĞLU
Ölkə.Az

ŞƏRH YAZ
1

İt əti yeyib xəstəxanaya düşdüm — Safiye Soymandan ŞOK ETİRAF

İt əti yeyib xəstəxanaya düşdüm
12:46
18.11.2017
998
Maqazin
A
Türkiyənin məşhur sənətçisi Safiye Soyman "Dünya Güzellerim" verilişinin çəkilişləri üçün Vyetnama səfər edib.

"Ölkə.Az" xəbər verir ki, müğənni səhvən it ətini toyuq əti zənn edərək yeyib.

Türkiyəyə qayıtdıqdan sonra Safiye baş verənləri etiraf edib: "Banu Alkan ilə yemək üçün bir restorana getdik. Restoranda bişirilən əti toyuq əti zənn etdik. Sən demə, it əti imiş. Bunu öyrəndikdən sonra halım pisləşdi, xəstəxanaya getdim".

Hikmət Həsənov
Ölkə.Az

ŞƏRH YAZ
0

"FETÖ"nun dinlədiyi insanlar arasında Tarkanın da adı var

16:21
17.11.2017
869
Maqazin
A
Siyasətdən idmana qədər bir çox insanı dinləyib şantaj edən "FETÖ" meqastar Tarkanı da dinləyib.

"Ölkə.Az" xəbər verir ki, iddianı "Posta" qəzetinin jurnalisti Candaş Tolqa İşıq səsləndirib.

Jurnalist yazıb: "Siyasətdən idmana, mətbuatdan sənət dünyasına qədər bir çox insan "FETÖ"nun çirkin əməliyyatlarının qurbanıdır. Bir neçə gün əvvəl öyrəndim ki, sevimli meqastar Tarkan da bu dinləmə əməliyyatının qurbanı olub".

İşıq yazısına belə davam edib: "Söhbət etdiyim yüksək rütbəli polis işçisi bildirdi ki, narkotiklərə qarşı mübarizə idarəsi bir şübhəli şəxsi narkotik maddəni kimdən və ya kimlərdən hansı yolla əldə etdiyini, kimə və ya kimlərə satdığını öyrənmək üçün dinləyər. Bu isə maksimum 3 ay davm edər. Bir insanı narkotik cinayət səbəbindən 15 ay dinləmək isə başqa məqsədlərdən xəbər verir. Adamın özəl həyatını öyrənib şantaj etmək və məlumatları fərqli məqsədlər üçün istifadə etmək bu məqsədlərdəndir".

Hikmət Həsənov
Ölkə.Az

ŞƏRH YAZ
0
BAĞLA