Rus kəşfiyyat arxivləri

“Ölkə.Az” bu gün bu kitabın maraqlı hissələri ilə oxucuları tanış edəcək.

Kitabda yer alan sənədlərin hər biri sensasiyadır. Məxfi sənədlərdə olan faktlar rəsmi tarixlə daban-dabana ziddiyət təşkil edir. Göstərilən faktlar kəşfiyyat hesabatlarından çox fantastika təsiri bağışlayır. Leonid sadəcə konspirologiya kimi qəbul edilən versiyaları sənədli şəkildə təsdiq edib.

Xüsusi xidmət orqanlarının arxiv sənədləri 1990-cı illərin əvvəlində İvaşovun əlinə keçir. Sovet İttifaqı dağıldıqdan sonra liberal demokratlar qızğın ehtirasla bütün sovet mirasını, eyni zamanda dövlət sirrlərini satmağa başladılar. Belə məqamların birində KGB-də işləyən dostlarından biri Leonidə zəng vuraraq təcili görüşmək istədiyini bildirir. Görüşdə ona bildirilir ki, Boris Yeltsinin təlimatı ilə gələn bir qrup şəxs arxivlərə girmək istəyir və materialların siyahısını istəyirlər. Siyahıda 1926-1929-cu illərdə Tibetə təşkil edilən Yakov Blyumkinin ekspedisiyası var idi. Eyni zamanda, digər qrup SSRİ KGB-sinin elmi-tədqiqat institutunda peyda olur. “Romb” adlı qrup almanların “Anenerbe” təşkilatının analoqu idi. Ümumiyyətlə, qonaqlar SSRİ dövründə mistika və ezoterikaya aid bütün araşdırmaları ələ keçirib aparmaq istəyirmişlər.

Şərəfli çekistlər gecədən səhərə qədər yuxarıda adı qeyd edilən sənədləri arxivdən çıxararaq adi qaraja yığırlar. Sənədlərin bir hissəsindən Leonid kitabında istifadə edib.

Sonradan məlum olub ki, bu qrup “Bnay-Brit” adlı qapalı yəhudi-mason təşkilatını təmsil edirmiş. Mixail Qorbaçovun qərarı ilə Moskvanın cənubi-qərbində bu təşkilata qərargah verilib. Arxivləri ələ keçirmək üçün isə Yeltsinin müşaviri general Dmitri Volkoqonov onları dəstəkləyib.

İvaşovun fikrinə görə, Yakov Blyumkinə yaranan maraq təsadüfi deyil. Yakov Blyumkin dahi olub və bəşəriyyətin ən gizli sirlərinə vaqif olub.

Blyumkin istedadlı çekist kimi Böyük Sovet Ensiklopediyasına cəlb edilir. Onun bütün rəsmi bioqrafiyası başdan-ayağa yalandır. Yazırlar ki, Blyumkin 2 il ərzində 5 ölkənin prezidenti olub. Prinsip olaraq bu mümkünsüzdür. Yaov yəhudi ailəsinin övladıdır. Çəkməçi atasi sol görüşlü eser olub və 3 minlik yəhudi dəstəsi üçün nəzərdə tutulan döyüşçü kimi yetişdirilib. Yaşa tezliklə Lev Trotskinin diqqətini cəlb edir. 1918-ci ildə Lev Trotski Yaşanı xüsusi dəstəyə cəlb edir. Bu səbəbdən Rusiyaya Tibetdən təşrif buyuran nümayəndə heyəti və Lama Feliks Dzerjinskiyə nümayəndə heyəti göndərməyi təklif edir. Bu nümayəndə heyəti bəşəriyyətin sirləri ilə tanış olacaqdı. Blyumkin Tibetə yola düşür.

Sovet İttifaqı dindən imtina etdiyi üçün Tibet onun timsalında müttəfiq görürdü. Ola bilər ki, bu şərtlər dostluq münasibətlərini qurmaq cəhdində həlledici rol oynamışdı.

Blyumkinə həqiqətən də Tibetdə çox şey göstərdilər. Moskvaya qayıtdıqdan sonra Yaşa Almaniya prezidenti Verner fon Ştilxe ilə əlaqə qurur və topladığı arxivi 2.5 milyon dollara ona satır. Blyumkin hər şeyi təhvil verdiyini deməmişdi. Bu səbəbdən almanlar düşünürdülər ki, arxivin böyük hissəsi Moskvada qalıb. Onlara isə sənədlərin bir hissəsi çatıb.

Bu qədər pul əldə edən Yakov Latın Amerikasına köçmək qərarına gəlir. O, işlədiyi qrupun üzvü Marqarita Polajeva ilə sevgi münasibəti qurur. Blyumkin bir çemodan pulu Marqaritaya göstərir və pal-paltar almaq üçün bir paçka dollar verir. Marqarita pulu dəyişmək istəyəndə həbs edilir və Blyumkini ələ verir.

Dindirilmə

Dindirilmə prosesində Blyumkinə çoxlu suallar verilir. Bu sual-cavabdan bəzilərini diqqətinizə çatdırırıq:

Sual:

-Tibetdə hansı silahla tanış oldunuz? Almanlara hansı silahı ötürdünüz? Bu nə silahdır? Onu ilk dəfə harada gördünüz? Bu silah nə işə yarayır?

Cavab:

-Məni yeraltı salona apardılar və bir neçə artefakt göstərdilər. Bu, Yer planetində eramızdan əvvəl 15-20 min il əvvələ aid Tanrıların silahları idi. Bu silahlar müxtəlif salonlarda saxlanılır. Silahların xarakteristikaları bunlardır:

1. Nəhəng kəlbətin “Vacaru”. Bu silahın köməyi ilə qiymətli metallar əridilir. Əgər qızılı Günəşin səthindəki temperaturda əritsək, qızıl 70 saniyə ərzində toza çevrilər. Bu tozdan hərəkət edən nəhəng daş platformaların tikintisində istifadə edilir. Əgər platformaya bu tozdan səpsək, onun çəkisi minimuma qədər yoxa çıxır.

2. Zınqırov- “Şu dzı” adlanır. Bu silahın köməyi ilə böyük bir ordunu müvəqqəti olaraq kor etmək mümkündür. Bu silah elektro maqnit dalğaların müəyyən tezlikdə transformasiyası sayəsində işləyir. Bu tezliyi insan qulağı qəbul etmir və beyinə işləyir. Bu çox qəribə silahdır. Onun köməyi ilə hindli peyğəmbər Arcuna böyük müharibələrdə qələbə qazanıb. Bu silah eramızdan əvvəl 8-10 min il əvvələ aiddir və Antarktidanın buzları altındakı yeraltı şəhərlərdə tapılıb. Bu ərazi qorunur. Onlar xüsusi, dairəvi formalı uçan aparatlarla hərəkət edirlər. Aparatlar bizə məlum olan təyyarə və aeroplanlara oxşamırlar. Onların texniki xarakteristikası barədə Ştilxeyə məlumat vermişəm.

Adolfun itmiş xayası

Almanlar əldə etdikləri sənədlərə çox diqqətlə yanaşdılar və yeni öyrəndikləri elmdən istifadə etməyi bacardılar. Sovet kəşfiyyatının hesabatlarına əsaslanan Leonid İvaşov sübut edir ki, 1945-ci ilin yazında Adolf Hitleri Berlində tapmayıblar. Fürer Antarktidanın Kraliça Mod Torpaqları rayonunda, buzların altındakı şəhərlərdə gizlənib.

Leonid yazır: “Qələbənin 35 illik yubileyi münasibətilə SSRİ hərbi qüvvələri muzeyinin direktoru məndən xahiş etdi ki, Dmitri Ustinova müraciət edim və Yeva Braunla Hitlerin kəllə sümüklərini nümayiş etdirməyə icazə alım. Bu sümüklər muzeyin zirzəmisində saxlanılırdı. Mən bu təklifdə qeyri-adi heç nə görmədim və Dmitri Fyodoroviçə müraciət etdim. Dmitri əvvəlcə susdu, sonra bir siqaret yandırıb dedi: “Nümayiş etdirməyəcəyik. Bu onların kəllə sümükləri deyil”. Mən fikrə getdim ki, yad sümükləri saxlamağın mənası nədir? Bəs Yeva və Adolfun kəllə sümükləri haradadır? Mən arxivi tədqiq edəndə bu suallara cavab tapdım”.

Sənədlərdən məlum olur ki, Hitlerin özünə qəsd etməsi barədə hesabat tələsik hazırlanıb. Hitlerin bunkerini ələ keçirən rus əkş-kəşfiyyatı və beşinci ordunun tibb işçiləri heç bir analiz aparmadan və dəqiq ekspertiza keçirmədən bu qənaətə gəliblər. Çünki hərbçilər Stalini sevindirməyə, şad xəbər verməyə tələsirdilər. İyun ayında sovet kəşfiyyatında məsələ ilə bağlı şübhələr ortaya çıxır. Yenidən istintaq aparmaq ehtiyacı yaranır. Məlum olur ki, diş və çənə sümüyü ilə bağlı çox qısa müddət Adolf Hitlerin yanında tibb bacısı işləyən qadının ifadələri əsas götürülüb. Çənə sümüyü təcili surətdə gizli laboratoriyaya aparılır və məlum olur ki, sümük saxtadır. Sonra isə Adolfun baş adyutantı bildirir ki, onun komandasını vağzal rayonuna Yeva Braun və Hitlerə bənzər adam meyiti axtarmağa göndəriblər. Məsələ bununla da üzə çıxdı və faktı ciddi araşdırmağa başladılar.

Yanmış kişi meyitinin ekspertizası məlum etdi ki, onun bir xayası var. Hitlerin şəxsi həkimi Verner Haazı dindirdilər. O, ifadə verdi ki, sonuncu dəfə 1945-ci ilin mart ayında Hitleri müayinə edib və Fürerin sağ böyrəyi soyuqlasa da, xayaları yerində olub. Kəşfiyyat artıq Üçüncü Reyxin sənədləri üzərində işləyirdi və Fürerin hara yoxa çıxdığını dəqiqləşdirirdi.

1938-1939-cu illər ərzində almanlarla işləyən kəşfiyyatçılar, əsasən də akademik Savelyev bildirir ki, Almaniyada Blyumkinin sənədləri ilə ciddi surətdə məşğul olublar. Sənədləri tədqiq edən almanlar Yerin daxili boşluğunu tapıblar. Burada həyat üçün şərait var və yeni Almaniyanın tikintisi gedir.

1939-cu ilin yanvar ayında “Şvabiya” gəmisi Antarktidanın tədqiqatı üçün yollanır. 1943-cü ildə Reyxin qross-admiralı Karl Dyönits bəyan edir: “Almaniya sualtı donanması dünyanın o başında Fürer üçün alınmaz qala inşa etdiyi üçün fəxr edə bilər”.

Görəsən belə bir bəyanat səsləndirən qross-admiral nəyi nəzərdə tuturdu? Karl həm də alman sualtı donanmasının rolunu qeyd edir, “Şvabiya” kimi nəqliyyat gəmilərindən danışmır.

Sovet hərbi kəşfiyyatı 1945-ci ildə yeni faktlar üzə çıxarır. Müharibə dövründə Almaniyada 150 ən yaxşı sualtı qayıqdan ibarət komanda qurulur. Komanda “Fürerin xüsusi konvoyu” adlanırdı. Onun missiyası Cənub dənizlərinə üzmək idi. Bu sualtı qayıqlar vasitəsilə yük və sərnişinlər Kraliça Mod Torpağına aparılır. 1945-ci ilin 11 iyun tarixində “SMERŞ” əks-kəşfiyyat idarəsinin əməkdaşları Almaniyanın hərbi dəniz qüvvələrinin baş qərargahında losman xəritələri tapırlar. Bu xəritələr ikinci qrupun sualtı qayıqlarının kapitanlarına nəzərdə tutulan dərinlikləri tapmaq üçün tərtib edilmişdi. Xəritələr 1944-cü ilin yanvar ayında “Daxu” hərbi əsir düşərgəsində çap edilib. Görünür xəritələrdəki xüsusilə məxfi məlumatlar olduğu üçün xəritəni tərtib edənlərin hamısı məhv edilir...

Xalqın ən yaxşı üzvləri

Hərbi kəşfiyyat idarəsi rəisinin 1945-ci ilin 5 sentyabr tarixində verdiyi məlumata əsasən, 1945-ci ilin iyun ayında, Fürerin xüsusi konvoyuna məxsus U-530 sualtı qayığı Argentina hərbçilərinə təslim olur. 17 avqust tarixində isə Cənub qütbündən qayıdan “U-977” sualtı qayığı Amerika eskadrası tərəfindən aşkar edilir. Qayığın ekipajı təslim olur. Sualtı qayığın kapitanı bildirir ki, 1944-cü ildən 1945-ci ilin may ayına qədər 14 dəfə səfərə çıxıb. Bu səfər ərzində Antarktidaya 260 sərnişin və minlərlə qutu yük daşınıb.

Sovet kəşfiyyatının məlumatına əsasən, Almaniyadan görkəmli alimlər və onların ailələri təxliyyə edilib. “U-530” sualtı qayığının kapitanı Otto Vermut bildirir ki, sonuncu dəfə o, Antarktidaya Adolf Hitlerin şəxsi əşyalarını və 150 qutu qiymətli əşya aparıb. Digər bir məlumata əsasən, “U-977” sualtı qayığının göyərtəsində Hitler özü olub.

Leonid bildirir ki, sonrakı illərə aid sənədləri görməyib. Amma Hitlerin 1964-cü ilə qədər Latın Amerikasında yaşadığı barədə faktlar var. Nasistlərin içinə sızdırılmış kəşfiyyatçı Yuriy Drozdov xatirələrində yazır ki, 1950-ci illərin əvvəlində Fürerə sədaqət andı içib.

Hitlerin qaçıb qurtulduğu sübut edildikdən sonra Mərkəzi Komitənin Siyasi Bürosu onu Latın Amerikasında axtarmaq barədə gizli sərəncam imzalayır. Antarktidada yeraltı Berlin variantı da nəzərdən keçirilir. 1945-ci ilin noyabr ayında SSRİ-yə məxsus 3 sualtı qayıq Kraliça Mod Torpağına doğru istiqamət götürür. Faşistlərin losman xəritələri üzrə hərəkət edən qayıqlar tapşırığı yerinə yetirə bilmirlər. Sualtı qayıqlara naməlum silahlarla hücum edildiyi üçün geri qayıtmaq əmri verilir.

1947-ci ildə amerikalılar da eyni marşrutla hərəkət edirlər. Kontr-admiral Riçard Berdin rəhbərlik etdiyi güclü eskadra məhv edilir. Uçan boşqablar iki esminesi batırır, təyyarə daşıyanı ciddi zədələyir və bir neçə təyyarəni məhv edirlər.

KGB sənədlərinə əsasən, almanlar həqiqətən də uçan boşqabların istehsalı ilə məşğul olublar. Hətta Kursk savaşında da bu uçan aparatlardan istifadə etmək nəzərdə tutulsa da, layihə hələ uğursuz idi. Görəsən yeraltı dünyaya girişi kim qoruyur? Həqiqətən də Antarktidanın buzları altında qədim sivilizasiyanın qalıqları yaşayır? Doğrudanmı onlar faşistləri qonaq kimi qəbul ediblər? Bu barədə isə məxfi arxivlər hələ də susur...

Hikmət
Ölkə.Az