Rusiya açıq şəkildə ya İraq hökumətinə, yaxud da kürdlərə dəstək verməlidir

“Ölkə.Az” xəbər verir ki, Lavrov, Şimali İraqın müstəqillik iddiasını mərkəzi hökumətlə həll etməsi lazım olduğunu bildirib. Bununla yanaşı rusiyalı diplomat bildirib ki, Rusiya həm Şimali İraq, həm də İraqın mərkəzi hökuməti ilə bütün iqtisadi münasibətlərinə davam edəcək. Lavrov digər tərəfdən qeyd edib ki, Rusiya Ərbildəki konsulluğunu bağlamayacaq və bu diplomatik korpus Bağdaddakı səfirliyə bağlı olacaq.

Azərbaycanlı siyasətçilər isə məsələyə birmənalı yanaşmırlar. Politoloq Fikrət Sadıqov “Ölkə.Az”a açıqlamasında bildirib ki, bu açıqlama Rusiyanın tarixi siyasət kursunu dəyişmədiyinin göstəricisidir. Onun sözlərinə görə, yaxın günlərdə məsələ ilə bağlı Rusiyanın konkret mövqeyi bəlli olacaq.

“Reallıq budur ki, ruslar uzun illərdir kürdlərə dəstək verirlər. Türkiyədəki PKK terrorçularına da dəstək veriblər. Lakin bu ikili yanaşma çox davam edə bilməz. Rusiya açıq şəkildə ya İraq hökumətinə, yaxud da kürdlərə dəstək verməlidir. İraqın xarici işlər naziri Lavrovla görüşəcək. Görüş Moskvada baş tutmalıdır. Düşünürəm ki, İbrahim əl-Cəfəri bununla bağlı etirazını bildirəcək. İraq hökuməti Rusiya ilə bu sahədə razılığa gəlməyəcək. Ruslar İraqla münasibətləri yaxşılaşdırmaq istəyirlərsə, kürdlərə münasibətləri dəyişməlidirlər. Şimali İraqda yerləşən Kürdüstana dəstək verməməlidirlər. Bu məsələyə ikili yanaşma tamamilə yolverilməzdir”, - deyə F.Sadıqov bildirib.

Politoloq Zərdüşt Əlizadə isə “Ölkə.Az”a açıqlamasında bildirib ki, məsələnin kökündə İraq hökumətinin səriştəsizliyi durur. Onun fikrincə, onlar nə qədər bu siyasəti dəyişməyiblər, proses kürdlərin xeyrinə işləyəcək.

“Gerçəklik ondan ibarətdir ki, İraq hökuməti Şimali İraqa nəzarət edə bilmir. Əgər onlar problemi həll etmək istəyirlərsə, mütləq bölgəyə nəzarəti gücləndirməlidirlər. Əgər bunu bacarmırlarsa, beynəlxalq aləmdən nəsə gözləməyə dəyməz. Yəni zaman keçdikcə, Kürdüstan münasibətləri də quracaq”, - deyə Z.Əlizadə bildirib.

Ziya Səccad
Ölkə.Az