"Rusiya Ermənistanın ağzından elə vurur ki, səsləri də çıxmır" — Politoloq rəyi

16:15
14.09.2017
204
Siyasət
A
Ermənistan mediası yenidən Rusiyanı Azərbaycana silah satdığına görə hədəfə alıb.

Ermənistan tərəfi Rusiyanın Azərbaycana silah satmasını pisləyərək, Rusiyanın İrəvandakı səfiri İvan Volınkinə çoxlu sayda suallar ünvanlayıb. Səfir isə qarşılığında sərt cavablar verib.

Erməni tərəfi İsrailin Azərbaycana silah satmasına mane olmaq üçün isə İsrail mediasında dezinformasiyalar yaymaqla məşğuldur.

Politoloq Elxan Şahinoğlu ermənilərin Azərbaycana silah satılması ilə bağlı atdığı addımları, Zakir Həsənovun İsrailə səfərini və bu məsəldə İran amilinin nəzərə alınmasını Ölkə.Az-a şərh edib:

"Erməni siyasətçiləri, başda prezident olmaqla, mətbuatın Rusiyanın Azərbaycana silah satmasına görə rəsmi Moskvaya irad tutmasının heç bir məntiqi əsası yoxdur. Əgər Rusiya Azərbaycana silah verib, Ermənistana verməsəydi onda haray-həşir qaldırmaq üçün ermənilərin əlində əsas ola bilərdi.

Rusiya Ermənistana silahı nəinki satır, pulsuz peşkəş verir. Rusiyanın da məntiqi odur ki, sənə silah verirəm, üstəgə 200 milyon dollarlıq kredit də verirəm, özünə silah al. Buna görə də, mənim haqqımdır ki, istənilən ölkəyə, hətta səninlə düşmən olan ölkəyə silah satım. Ermənistanın bu tələbləri məntiqsizdir. Ancaq hər dəfə bunu gündəmə gətirməyə çalışırlar. Rusiya isə Ermənistanın ağzından elə vurur ki, səsləri də çıxmır. Rusiyanın hərbi bazaları Ermənistandadır, Ermənistanın Türkiyə və İranla sərhədlərini Rusiya qoruyur, fabrik və zavodlar da Rusiyanın əlindədir. Faktiki olaraq Ermənistan Rusiyanın quberniyasıdır. Quberniya, "for post" olan ölkə isə ağasına dil uzadanda onu kəsərlər. Necə ki, Rusiya Ermənistanın zaman-zaman dilini kəsir. Ona görə də, Rusiyanın siyasətinin dəyişəcəyini gözləmirəm.

O başqa məsələdir ki, Rusiya Dağlıq Qarabağ münaqişəsinin ədalətli həllində maraqlı deyil, bu mənada münaqişənin həllini sürətləndirmir, bu isə Azərbaycanda haqlı narazılıqlara səbəb olur".

Azərbaycan müdafiə naziri Zakir Həsənovun İsrailə səfəri ilə bağlı isə politoloq bunları dedi:

"Zakir Həsənovun səfəri çox uğurlu alındı. Çünki bu vaxta qədər İsrail rəsmiləri - prezidenti, baş naziri, xarici işlər naziri daim Azərbaycana gəlirdilər. Azərbaycan isə cənub qonşusunu qıcıqlandırmamaq üçün İsrailə rəsmi səfərlər reallaşdırmazdı. Ancaq İsraillə Azərbaycan arasında əməkdaşlıq o səviyyədədir ki, hər halda belə bir rəsmi səfər həyata keçirilməlidir".

Bu səfərin müdafiə naziri səviyyəsində olmasına gəldikdə isə Elxan Şahinoğlu bildirdi ki, münasibətlərdə iki ölkə arasında hərbi əməkdaşlıq daha ağırdır:

"Bu istiqamətdə Azərbaycan İsraildən 5 milyard dollar civarında silah alıb. Ona görə də, Zakir Həsənovun İsrailə getməsi obyektiv zərurətdən yaranmışdı".

İranın bu səfərdə diqqətə alınması məsələsinə gəldikdə isə, politoloq qeyd etdi ki, dövlət başçısı İlham Əliyev Astanada İran prezidenti Həsən Ruhani ilə görüşüb və Ruhaninin Azərbaycana edəcəyi səfərinin müzakirəsi gedən gün Azərbaycan prezidenti müdafiə nazirini İsrailə səfərə göndərdi:

"Bu o deməkdir ki, rəsmi Bakı elan etdiyi balanslaşdırılmış xarici siyasəti həyata keçirir. Azərbaycan istəyir ki, İranla da, İsraillə də münasibətləri yaxşı olsun. İranla münasiblərimiz İsrailə qarşı deyil, İsraillə olan münasibətlərimiz də İrana qarşı deyil. Bunu İranın anlaması lazımdır. Azərbaycan İsraildən aldığı silahları işğalçıya təzyiqi artırmaq üçün istifadə edir. Bunu İranda başa düşməlidirlər. Ötən ilin aprel ayındakı müharibədə İsrail silahları Azərbaycanın işinə çox yaradı.

Bundan başqa, erməni lobbisi Azərbaycan-İsrail münasibətlərini pozmaq üçün İsrail mətbuatına dezinformasiya ötürməklə məşğuldur. Guya israilli mütəxəssisləri Azərbaycanda məcbur ediblər ki, həmin silahlardan Qarabağda istifadə etsinlər. Bunlar hamısı dezinformasiyadır. Bu dezinformasiyaların qarşısını almaq üçün mütləq Zakir Həsənovun İsrailə səfəri reallaşmalı idi və bu səfər çox uğurlu oldu. Yaxın gələcəkdə İsraildən modern silahlar alacağıq".

Səxavət Məmməd
Ölkə.Az

ŞƏRH YAZ
0

Dilqəm Əsgərov və Şahbaz Quliyev xarici mətbuatda

Dilqəm Əsgərov və Şahbaz Quliyev xarici mətbuatda
15:32
Bu gün
49
Siyasət
A
Azərbaycanın Ermənistan tərəfindən işğal edilmiş Kəlbəcər rayonunda öz doğma torpaqlarını və valideynlərinin məzarlarını ziyarət etmiş azərbaycanlı mülki şəxslər Dilqəm Əsgərov və Şahbaz Quliyevin girov götürülməsinin, Həsən Həsənovun isə qətlə yetirilməsinin 4-cü ildönümü ilə əlaqədar Serbiyanın nüfuzlu KİV-dən olan “Danas” qəzetində “Azərbaycan Əsgərov və Quliyev üçün azadlıq axtarışında” və “BALKANİN” informasiya saytında “Azərbaycan mülki şəxsləri dörd il sonra” başlıqlı məqalələr dərc edilib.

"Ölkə.Az" APA-ya istinadən xəbər verir ki, Azərbaycanın Serbiyadakı səfirliyindən verilən məlumata görə, beynəlxalq ictimaiyyət tərəfindən tanınmayan qondarma rejimin Ermənistan tərəfindən “Dağlıq Qarabağ Respublikası” adlandırıldığı qeyd edilərək, bu qurumun Ermənistanın göstərişi və nəzarəti altında olduğu bildirilir.

Məqalələrdə vurğulanır ki, D.Əsgərov və Ş.Quliyevin qanunsuz həbsdən əvvəlki və sonrakı   görüntüləri onların erməni girovluğunda qeyri-insani rəftara məruz qaldığını açıq şəkildə sübut edir. Daha sonra  girov götürülməsini qadağan edən və hərbi münaqişələr zamanı mülki şəxslərə humanist davranış tələb edən 1949-cu il Cenevrə Konvensiyalarının müddəalarına zidd olaraq, Ermənistan tərəfinin Azərbaycanın humanitar hüquq normalarına əməl olunmasına və mülki şəxslərin azad edilməsinə dair çağırışlarına məhəl qoymadığı ifadə edilir. Eyni zamanda Ermənistanın bu qeyri-humanist və qeyri-konstruktiv mövqeyinin münaqişənin sülh və danışıqlar yolu ilə həllini daha da çətinləşdirdiyi vurğulanır.  Məqalələrdə, Ermənistanın Azərbaycana qarşı hərbi təcavüzünün nəticələri barədə geniş məlumat verilib, beynəlxalq ictimaiyyətin çağırışlarına, beynəlxalq qurumlar tərəfindən qəbul edilmiş sənədlərə, o cümlədən BMT Təhlükəsizlik Şurasının qətnamələrinə məhəl qoymadığı nəzərə çatdırılıb.

ŞƏRH YAZ
0

XİN: “İlk növbədə Ermənistanın Azərbaycana qarşı işğalı aradan qaldırılmalıdır”

XİN: “İlk növbədə Ermənistanın Azərbaycana qarşı işğalı aradan qaldırılmalıdır”
15:30
Bu gün
39
Siyasət
A
"Ermənistanın baş naziri Nikol Paşinyan keçirdiyi mətbuat konfransında belə bir iddia irəli sürüb ki, Azərbaycan Dağlıq Qarabağ münaqişəsinin həlli ilə bağlı güzəştləri barədə məlumat versin. Sonra Emənistan öz güzəştləri barədə məlumat verə bilər. Paşinyanın diqqətinə çatdırmaq istərdik ki, Ermənistan tərəfindən işğala məruz qalmasına baxmayaraq, Azərbaycanın 25 ildən artıq Ermənistanla danışıqları davam etdirməsi ölkəmizin ən böyük güzəştidir".

"Ölkə.Az" xəbər verir ki, bunu Azərbaycan Xarici İşlər Nazirliyinin Mətbuat Xidmətinin rəhbəri Hikmət Hacıyev bu gün keçirdiyi mətbuat konfransında deyib. 

XİN rəsmisi vurğulayıb ki, ilk növbədə Ermənistanın Azərbaycana qarşı işğalı aradan qaldırılmalıdır:
 "Münaqişənin siyasi həllinə nail olmaq üçün işğal ləğv olunmalı və status-kvo dəyişməlidir. Ermənistan münaqişənin həllində maraqlıdırsa, işğal faktını aradan qaldırmalı və BMT-nin münaqişə ilə bağlı qətnamələrinə əməl etməlidir. Yalnız bu əsasla münaqişənin həlli üçün əlverişli mühit əldə edə bilərik".

ŞƏRH YAZ
0
BAĞLA