Rusiya ilə ABŞ arasında GİZLİ MÜHARİBƏ

“Ölkə.Az” xəbər verir ki, Rusiya Müdafiə Nazirliyi ABŞ-ı İŞİD terrorçularını dəstəkləməkdə günahlandırır. Nazirlikdən bildirilib ki, Amerika İŞİD-i nəinki dəstəkləyir, hətta onlarla əməkdaşlıq da edir. Buna sübut kimi Rusiya Amerikanın Suriyadan gedən silahlıların bombalamaqdan imtina etməsini göstərib.

Rusiya iddia edir ki, həmin silahlılar İŞİD terror təşkilatının üzvləridir. Onlar məhz Amerika hərbçilərinin dəstəyilə ərazini tərk ediblər. Rusiya ərazini tərk edərkən çəkilən fotonu da sübut kimi yayıb. Foto dumanlı çəkilsə də, görüntülərdən silahlı insanları görmək olur.

Amerika isə məsələyə dərhal münasibət bildirib. ABŞ-ın rəhbərlik etdiyi koalisiyanın nümayəndəsi polkovnik Rayan Dillon Bağdadda keçirdiyi mətbuat konfransında Rusiya Müdafiə Nazirliyinin koalisiyanın İŞİD-lə əməkdaşlıq etməsilə bağlı ittihamları əsassız adlandırıb. Onun sözlərinə görə, Moskva Rusiyanın Suriyada üzləşdiyi çağırışlardan diqqəti yayındırmaq məqsədi ilə bu cür ittihamlar səsləndirir.   
 
“ABŞ-ın İŞİD terrorçuları ilə əməkdaşlıq etməsilə bağlı səslənən fikirlər tamamilə səhvdir. Bəzi yayılan şəkillərin video oyunlardan götürülməsi barədə xəbərlərdən məlumatlıyam”, - deyə Dillon bildirib.   

Ziya Səccad
Ölkə.Az