Rusiya və Türkiyənin bu dəfəki Suriya toplantısı da nəticəsiz qalacaq
Bu barədə politoloq Elxan Şahinoğlu Ölkə.Az-a açıqlamasında bildirib. Onun sözlərinə görə, Türkiyə üçün Rusiyanın Suriyada silahlı kürdlərə dəstək verməsi gözlənilməz oldu.
“Türklər elə fikirləşirdilər ki, Rusiya silahli kürdlərə dəstək verməz. Lakin bunun əksinə olaraq, Rusiya onlarla da təməs qurdu. Bu Türkiyəni narahat edir. Türkiyə və Rusiyanın xarici işlər nazirliyinin nümayəndələrinin 29 mart tarixindəki Moskva görüşündə bu məsələ müzakirə olunacaq”, - deyə Elxan Şahinoğlu bildirib.
Politoloq düşünür ki, bu görüşün də heç bir nəticəsi olmayacaq:
“Rusiya və İran B.Əsəd rejimini dəstəkləyir. Silahlı müxalifəti isə qərb dünyası, ərəb dünyası və Türkiyə dəstəkləyir. Ona görə Suriyada atəşkəsin uzunömürlü olacağına şübhə edirəm. Bundan başqa, ABŞ bu görüşə də qatılmır. Super dövlət danışıqlara qatılmırsa, deməli, Amerikanın Suriyada öz oyunları var”.
Qeyd edək ki, Türkiyə və Rusiyanın xarici işlər nazirliyinin nümayəndələri 29 mart tarixində Moskvaya toplaşacaqlar. Təcili toplantının mövzusu Suriya məsələsidir.
Görüş 29 mart tarixində Rusiya xarici işlər nazirliyində baş tutacaq. Müzakirə edilən əsas mövzu Suriyada davam edən vətəndaş müharibəsidir. Eyni zamanda rəsmi Ankara Afrindəki rus hərbi kontingentini və Moskvanın PYD ilə əməkdaşlığını da müzakirə edəcək.
Rus və türk nümayəndə heyəti eyni zamanda Suriyadakı siyasi keçid prosesini də müzakirə edəcək.
Ziya Səccad
Ölkə.Az