Rusiyada etirazlar arta bilər
Bu barədə politoloq Elxan Şahinoğlu Ölkə.Az-a açıqlamasında bildirib. Onun sözlərinə görə, Rusiya parlamentində yer alan müxalifət faktiki olaraq Putin və Medvedyevin siyasətinə şərikdirlər.
“Rusiyada fəaliyyət gösatərən Rusiya Liberal Demokratlar Partiyasının sədri Vladimir Jirinovski və Komminist Partiyasının rəhbəri Gennadi Züqanov Vladimir Putinin siyasətini dəstəkləyir. Bir də var ki, sistemdən kənar müxalifət. Hansı ki, parlamentdə təmsil olunmayıb, amma ara-sıra etirazlarını bildirirlər. Rusiyanın əsas müxalifət lideri Aleksey Navalnı sayılır. O sosial şəbəkələr vasitəsilə öz tərəfdarlarını fəallaşdırmağa çalışır. Bir müddət öncə də açıqlama vermişdi ki, prezidentliyə namizəd olacaq”, - deyə Elxan Şahinoğlu bildirib.
Siyasətçi deyir ki, Rusiya hakimiyyəti əslində bu qədər insanın küçəyə çıxacağını gözləmirdi:
“Düşünürəm ki, bu dalğa müəyyən qədər getdikcə arta bilər. Çünki Rusiyada iqtisadi vəziyyət ağırlaşır. Bu sanksiyalar Rusiyanı taqətdən salır. Bu Rusiya hakimiyyətinə ciddi siqnaldı. Amma bundan çıxış edərək, Rusiyada böyük bir inqilabın baş verəcəyini, rəngli inqilab, “Ərəb bahar”larının təkrarlanacağını düşünmürəm. Unutmayaq ki, Putinin Rusiyada reytinqi çox yüksəkdir. Sabah o mitinq çağırsa, yüz minlərlə insan meydana axışacaq. Buna rəğmən, düşünürəm ki, iqtisadi vəziyyət ağırlaşdıqca insanların hakimiyyətdən narazılığı da artacaq. Bu narazılığı müxtəlif formada bildirməyə çalışacaq”.
Ziya Səccad
Ölkə.Az
