Rusiyanın ədliyyə nazirliyi: \"Lapşin müraciət etsə, Rusiyaya təhvil məsələsi ilə məşğul ola bilərik\"
"Ölkə.Az" xəbər verir ki, əgər Lapşin müraciət etsə, Rusiyanın ədliyyə nazirliyi 3 il müddətinə həbs edilmiş bloqerin təhvil verilməsi məsələsi ilə məşğul ola bilər.
Nazirliyin məlumatında deyilir ki, Azərbaycan Respublikasının məhkəməsinin qərarı qüvvəyə mindikdən sonra Rusiya vətəndaşının vəsatəti əsasında, Rusiya ədliyyə nazirliyi 1998-ci ildə bağlanmış konvensiyaya uyğun olaraq bloqerin təhvil verilməsi proseduruna başlaya bilər.
Qeyd edək ki, Lapşin 2016-cı ildə Minskdə Azərbaycan tərəfinin tələbi ilə saxlanılıb. Bloqer rəsmi Bakının icazəsi olmadan qondarma Dağlıq Qarabağ respublikasına səfər edib. Həftənin cümə axşamı günü isə Azərbaycan məhkəməsi İsrail və Rusiya vətəndaşı olan Lapşini 3 il müddətinə azadlıqdan məhrum edib.
Rusiya Ədliyyə Nazirliyi qeyd edir ki, Konvensiyaya əsasən, məhkum edilənin özü, yaxın qohumları, qanuni nümayəndəsi və vəkili istər Rusiya, istərsə də Azərbaycanın Ədliyyə Nazirliyinə müvafiq müraciət edə bilər. Məhkumun digər ölkəyə verilməsi üçün onun şəxsi razılığı və hökmün qüvvəyə minməsi əsas şərtlər arasındadır.
Hikmət Həsənov
Ölkə.Az
