Rusiyanın məqsədi Ermənistanı daha da borca soxmaqdır

Rusiyanın məqsədi Ermənistanı daha da borca soxmaqdır
00:55
13.10.2017
804
Analitika
A
Rusiya və Ermənistan arasında silah üçün ayrılan kredit məsələsində daha bir müqavilə imzalana bilər.

“Ölkə.Az” xəbər verir ki, erməni ordusunun müasir silahlarla və hərbi avadanlıqlarla təchiz edilməsi üçün Rusiya 100 milyon dollar dövlət ixrac krediti verəcək. Müqavilənin imzalanması məsələsi isə Ermənistanda bu gün keçirilməsi planlaşdırılan hökumət iclasında müzakirə ediləcək. Əgər müqavilə imzalansa, Rusiya Ermənistana 100 milyon dollarlıq krediti 20 il müddətinə verəcək. Kreditin 5 ilinin illik 3 faiz dərəcəsi ilə güzəştli olması nəzərdə tutulub.

Qeyd edək ki, iki il əvvəl, yəni 2015-ci ildə də Rusiya Ermənistana silah almaq üçün 200 milyon dollarlıq kredit vermişdi. Bu həmin dövrdə də böyük müzakirələrə səbəb olmuşdu. Rusiyanın Ermənistana məhz hərbi sahədə diqqət ayırması Azərbaycan cəmiyyətində xoş qarşılanmır. Bir çoxu düşünür ki, bu gedişat ölkəmizin ziyanına işləyir. Bəziləri isə Ermənistanın silahlandırılmasının birbaşa Dağlıq Qarabağ münaqişəsində ermənilərin üstünlük əldə etməsi üçün bir imkan olduğunu düşünür.

Azərbaycanlı siyasətçilər isə məsələyə birmənalı yanaşmırlar. Politoloq İlqar Altay “Ölkə.Az”a açıqlamasında bildirib ki, Rusiyanın ermənilərə silahla bağlı yardımı birbaşa olaraq Azərbaycanın ziyanınadır. Onun fikrincə, Rusiya bu addımlarla regionda gərginlik yaratmaq istəyir.

“Sovet İttifaqı dağılandan sonra onun tərkibindəki dövlətlər müstəqillik əldə etdilər. Bu dövrdən 25 il keçir və bu illər ərzində Ermənistanın fəaliyyətini nəzərdə keçirtsək görərik ki, onlar ancaq separatçı addımlar, terror və ölkə daxilindəki çəkişmələrlə yadda qalıblar. Ermənistanda nə insan potensialı, nə maddi resurslar, nə də iqtisadi sahədə inkişaf var. Belə hesab etmək olar ki, Ermənistan sivil inkişaf mövqeyində durmayan və müharibə şəraitində gərginlik yaradan bir dövlətdir. Ermənistana ərzaq baxımından hansısa yardımlar edilə bilər. Əhali acından qırılmasın deyə, bu yardımların edilməsində qəbahət yoxdur. Lakin onlara 100 milyon kredit verib, erməniləri hərbi cəhətdən gücləndirmək, terrorçu dövlətə dəstək olmaq deməkdir. Hazırda İŞİD terror təşkilatına yardım edilərsə, nə nəticə verəcək? Ermənistana da yardımlar bu nəticəni verər. Qonşularla dostluq münasibətlərini qoruyan dövlətə yardım edilə bilər. Hesab edirəm ki, Rusiya mütəmadi olaraq Ermənistana kömək etməkdə maraqlıdır. Ermənistan həmişə Rusiyaya sadiq qul kimi xidmət edir. Regionda Rusiyanın istəklərini yerinə yetirir”, - deyə İ.Altay bildirib.

Politoloq, millət vəkili Araz Əlizadə “Ölkə.Az”a bildirib ki, burada Rusiya təkcə öz maraqlarını güdür. Onun sözlərinə görə, Rusiyanın məqsədi Ermənistanı daha da borca soxmaqdır.

“Burada ayrı məqsəd yoxdur. Ermənistan vaxtilə Rusiyadan külli miqdarda borc götürdü və borcu qaytara bilmədi. Bu səbəbdən də, sənayesinin 90 faizdən çoxunu Rusiyaya verdi. İndi də orada qalan sahələri Rusiya əldə etmək istəyir. Bu səbəbdən də, Ermənistana şirikləndirici təkliflər edərək, onları borclu etmək istəyir”, - deyə A.Əlizadə vurğulayıb.

Deputatın fikrincə, bu məsələdə Azərbaycana təzyiqlərlə bağlı səsləndirilən fikirlər əsassızdır: “Azərbaycan müharibə aparmaq istəsə, bunun üçün lazımı qədər silahı var. Təkcə Rusiyadan alınan silahla Azərbaycan Ordusunun qarşısını almaq mümkün olmaz”.

Politoloq, millət vəkili Zahid Oruc “Ölkə.Az”a bildirib ki, bu addımla Rusiya Qafqazda öz dayaqlarını möhkəmlətmək istəyir. Deputatın fikrincə, bundan Azərbaycanın ehtiyatlanmağına əsas yoxdur:

“Aprel döyüşlərindən sonra regionda hərbi konteksdə bir neçə hadisə baş verdi. İlk növbədə Ermənistana 200 milyon dollar həcmində kreditin verilməsi məsələsi gündəmə gəldi. Sonradan həmin pulların hansı formada verildiyi açıqlanmadığından, belə fikirləşmək olar ki, söhbət Gümrüdəki hərbi bazaya Rusiya tərəfindən gətirilən müxtəlif texnika, aparıcı silahlar, xüsusilə də, “İskəndər” raket kompleksinin yerləşməsindən gedir. Həqiqətən də bu məbləğ maliyyə şəklində gerçəkləşməyib. Natural formada texnika və silah şəkildə göstərilib. Bununla da, Rusiya əslində öz dayaqlarını möhkəmləndirib.

Rusiyanın Ermənistanla hava məkanının təhlükəsizliyinin birləşdirilməsi və iki dövlət arasında hərbi birləşmənin yaradılması məsələsi durur. Bundan sonra erməni cəmiyyətində böyük etirazlar yarandı. Bu addım nəqliyyatın və iqtisadiyyatın Rusiyaya verilməsindən sonra ordunun da ruslara təhvil verilməsi kimi göstərilirdi. İndi 100 milyon dollar məsələsinin gündəmə çıxması Rusiyanın bu regionda öz mövqeylərini daha da möhkəmlətmək cəhdidir. Bu qətiyyən Ermənistanın Azərbaycanla ayaqlaşdırmaq və hərbi balans yaratmaq naminə görülən iş kimi qiymətləndirilməməlidir. Düşünürəm ki, bu məsələlərlə bağlı nəticə çıxartmaq istəyənlər özlərini bu nöqtəyə yönəltsinlər ki, Gürcüstanda NATO-nun dayaqları möhkəmlənməkdədir. O cümlədən, Yaxın Şərqdə böyük hərbi proseslərdə iştirak edən Türkiyə, həm də Qafqazda əlaqələrini artırır. Xüsusilə Azərbaycanda və Naxçıvanda möhkəmlənməyə çalışır. Belə olan halda, Rusiya da Cənubda öz tədbirlərini gücləndirir. Qazaxıstan və Belarusdan sonra üçüncü ölkə Ermənistan oldu ki, burada hava hücumundan müdafiə sistemlərilə bağlı qərarlar verildi. Yəni bu, Rusiyanın Qafqazda hərbi cəhətdən öz üstünlüyünü qorumaq istəyidir. Bu gedişat Azərbaycanın maraqlarına qarşı yönəlməyib”.

Ziya Səccad
Ölkə.Az

 

ŞƏRH YAZ
0

Sabah dollar neçəyə olacaq?

Sabah dollar neçəyə  olacaq?
17:14
10.09.2018
347
Analitika
A
Sentyabrın 11-nə manatın məzənnəsi açıqlanıb.

Mərkəzi Bankdan "Ölkə.Az"a verilən məlumata görə, 11.09.2018-ci il tarixindən etibarən rəsmi məzənnə 1 ABŞ dollarına nisbətdə 1,7000 manat səviyyəsində müəyyən olunub.

Qeyd edək ki, 2018-ci il sentyabrın 10-da da USD/AZN rəsmi məzənnəsi 1,7000 manat təşkil edib.

ŞƏRH YAZ
0

Ötən gecə cəbhə

Ötən gecə cəbhə
09:38
07.09.2018
349
Analitika
A
Ermənistan silahlı qüvvələrinin bölmələri cəbhənin müxtəlif istiqamətlərində sutka ərzində atəşkəs rejimini 91 dəfə pozub.

Bu barədə "Ölkə.Az"a Azərbaycan Müdafiə Nazirliyinin mətbuat xidmətindən məlumat verilib.

Ermənistan Respublikası Noyemberyan rayonunun Şavarşavan kəndində, İcevan rayonunun Ayqeovit kəndində və adsız yüksəkliklərdə yerləşən mövqelərdən Qazax rayonunun Quşçu Ayrım, Cəfərli, Bala Cəfərli kəndlərində, Berd rayonunun Çinari kəndində yerləşən mövqelərdən Tovuz rayonunun Koxanəbi, Əsrik Cırdaxan kəndlərində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonunun Zamanlı kəndində və adsız yüksəkliklərdə yerləşən mövqelərimiz atəşə tutulub.

Tərtər rayonunun işğal altında olan Göyarx, Çiləbürt, Ağdam rayonunun Nəmirli, Qaraqaşlı, Seyidli, Sarıcalı, Yusifcanlı, Xocavənd rayonunun Kuropatkino, Füzuli rayonunun Aşağı Veysəlli, Qobu Dilağarda, Qərvənd, Qaraxanbəyli, Qorqan, Kürdlər, Horadiz, Cəbrayıl rayonunun Nüzgar kəndləri yaxınlığında, həmçinin Goranboy, Tərtər, Xocavənd və Cəbrayıl rayonları ərazisindəki adsız yüksəkliklərdə yerləşən mövqelərdən də Azərbaycan ordusunun mövqeləri atəşə tutulub.

ŞƏRH YAZ
0
BAĞLA