İş adamının 70 min dollarını apardılar
“Ölkə.Az”ın məlumatına görə, Alməmmədov Mehman Allahverdi oğlu Binəqədi RPİ-nə başına gələn cinayətlə bağlı məlumat verib. Belə ki, M.Alməmmədovu tanımadığı şəxs Nərimanov rayonu, Atatürk prospekti 2-də “Tofaş” markalı avtomobilinə mindirərək Binəqədi rayonu, 7-ci mikrarayona aparıb. Sonra isə Mehman Alməmmədovu hədələyərək əlindəki 70 min dollar pulunu alaraq aradan çıxıb.
Faktla bağlı Binəqədi RPİ-nin İstintaq Şöbəsində cinayət məcəlləsinin 181-ci (quldurluq) maddəsi ilə cinayət işi başlanıb, zərərçəkmişin ifadəsi alınıb.
Qeyd edək ki, M. Alməmmədovun başına oxşar cinayət 2015-ci ildə də gəlib və həmin vaxt məhz M.Alməmmədova polis bölməsindən çıxıb getməsinə kömək etdiyinə görə polis nəfəri daxili işlər orqanlarından xaric edilib. Belə ki, həmin vaxt Sumqayıt şəhər Polis İdarəsinin, Sumqayıt ŞPİ-nin təhqiqat şöbəsində aparılan təhqiqat araşdırması zamanı məlum olmuşdur ki, 14.12.2015-ci il tarixdə Alməmmədov Mehman Allahverdi oğlu “LimanGO-57” Məhdud Məsuliyyətli Cəmiyyətinin və “Fəza 48” Məhdud Məsuliyyətli Cəmiyyətinin direktorudur. O, “Azərpoçt”nun Sumqayıt filialından Dadaşov Elxan Rəsul oğluna çatacaq 40700 manat pulu aldıqdan sonra, həmin yerə “Mercedes” markalı avtomaşınla gələn iki nəfər polis əməkdaşı Mehmana yaxınlaşaraq, onun DİN-in “102” xidmətinə müraciət etməsi ilə bağlı avtomaşınlarına əyləşdirib Sumqayıt ŞPİ-nin 4-cü PB-nə aparmışlar. Bundan sonra, Mehman üzərində olan 40700 manat pulla bölmədən çıxıb getmişdir. Sumqayıt ŞPİ XTB-nin polis nəfəri, Zahidov Azad Zakir oğlu və Sumqayıt ŞPİ XTB-keçmiş polis nəfəri Zeynalov Şahin Şəfəq oğlu şəxsi maraqlarından irəli gələrək, 14.12.2015-ci il tarixdə Sumqayıt şəhəri 5-ci məhəllə ərazisində yerləşən poçtdan 40700 manat pul götürən Alməmmədov Mehman Allahverdi oğlunu, aralarında olan pul məsələlərinə görə təqib edən iki nəfərdən yayındırmaq məqsədilə, əvvəlcədən planlaşdırdıqları kimi, Sumqayıt ŞPİ-nin 4-cü PB-nə aparmışlar. Bölmədə A.Zahidov və Ş.Zeynalov həmin bölmənin sürücü-polis nəfəri Cavadov Nazim Xalıq oğlu ilə Mehman Alməmmədovun bölmənin arxa qapısından çıxarılaraq yola salınmasını razılaşdırıb bölməni tərk etmişlər. Bundan sonra, 4-cü PB-nin sürücü-polis nəfəri N.X.Cavadov şəxsi maraqlarından irəli gələrək, Mehman Alməmmədovu bölmənin qarşısında gözləyən həmin iki şəxsdən yayındıraraq, onu bölmənin arxa qapısından yola salmışdır. Qeyd olunan xüsusatlar Sumqayıt şəhər Polis İdarəsinin təşkilati-inspektor qrupunda aparılmış xidməti yoxlama zamanı toplanmış izahatlarla təsdiq olunur. Həmin vaxt Sumqayıt ŞPİ 4-cü PB-nin sürücü-polis nəfəri, polis serjantı Cavadov Nazim Xalıq oğlu barəsində ciddi intizam tənbehi tətbiq edilməsi təklif edilmişdir. Sumqayıt şəhər Polis İdarəsinin 17 dekabr 2015-ci il tarixli əmri ilə Cavadov Nazim Xalıq oğlu “Azərbaycan Respublikasının daxili işlər orqanlarında xidmət keçmə haqqında Əsasnamə”nin 135-ci maddəsinin 9-cu bəndinə əsasən daxili işlər orqanlarında xidmətdən xaric edilmişdir.
Ölkə.Az
