Sabiq polis əməkdaşı olan dələduz oğul və ananın qızıl biznesi

Sabiq polis əməkdaşı olan dələduz oğul və ananın qızıl biznesi
15:40
17.04.2018
1002
Hadisə
A
Dələduzluqda təqsirləndirilərək həbs edilən sabiq polis əməkdaşı Şaiq Qurbanov və anası Almaz Qurbanova Ali Məhkəməyə müraciət ediblər. Onlar 9 nəfər qızıl alverçisindən külli miqdarda qızıl alıb pulu ödəməməklə dələduzluq etməkdə ittiham ediliblər.

“Ölkə.Az”ın məlumatına görə, bu gün hakim Gülzar Rzayevanın sədrliyi ilə məhkəmə prosesi keçiriləcək. 

İttihama görə, 1969-cu il təvəllüdlü Almaz Qurbanova və onun oğlunun əməllərindən vətəndaşlar Gülbəniz Səttərova 22.820 manat, Səidə Yusifova 11.300 manat, Rəhilə Rəsulova 33.787 manat, Əntiqə Əsədova 38.949 manat, Elyanə Məmmədova 1130 manat, Sevda Seyfəliyeva 3.500 manat, Minayə Rəhimova 5.500 manat, Gülər Rəhimova isə 13.500 manat dəyərində zərər çəkib.

Ş.Qurbanov Suraxanı rayon Mühafizə Polisinin əməkdaşı olub. Anasının və özünün əməllərindən sonra daxili işlər orqanlarından xaric edilib.

Bakı Ağır Cinayətlər Məhkəməsinin hökmü ilə A. Qurbanova 9 il müddətinə azadlıqdan məhrum edilib. Ş.Qurbanov isə 7 il müddətinə azadlıqdan məhrum edilib və istintaq dövründə azadlıqda olduğu üçün məhkəmə zalında həbs edilib.

Nizami rayonunda yerləşən “Lotos” ticarət mərkəzində qızıl-zinət əşyalarının satışı ilə məşğul olan Əntiqə Əsədova dələduzluqda təqsirləndirilən Almaz Qurbanova ilə iş yoldaşlarından birinin vasitəsi ilə tanış olduğunu deyib. Almaz Qurbanovaya bir neçə dəfə qızıl-zinət əşyaları satan Əntiqə Əsədova axırda bu əməlinə görə peşman olub.

“Almaz məndən əvvəlcə iki dəst qızıl aldı. Pulunu da nağd ödədi. Bir müddət alver elədi. Sonra gəlib nisyə mal istədi. Mən tanımadığım adama nisyə mal vermədiyimi dedim. Mağazadan əl çəkmirdi. Hər gün gəlirdi, nisyə mal istəyirdi. Çoxlu müştərilərinin olduğunu, malı satan kimi pulunu verəcəyini deyirdi. Almazdan ailəsinin olub-olmadığını soruşdum. Dedim heç olmasa mal verəcəmsə, kim olduğunu, harada yaşadığını öyrənim. Dedi ki, əri hərbçidir, oğlu isə polisdə işləyir. Heç olmasa oğlunu gətirməyini istədim. Bir gün məni ticarət mərkəzinin qabağına çağırdı. Bir maşına oturduq. Şövqi gəlmişdi. Polisdə işlədiyini dedi. Şövqiyə anası ilə belə bir iş görəcəyimizi, ona mal verəcəyimi dedim. Bu söhbətdən sonra şəxsiyyət vəsiqəsi ilə Almaza nisyə mal verdim. Qızılı satdı gətirib pulunu verirdi. Bir gün dedi ki, rayona gedir, Moskavadan çoxlu qohumları gələcək. Onlara satmaq üçün məndən çoxlu qızıl istədi.

Əvvəlcə razılaşmadım. Sonra dedi ki, bu qədər müştərini əldən vermək olmaz. Razılaşdıq, amma qızılların pulunu rayondan gələn kimi verəcəkdi. Rayondan qayıdanda mağazaya gəldi. Pulu istəyəndə dedi ki, qohumları Moskavaya gedəndən sonra pulu göndərəcəklər. Əvvəl narazılığımı bildirsəm də, sonradan məcbur razılaşdım. Çünki artıq malları vermişdim. Məndən aldığı qızıllara görə 16 min 500 manat borcu var idi”, - deyə zərərçəkmiş ifadəsində göstərib.

Verdiyi qızılların pulunu ala bilməyən Ə.Əsədova rayona gedərkən mağazada olan qızı da Almaz Qurbanovanın toruna düşüb. 

Ə.Əsədova deyir ki, mağazada olmadığı vaxt A.Qurbanova onun qızından da nisyə mal götürüb:
 “Almaz pulu verməmişdi. Mən rayonda olanda mağazaya gəlib, qızımdan nisyə mal istəyib. Qızım da bunu tanıyırdı. Əvvəl mal vermək istəməyib. Ancaq əl çəkməyib. Deyib ki, “anan gələnə qədər satıb pulunu gətirəcəm”. Mən rayonda olanda birdən ağlıma gəldi ki, qızıma zəng edib tapşırım ki, Almaz gəlsə, ona nisyə mal verməsin. Sən demə artıq gec imiş. Bakıya qayıdanda qızım ağladı ki, Almaz götürdüyü qızılların pulunu vermir. Əsəbləşdim.

Almaza zəng edib qışqırdım, dedim sən mənimlə şəriksən ki, bu qədər malı niyə götürmüsən? Dedi gətirib pulunu verəcəm”.

Qızıl alverçisi bunlar azmış kimi Almaz Qurbanovaya əlavə olaraq da qızıl verib.

“Almaz yenə gəldi ki, bəs bankdan pul götürür. Bunun üçün də məndən qızıl istədi.

Götürdüyü qızılları bankda göstərib, alverçi olduğunu deyəcəkdi, buna görə də ona kredit ayrılacaqdı. Razılaşmadım. Sonra oğlu Şaiq gəldi ki, 200 qram qızıl verim ki, bankdan 65 min manat götürüb, mənim borcumu qaytarsınlar. Çox israr etdi, şəxsiyyət vəsiqəsini, xidməti vəsiqəsini mağazada qoydu. Ona 200 qrama qədər qızıl verdim. Amma nə bankdan pul götürdülər, nə də qızıllarımı qaytardılar. Başıma açmadıqları oyun qalmayıb. Xəstəlik tapmışam. Əsəblərim pozulub. İşdə hər kəs, rəhbərlik belə mənim başıma açılan oyunlardan xəbərdardır. Dəfələrlə əsəbləşib telefonumu yerə çırpmışam. Məni neçə dəfə aldadıb ki, metronun çıxışına gəlim pulumu verəcək. Elə vaxt olub ki, 5 saat metronun çıxışında onu gözləmişəm”, - Almaz Qurbanova ifadəsində bildirib.

ŞƏRH YAZ
0

Bakıda maşının üstünə nəcis dolu torba atdılar — VİDEO

Bakıda maşının üstünə nəcis dolu torba atdılar
16:48
Bu gün
197
Hadisə
A
Bakıda hündürmərtəbəli binadan atılan tullantılarla dolu torba vətəndaşlardan birinin avtomobilini yararsız hala salıb.

"Ölkə.Az" Oxu.Az-a istinadən xəbər verir ki, hadisə Bakının Nəsimi rayonu, Cavadxan küçəsi 31c ünvanında baş verib.

Hündürmərtəbəli binanın həyətində avtomobilini saxlayan şəxs bir müddət sonra dəhşətli görüntü ilə qarşılaşıb. Belə ki, maşının üzərinə içərisində nəcis olan qum torbası atılıb. Nəticədə, maşının arxa şüşəsini sınaraq yararsız hala düşüb.

Qum torbasını kimin atdığı bəlli olmasa da, ilkin ehtimallara görə, bunu binada yaşayan sakinlərdən biri edib. Sürücü hadisəni və maşının vəziyyətini videoya çəkərək sosial şəbəkədə paylaşıb. Xoşbəxtlikdən hadisə baş verın zaman avtomobilin içərisində heç kim olmayıb. 

Ölkə.Az

ŞƏRH YAZ
0

Maşınını parçalayıb satdı — Polisə şikayət etdi

Maşınını parçalayıb satdı
16:08
Bu gün
488
Hadisə
A
Maşın qaçırılmayıb, hissələrə bölünüb satılıb.

Daxili İşlər Nazirliyindən "Ölkə.Az"a  verilən məlumata görə, Ağsu Rayon Polis Şöbəsinə müraciət edən Abbasxanlı kənd sakini Vüqar Əsədov dekabrın 7-nə keçən gecə kənd ərazisindən “VAZ-21074” markalı avtomobilinin qaçırıldığını bildirib.

Məlumatla əlaqədar dərhal polis əməkdaşları tərəfindən əməliyyat tədbirlərinə başlanılıb. Araşdırmalar zamanı V.Əsədovun polisə yalan məlumat verdiyi müəyyən edilib. Belə ki, onun qeyd edilən avtomobili Garıs-Əyribənd kənd sakini R.Dəmirovun həyətində hissələrə doğrayaraq satması, habelə polisə yalan məlumat verməsi müəyyən edilib.

Əməliyyat-axtarış tədbirləri ilə qeyd edilən avtomobilin ban nömrəsi və dövlət qeydiyyat nişanları polis əməkdaşları tərəfindən R.Dəmirovun həyətindən aşkar edilərək götürülüb.

Araşdırma aparılır.

Ölkə.Az

ŞƏRH YAZ
0
BAĞLA