Şahin Sultanovun barəsindəki hökmdən prokurorun verdiyi şikayətə baxıldı

"Ölkə.Az" xəbər verir ki, vəkil Telman Abdıyevin APA-ya verdiyi məlumata görə, ötən həftə hakim Elbəy Allahverdiyevin sədrliyi ilə iclas keçirilib və prokurorun protest vermə müddəti bərpa edilib.
 
Qeyd edək ki, bir müddət əvvəl Bakı Apellyasiya Məhkəməsində Ş. Sultanov və digərlərin şikayəti üzrə məhkəmə iclası başlayıb. İclasda hakim bildirib ki, prokuror Bakı Hərbi Məhkəməsinin hökmündən apellyasiya protesti verib və Bakı Hərbi Məhkəməsinin hakimi Həbib Həsənov işin yenidən Bakı Hərbi Məhkəməsinə qaytarılması üçün müraciət edib.  Ş. Sultanov buna etiraz etsə də, hakimlər kollegiyası müraciəti təmin edib və iş baxılması üçün yenidən Bakı Hərbi Məhkəməsinə qaytarılıb.
 
Qeyd edək ki, Bakı Hərbi Məhkəməsinin hökmü ilə Şahin Sultanov 8 il 6 ay müddətinə azadlıqdan məhrum edilib. Onun cəzası 3 il sınaq müddəti olmaqla şərti hesab olunub.
 
Digər təqsirləndirilənlər Qalib Hacıyev 2 il sınaq müddəti təyin edilməklə 5 il şərti cəzaya məhkum edilib. Həbsdə olan Kazım Əsgərova da şərti cəza verilib. O, məhkəmə zalından azadlığa buraxılıb. Kamandar Paşayev, Vüqar Hacıyev, Əziz Xıdırov da şərti cəzaya məhkum edilərək, həbsdən azad ediliblər.
 
Ş. Sultanov Cinayət Məcəlləsinin 313-cü (vəzifə saxtakarlığı) və 179.3.2-ci (mənimsəmə - külli miqdarda törədildikdə) maddələri ilə təqsirləndirilib.