Şantaj edilən qadın özünü öldürdü

Gəncə şəhərində qadını intihar həddinə çatdırmaqda, hədə-qorxu ilə pul tələb etməkdə, dələduzluqda, quldurluqda təqsirləndirilən Allahverdi Nuriddinoğlunun cinayət işi üzrə ibtidai istintaq başa çatıb.

"Ölkə.Az" xəbər verir ki, cinayət işinin materialları baxılması üçün Gəncə Ağır Cinayətlər Məhkəməsinə göndərilib.

Cinayət işi hakim Dadaş İmanovun icraatına verilib.

Qeyd edək ki, hadisə bu il Gəncə şəhərində baş verib. X.Əliyeva (adı şərtidir) adlı qadın intihar edib. Hadisə ilə bağlı polis əməkdaşları tərəfindən araşdırmalara başlanılıb.

Araşdırmalar zamanı qadının Allahverdi Nuriddinoğlu tərəfindən uzun müddət şantaj edildiyi məlum olub.

Keçirilən əməliyyat tədbirləri nəticəsində Allahverdi Nuriddinoğlu saxlanılıb və barəsində həbs qətimkan tədbiri seçilib.

A. Nuriddinoğlu Cinayət Məcəlləsinin 125-ci (özünün öldürmə həddinə çatdırma), 182.2.4-cü (hədə-qorxu ilə tələb etmə - xeyli miqdarda əmlak əldə etmək məqsədi ilə törədildikdə), 178.1-ci (dələduzluq) və 181.2.2-ci (quldurluq - təkrar törədildikdə) maddəsi ilə ittiham verilib.

Natiq Allahverdiyev
Ölkə.Az