S.Cəlaloğlu: “Müxalifət fəaliyyətini iqtidarı tənqid üzərində qurması yanlış düşüncədir”

 Bunu “Ölkə.Az” a açıqlamasında ADP sədri Sərdar Cəlaloğlu iqtidar müxalifət münasibətlərini şərh edərkən deyib.

Onun sözlərinə görə,  müxalifət fəaliyyətini ancaq iqtidarı tənqid üzərində qurduğundan  ciddi əməkdaşlıq münasibətləri qurula bilmir. “Nə qədər ki, müxalifət fəaliyyətini iqtidarı tənqid  və onun qüsurları üzərində quracaqsa  o zaman müxalifət missiyasını uğurla icra edə bilməyəcək. İqtidarı təkcə müxalifət deyil, cəmiyyətin bütün təbəqləri, hətta hakimiyyətdə təmsil olunan müəyyən qruplar da tənqid edə bilər və biz bunun şahidi oluruq. Odur ki,  müxalifət fəaliyyətinə yeni baxışlar tələb edir. Əgər müxalifət fəaliyyətini   tənqidçilik üzərində davam etdirəcəksə, 30 ildir davam edən uğursuzluq sonsuzluğadək davam edəcək. Ona görə də hesab edirəm ki, yeni yanaşmalar olmalıdır.  Müxalifət  ortaya alternativ fikirlər qoymaqla fəaliyyət göstərməlidir. Müxalifətin cəmiyyətin ən müxtəlif sahələrinin inkişafı,  mövcud problemlərin həlli ilə bağlı təklif və layihələrlə çıxış etməlidir. Ortaya proqramlar qoymalıdır.  Bizim Azərbaycan müxalifətinin çatışmayan cəhəti bax, budur. Azərbaycan müxalifətinin fəaliyyət düsturu bundan ibarətdir; iqtidarı tənqid bərabərdir müxalifətçiliyə… Tənqiddən asan nə var ki?... Ha tənqid et. Ortaya  alternativ qoya bilməyəcəksənsə,  nəticə olmayacaq. Bax bu düşüncəsində görə də  Azərbaycan müxalifəti 30 ildir uğur qazana bilmir”- S. Cəlaloğlu qeyd edib.

ADP sədri hesab edir ki, mən bu gün iqtidarı koronavirusla apardığı mübarizədə fəaliyyətini tənqid edirəmsə, mütləq öz təkliflərimı də verməliyəm, çıxış yolunu göstərməliyəm: “Amma Azərbaycan müxalifəti hesab edir ki, təkliflər verərəmsə, hakimiyyət onu  nəzərə ala bilər və daha uzun müddət hakimiyyətdə qala bilər. Axı, bir siyasətçinin məqsədi nədir?! Xalqının yaxşı yaşaması deyilmi? Dövlətinin inkişafı, güclü, qüdrətli olması deyilmi? Yoxsa hansısa qüvvənin hakimiyyətdə olması…Siyasətçi üçün bunu kimin keçirməsi yox,  bu ideyaların reallaşmasıdır. Bu gün bizim əsas  niyyətimiz nədir ki? İnsanlarımızın rifah halında yaşaması, ölkəmizin sosial-iqtisadi cəhətdən inkişf etməsi, işğal altında olan torpaqlaırna işğaldan azad edilməsi.. Bunu Prezident İlham Əliyev reallaşdıracaqsa, bunu ancaq alqışlamaq olar. Əsas odur ki, bu ideyalar reallaşsın.  Siyasətçi üçün kimin hakimiyyət olmasının nə əhəmiyyəti var. Bax  bəzi müxalifət  nümayənədlərinin belə korporativ maraqlarının nəticəsidir ki, 30 ildir normal iqtidar-müxalifət münasibətləri qurula bilmir. Burada təbii ki, iqtidarına da müəyəyn səhvləri var”.

Mürtəza
Ölkə.Az