Şəhanə Yusifova: “Gələcək həyat yoldaşımın xəyanətinə görə ailəmi dağıtmaram” — MÜSAHİBƏ

Şəhanə Yusifova: “Gələcək həyat yoldaşımın xəyanətinə görə ailəmi dağıtmaram”
11:44
06.07.2018
7852
Maqazin
A
"Ölkə.Az" saytının növbəti qonağı aktrisa-aparıcı Şəhanə Yusifovadır.

Müsahibədə göstərdiyi dəstək üçün “Nizami Restaurant & Lounge”-ə təşəkkürümüzü bildiririk.

- Şəhanə xanım, artıq sizi uzun zamandır filmlərdən, seriallardan tanıyırıq. Amma ilk baxışdan qapalı bir insana bənzəyirsiniz. Bu, nə ilə əlaqədardır?

- Mən universitetdə oxuyanda müəllimim deyirdi ki, çalışın, sizi efirdən tanısınlar, sevsinlər. Şəxsi həyatınızla gündəmə gəlməyin. Hər dəvət olunan yerə getsəniz, çox görünsəniz, adiləşəcəksiniz. O ki qaldı qapalı olmağıma, mən qalmaqaldan uzaq biriyəm. İllərdir tanıdığım dostlarım var ki, onlarla rahatlıqla dərdimi bölüşə bilərəm. Həmin dostlarım incəsənət sahəsində çalışan insanlar deyil. İllərin dostuyuq. Bir sözlə, bəlli bir çevrəm var ki, o çevrəyə dost anlamında illərlə tanıdığım dostlarım daxildir ancaq. 

- Niyə hələ də ailə qurmursunuz?

- Ailə məni üçün çox müqəddəs və ali bir dəyərdir. Ailə qurmaq xatirinə ərə getmək istəmirəm. Gərək birini möhkəm sevim ki, ona sahib çıxmaq istəyim. Ən əsas cütlüklərin bir-birini anlamasıdır. Bu mərhələni keçən iki gəncə zaval yoxdur.

- Şans verdiyiniz bir insan olubmu?

- Əlbəttə, olub. Amma mən ilk baxışdan sevdim demirəm heç vaxt. İnşallah, bir gün əsl sevgini tapacağıma inanıram. 

- Daha kəskin, daha ciddi davam edən nədir?

- Mənim məqsədim. Məsələn, mən bizim gözəl sənətkarımız Həmidə Ömərovanın sənətinin vurğunuyam. Onunla gözəl dostluq münasibətimiz də var. Deməyim odur ki, mənim üçün sənətdən qabaq insanlıq, xanımlıq gəlir. Mənim sənətim xanımlığımdan başlayır. 

- Amma bəzi xanımlar xanımlıqla aktrisalığı qarışdırırlar və bəzən xanımlıqlarını sənətə qurban verirlər...

- Bəli, elələri də var. Amma hansı sənətdə olursansa, ol, sənin xasiyyətin sənin sənətinə bir rəng qatacaq və o zaman sənin necə bir insan olduğun bəlli olacaq. Mən hər şeyə reaksiya verməyi xoşlamıram. 

- Sizcə, indi gənc aktirsalar arasında olan boşluq nədir?

- Bəzi aktrisaların hər yerə qaçmasını, hər təklif olunan filmə çəkilməsini boşluq hesab edirəm. Düşünürəm ki, zirvədə qalmaq üçün heç də hər olunan təklifi dəyərləndirmək vacib şərt deyil.

- Lakin bəzən teatrda az məvacib alan aktrisalar təklif olunan layihələrdə az qonorar müqabilində çəkilməyə razı olurlar...

- Sizin dediyinizdə də bir həqiqət var. Amma mənim teatrda işləyən gözəl sənət yoldaşlarım var. Bildiyimə görə, onlar hər filmdə çəkilmirlər. Seçim edirlər. Ən azından öz simalarını itirməməyə, qorumağa çalışırlar. 

- Bəs özünüz niyə teatrda çalışmırsınız?

- Əslində universiteti bitirən kimi teatrlardan təkliflər aldım. Lakin həmin ərəfədə müqavilə ilə kanalda çalışırdım. İndi də təkliflər var. Yeni mövsümdən etibarən teatrların birində açlışmağı düşünürəm.. 

- Tərəzinin gözündə ağır gələn nədir?

- Dürüstlük və mərdlik.

- Nə üçün bizim tamaşaçılar daha çox xarici seriallara, daha çox türklərə baxırlar. Nə üçün onlarda film sektoru inkişaf edib, bizdə isə yox. Bir sözlə, niyə o “əjdaha”dan bizdə yoxdur?

 

- Bizdə də potensiallı aktyor və aktrisalar var. Amma nəsə çatışmır. Fikrimcə, 10 ildən sonra biz 100 faiz olmasa da, 80 faiz türklərə çatacağıq.

- “A” nöqtəsindən “B” nöqtəsinə gələnə qədər nəsə problem yaşadınızmı?

- Mən həmişə qalmaqaldan uzaq olmuşam . Öz sənətimlə, işimlə gümdəmə gəlməyi üstün tutmuşam. Məsələn, aktrisaların müğənnilərlə etdikləri qalmaqallar mənə çatmır. Heç kimlə problemim olmayıb. Olsa da, sözümü özünə deyərəm, daha ictimailəşdirmərəm. 

- Cəsarətli geyimlərinizlə zaman-zaman çoxlarının tənqid atəşinə tuş gəlirsiniz. Buna münasibətiniz necədir?

- Mən gündəlik qısa geyimlərdən istifadə etmirəm. Çünki özümü narahat hiss edirəm. Amma hansısa bir layihə üçün qısa geyinmək lazım gələrsə, geyinirəm. Çünki işimi gözəl və sağlam təqdim etmək istəyirəm. Bu zaman içim rahat olur. 

- Qolunuzdakı döyməni çoxdan döydürmüsünüz?

- Bəli, universitet vaxtı qrup yoldaşımla qərara gəldik ki, döymə döydürək. Amma bu döymə sonralar seriallara çəkilən zaman mənim üçün problemlər yaratdı. Düzdür, qrimlə üstünü örtmək olur, amma döymə elə bir şeydir ki, insan nə zamansa ondan bezə bilər. 

- Sizi nə üzə bilər?

- Ailəmə qarşı olan haqsızlıq məni çox incidə bilər. Çünk ailəmə qarşı çox həssasam. 

- İndiyə qədər sizə əl qaldıran olubmu?

- Xeyr olmayıb, inşallah ki, bundan sonra da olmaz. Özümü ağıllı aparsam (gülür).

- Boğazınızda sümük kimi ilişib qalan nədir ki, onu nə uda bilirsiniz, nə də çıxarda?

- Atamın qəfildən xəstəliyə tutulub rəhmətə getməsi məni şoka salmışdı. Onun ölümünü həzm edə bilmirdim. Sonradan anladım ki, insan zaman keçdikcə daha da təmkinli olmalıdır. Təsəvvür edin ki, atamın qırxı çıxmamış tamaşa oynadım. Buna məcbur idim. O ərəfədə mənə ən çox mənəvi dəstək verən sənət müəllimim Zemfira Nərimanova oldu. Qəribədir, insan yaxınını itirəndə ətrafdakıların verdiyi təsəlli onu ayaqda saxlaya bilir.

- Atanızı daha çox hansı məqamlarda xatırlayırsınız?

- Hər gün axşam azanını eşidəndə atamla olan söhbətlərimiz gözümün önünə gəlir. Nəinki azan eşidəndə, ümumiyyətlə, dünyanın harasında oluramsa olum, Günəş qürub edəndə, şər qarışanda yadıma atam düşür. Bu, məndə artıq refleksə çevrilib. 

- Dilinizin bəlasına düşmüsünüzmü?

- Mən həmişə demişəm ki, Allah adamın ağlını başından almasın. Hər atdığım addımda özümdən qabaq anamı düşünürəm. Onunla harasa gedəndə deyirlər ki, sənin necə də təmkinli anan var? Mən də çalışıram ki, onun həmin xüsusiyyətlərini mənimsəyim. 

- Dartdığınız arabanın ipi harada qırıldı?

- Sənətimlə şəxsi həyatımı eyni anda aparadığım zaman. Bir insanla sevgili idim. Münasibətimiz ailə qurmağa doğru gedirdi. Amma ayrıldıq. Baş tutmadı.

- Niyə ayrıldınız?

- O zaman yaşım az idi. Sonradan anladım ki, ailə qurmağa hazır deyiləm. Həm də o ərəfədə seriallara çəkilirdim. O insanla düşməncəsinə yox, dostcasına ayrıldıq. Özünə də dedim ki, mən sənin xoşbəxtliyini arzulayıram. 

- Ehtirasdan yaranan hislərin qurbanı olmusunuzmu?

- Olmamışam, amma heç vaxt da olmaram demirəm. Çünki insan elə bir varlıqdır ki, hər zaman hər şeyi edə bilər. 

- Kişi xəyanətini bağışlayarsınızmı?

- Əgər uşağım varsa, yoldaşımın bir-iki günlük “xəyanət”inə görə ailəmi heç vaxt dağıtmaram. 

- Əldən-ələ nə keçdi?

- Düşünürəm ki, insanın sirri əldən-ələ keçə bilər. Bu baxımdan, insan gərək öz sirrini heç kimə verməsin.

- Ruhunuz tam azaddırmı?

- Hələ ki, ruhum özümdədir. Amma zənnimcə, elə sevəcəm ki, onda ruhum göylərdə olacaq (gülür).

- Azərbaycan xanımlarında bəyənmədiyiniz xüsusiyyət hansıdır?

- Bizim xanımların çoxunda acıq çıxmaq hissi var. Ən sevmədiyim xüsusiyyətdir. Bu baxımdan, mən çox səbrli bir insanam. 

- İçki içirsinizmi?

- Aludəçisi deyiləm, maksimum bir qədəh şərab...

- Onu əvəz edirmi?

- Gərək beynindən siləsən, içməklə unutmaq olmaz (gülürük).

- Bəsirət gözünüz açıq olsa idi, görmək istədiyiniz nə olardı?

- Mənə ziyan vura biləcək hər şeyi öncədən görmək istərdim.

- Sizə nə veriblər, ala bilmirlər?

- Elə bilirlər ki, mən özümdənrazı biriyəm. Bir də ki, məncə, mən tez gözə gəlirəm. 

- Mən onda anladım ki,.. Bu ifadənin ardını özünüz tamamlayın, zəhmət olmasa.

- Mən onda anladım ki, həyat gözəldir, arzularımdan arzular doğur və onda anladım ki, mənim gələcəyim hələ qabaqdadır.

Söhbətləşdi: Niyam Şirinov, Cavidan Abdullayev
Foto: Anar Qasımov

ŞƏRH YAZ
0

Kıvanç Tatlıtuğ Bred Pitin saatından aldı — FOTO

Kıvanç Tatlıtuğ Bred Pitin saatından aldı
11:33
Bu gün
374
Maqazin
A
Türkiyənin məşhur aktyoru Kıvanç Tatlıtuğ yeni serial ilə ekranlara qayıdır.

“Ölkə.Az” xəbər verir ki, Tatlıtuğ reklam çəkilişlərindən qazandığı pulu saat kolleksiyasına qoyub. Məşhur aktyor 400 min lirə ödəyərək (105 min manat) yeni saat alıb. Bu saatdan Bred Pitt, Ceyson Stethem və Kərim Benzemada da var.

Kıvanç jurnalistlərin “Qocalmaqdan qorxursunuzmu?” sualına “Xeyir, qorxmuram. Yaşlanmaq gözəldir” cavabını verib.

Yeni bir serial ilə ekranlara qayıdacağını bildirən aktyor deyib:

“Bir az stresliyəm. Bir serial layihəmiz var. Yeni bir xarakter yaradanda çox stresli oluram. Yuxum qaçır. Yuxusuz gecələrim başlayır”.

Hikmət Həsənov
Ölkə.Az

ŞƏRH YAZ
0

"Özümü şahzadə kimi hiss edirdim" — Oksana Rəsulova

01:17
Bu gün
1353
Maqazin
A
"Ölkə.Az" kaspi.az-a istinadən müsahibəni təqdim edir.

- Oksana Rəsulova gözəlliyini nəyə borcludur?

 - Özümü gözəl hesab etmirəm. Çünki həyatda məndən də gözəl xanımlar var. Mən ki, gözəl deyiləm... O ki qaldı sualınıza, xarici görünüşümü öncə Allaha, daha sonra valideynlərimə borcluyam. Valideynlərim çox yaraşıqlıdır.
 
 - Gözəl, cazibədar və baxımlı olmağın avantajları nələrdir?
 
- İnsan simasının gözəl olmasını istəyirsə, ilk növbədə daxilini təmizləməlidir. Daxilində olan paxıllığı, pis niyyətliliyi təmizləsə, bu onun simasına da yansıyacaq. Mənim üçün ilk növbədə xarici görünüş deyil, insanın daxili gözəlliyi önəmlidir. Hər bir qadın özünə baxmalı və baxımlı olmalıdır. Bəzən deyirlər ki, filankəsin imkanı var deyə gözəldir. Mən bu fikirlərlə razı deyiləm. Gözəllik pula baxmır. Elə ucuz vasitələr var ki, onlarla da istədiyiniz nəticəni əldə edə bilərsiniz. Hər kəs öz cibinə görə özünə baxmalıdır.

- Uzun müddətdir ki, sizi tanıyırıq və hər zaman efirdə, gündəmdə, mediada sizi fit, formada, baxımlı görürük. Bunlara necə nail ola bilirsiniz? Və rəqsin bu işdə hansı rolu var? 
 
- Əlbəttə ki, rəqs insanı hər zaman cavan göstərir. Rəqslə sağlam olmaq və istədiyin bədən formasında qalmaqda mümkündür. Ancaq mən fiquramı qorumaq üçün fitnesə gedirdim. Hazırda fasilə vermişəm. Bir neçə aydan sonra yenidən fitneslə məşğul olacağam. Onu da deyim ki, indiyə qədər heç bir dietadan istifadə etməmişəm. Dieta saxlamamışam. Hər bir insanın bədən forması onun genindən asılıdır. Bizim ümumiyyətlə nəslimizdə kök insan olmayıb. İnsan yaşlandıqca kökəlir. Hər şey yemək lazımdır. Mən özümü heç nədən məhrum etmirəm, hər şey yeyirəm, amma çox az miqdarda. Bədəni buna öyrəşdirmək lazımdır. Dərim və saçlarıma qulluq edirəm.
 
- Hindistanda keçirilən festivalda "Müsabiqənin ən gözəl qızı" tituluna layiq görüldünüz. Sizcə, efir üçün gözəllik nə qədər önəmlidir?
 
- Bu, tamaşaçıların seçimi idi. Ekran tələb edir ki, aktrisanın üzü baxımlı, saçları parlaq, dərisi şəffaf olsun. Ümumiyyətlə, efirə çıxan hər bir insan bu qaydalara riayət etməlidir. Səhnə gözəllik tələb edir. Tamaşaçının gözü tərəzidir. Göz də baxanda efirdə gərək istirahət etsin. Aktrisalar, müğənnilər gərək gözəl formada, geyimdə, şəffaf olsunlar. Tamaşaçı onlara baxanda valeh olsun, onlar da gözəl görünməyə çalışsın. Efirə çıxan hər bir insan tamaşaçıya müsbət emosiyasını,  qüvvəsini ötürməlidir. Amma elə kök adamlar var ki, min arıq insana dəyər. Kök olmaq ayıb bir şey deyil. Elə kök xanımlar tanıyıram, daxilləri o qədər gözəldir ki, köklüyü o qədər də üzə vurmur. O, həmin çəki ilə də qəbul edilir və sevilir.

- Sosial şəbəkədən izlədiyimiz qədəri ilə, hər zaman stilist Nura xanımla çalışırsınız. Simanızı başqa stilistlərə etibar etmirsiniz? 
 
- Mən Nura Babayeva ilə 10 ildir ki, işləyirəm. Ona qədər bir çox stilistlər mənə müraciət etmişdilər ki, sizinlə çalışaq və yeni imic yaradaq. Mən o təkliflərin heç birinə razı olmamışam. Çünki Nuranın işi məni qane edir. O, öz işinin peşəkarıdır. İşini bilir, onun dünya şöhrətli işləri var. Nurayla işləmək hər bir tanınmış sima üçün fəxrdir. O mənimlə uzun müddətdir ki, işləyir və artıq üz cizgilərimə bələddir. Harada necə görünmək lazım olduğunu yaxşı bilir. Əvvəllər onun yanına gedəndə düşünürdüm ki, onunla bundan sonra işləməyəcəm. Ancaq gördüm ki, başqa stilistlər də ya şaçımı yandırır, ya da üz cizgimə yaraşmayan makiyaj edir. Nuranın işlərini isə nəinki mən, tamaşaçılarım da bəyənir. Onun müştəriləri mənim şəklimi göstərib, həmin cür makiyaj olunmaqlarını istəyirlər. Nura eyni zamanda gözəl insandır, onunla işləmək mənim üçün böyük həzdir. Bir-birimizi başa düşürük, artıq rəfiqə olmuşuq. Onu bir bacı kimi çox istəyirəm. 
 
- Əvvəllər sizi hind rəqslərinin mahir ifaçısı kimi tanısaq da, sonradan aktrisa kimi məşhurlaşmağa başladınız. Xanım həmkarlarınızdan sizə paxıllıq edənlər varmı?
 
- Son 4 ildir ki, aktrisa kimi fəaliyyətə başlamışam, təbii ki, rəqqasəlik də öz yerində. Paxıllıq edənlər yəqin ki, var, ancaq onların kim olduqlarını bilmirəm. Paxıllıq, qısqanclıq daxildən gələn bir şeydir. Nəinki tanınmış sima, adi insanların yanında, ətrafında belə paxıl insanlar olur. Gərək o insanlara baş qoşmayasan. Çevrəmdə bu tip insan olanda, onlara əhəmiyyət vermirəm. Əsas odur ki, sən özün paxıl olma, qalanı boş şeydir. 
 
- Dost seçərkən ən çox hansı keyfiyyətlərə üstünlük verirsiniz?
 
- Mənim üçün dost seçmək dövrü artıq gecdir. Neçə illərdir ki, dostluq etdiyim insanlar var. Hazırda onlar mənim ətrafımdadır. Artıq seçilmişik və onlar da seçiliblər. Bundan sonra ətrafımda olan insanlarda mərdliyə, dürüstlüyə, sirr saxlamaq bacarığına, sözübütövlüyə daha çox önəm verirəm. İnsan gərək ətrafında nə danışdığını bilsin. Çünki sabah sən onunla münasibətlərini bitirdikdə, siz dost olmasanız belə, bu insan sənin haqqında artıq-əskik danışmasın. Amma indiki zamanda dost çox azdır, demək olar ki, yoxdur. Ona görə də dostları diqqətlə seçmək lazımdır. 2 yaxın dostun olsun, amma əsil dost olmağı bacaran insan olsun.  
 
- Ötən mövsüm Xəzər televiziyasında ən baxımlı seriallardan olan, "Oksi media" tərəfindən çəkilən "Lal yuxu" serialının davamı olacaqmı?
 
- Əfsuslar olsun ki, bu mövsüm onu verə bilmədik. Əslində bu mövsüm davam etməli idi. Serialın davamının çəkilişləri üçün sponsor çətinliyimiz oldu. Məhz bu səbəbdən çəkilişlərimiz yarımçıq qaldı. Ona görə "Lal yuxu" serialının davamı olmayacaq. Sponsor tapılsa, ola bilsin ki, çəkdik. Amma hələ ki çəkilişlər dayandırılıb. 
 
- "Oksi media" hazırda hansı işləri görür?
 
- Hazırda bir neçə reklam işləri görürük. Gələn il komediya filmi çəkməyi düşünürük. Filmin ideyası artıq hazırdır, ssenarisi isə hələ ki yazılmayıb. 2019-cu ilin yayında filmin çəkilişlərinə başlayacağıq.   
 
- Yeni çəkilən "Qaragöz" filmində əsas obrazlardan birini canlandırırsınız. Bu filmdə bizi nələr gözləyəcək və siz orada necə bir obraz təqdim edəcəksiniz?
 
- Ekran işinin rejissoru Orxan Mərdan, ssenari müəllifləri Vüqar Hüseynov və Talıb Əhmədov, quruluşçu operatoru isə Elman Əliyevdir. Bu filmdə Elməddin Cəfərovla birlikdə çəkildik. Bundan əvvəl onunla 6 ay ərzində "Bacanaqlar" serialında çəkilmişəm. Yaxşı komandamız var idi. Gözəl filmdir, komediya janrındadır. Film haqqında danışmağa icazə yoxdur. Amma onlarla işləməkdən həzz aldım. Özümü şahzadə kimi hiss edirdim. Böyük hörmət, izzət gördüm. Çəkiliş prosesləri də gözəl keçdi. Oktyabrın 18-də təqdimatı olacaq. 
 
- O dinamik həyatınıza nə zaman qayıdacaqsınız?
 
- İnşallah, dinamik həyatıma bu il oktyabr ayından qayıtmaq fikrindəyəm. Lap dinamik həyatıma isə yanvardan qayıdacam. İki yeni premyeramız olacaq. Xatırladım ki, "Qış nağılı" filmində də rol almışam. Ümumiyyətlə rol aldığım hər iki film çox gözəl komediyalardır. 
 
- Həyatınızda şansın, uğurun yeri haradadır?
 
- Onu deyə bilmərəm, uğur Allahdan gəlir, insan gərək məqsədə çatmaq üçün işini sevsin. Qarşısına qoyduğu məqsədə doğru iri addımlarla getsin ki, nəticə əldə edə bilsin. Şans insanın qapısını oturduğu yerdə döymür. Bu, çox nadir hallarda olur. Amma mənə aid olan şey deyil. Yəni oturduğum yerdə uğur əldə etməmişəm, çalışmışam, əziyyət çəkmişəm. Biz hər şeyi özümüz etmişik, çətinliklərlə nəyəsə nail olmuşuq. Şikayətimiz yoxdur, qoy belə də davam eləsin. Çəkişməsən bərkişməzsən. 
 
- Həyatınızı gizli yaşamağa qərar vermisiniz. Sizi bu addımı atmağa nə vadar etdi?
 
- Tanımış simalar daha çox danışılır, müzakirə olunur. İnsanların bizimlə maraqlanması normal haldır. Sadəcə, şəxsi həyatımı artıq heç kimlə bölüşmək istəmirəm. İndiyə qədər özəl həyatımı  hər kəslə yetərincə bölüşdüm, yetərincə uğursuzluqlarla qarşılaşdım. Hamı bilir ki, mənim ailə həyatımda nələr olub... Bundan sonra istəmirəm mənim özəl həyatımı bilsinlər. Ailə mənim şəxsi həyatımdır, bu heç kimi maraqlandırmasın. Xahiş edirəm ki, şəxsi həyatımla bağlı sual verməyin. "Ərim kimdir?", "hardadır?", "nəçidir?", "nə problemi var?" kimi suallar lazım deyil. Bəsdir, artıq çox gündəmdə oldum, şəxsi həyatımla bağlı ona görə də xoşbəxtlik əldə edə bilməmişəm. İndi də istəmirəm bununla bağlı mətbuatda yazılsın. Sizin vasitənizlə media nümayəndələrinə demək istəyirəm ki, yaradıcılığımla bağlı nə sual olsa verin, mən hazıram, amma ailəmlə bağlı heç bir sualı cavablandırmayacam.

Ölkə.Az

ŞƏRH YAZ
1
BAĞLA