Şəhidlərimizin qanı yerdə qalmayacaq

Yeni dövlət quruculuğu xalq kütlələrinin ideoloji sayıqlığına, siyasi, iqtisadi və mənəvi sahədə səmərəli fəaliyyətinə əsaslanır. Artıq otuz ildən çox milli münasibətlərdə və iqtisadiyyatda üzə çıxan, özünü kəskin şəkildə biruzə verən problemlər bu gün cəmiyyətimiz üçün bəladır. Xalqımıza qarşı torpaq iddiasından əl çəkməyən erməni quldurları hər gün dövlət sərhədlərimizi müxtəlif istiqamətlərdə pozaraq, dinc əhalimizə müxtəlif silahlardan atəş açırlar.
İyulun 13-dən 14-nə keçən gecə Azərbaycan - Ermənistan sərhədinin Tovuz istiqamətində Ermənistan tərəfinin bir gün öncəki 12 iyul təxribatından sonra şiddətli döyüşlər davam etmişdir. Düşmənin ağır hərbi texnikaları, istehkamları, müdafiə qurğuları ordumuz tərəfindən darmadağın edilmişdir. Qarşı tərəf canlı qüvvə ilə 100 nəfərdən çox itki verərək geri çəkilmişdir.
Ağır döyüşlər zamanı ordumuzda da itkilər olmuşdur. General-mayor Polad Həşimov, onunla bərabər bir neçə zabit və əsgər şəhid olmuşlar. General Həşimovun döyüş əməliyyatları zamanı şəhid olması Azərbaycan generallarının əsgərlərlə birgə ön cəbhədə birbaşa döyüşlərdə Vətəni bərabər qoruduqlarını göstərir. Allah hərbçilərimizə rəhmət eləsin. Şəhidlərin qanı yerdə qalmayacaq.
Eyni zamanda Ermənistan tərəfindən Azərbaycanın Tovuz rayonu istiqamətində açılan artilleriya atəşi nəticəsində Ağdam kəndinin sakini, 76 yaşlı Əzizov Əziz İzzət oğlu həlak olub. Mülki əhalini ağır silahlardan atəşə tutmaq, silahsız qocaları qətlə yetirmək faşizmin və barbarlığın əyani təzahürüdür.
Ermənistan özünü tarixən mənsub olduğu terrorçu təşkilat kimi aparır. Mülki əhalini ağır silahlardan atəşə tutmaq erməni vandalizminin ən aşkar və bariz nümunəsidir. Dağlıq Qarabağ münaqişəsinin həlli istiqamətində aparılan sülh danışıqlarını daim kobud şəkildə pozur.
Ermənistan tərəfi bilərəkdən artilleriya qurğularını qəsdən mülki insanların yaşadığı kəndlərin yaxınlığında yerləşdirib ki, Azərbaycan ordusu onun təxribatına qarşı cavab atəşi açdıqda bunu mülki obyektlərin hədəf götürülməsi kimi təqdim etsin. 
Ermənistan ordusunda ruh düşkünlüyü çox yüksəkdir. Zabitlər və əsgərlər döyüşməkdən imtina edir, qaçmaq istəyirlər. Lakin onlar məcburən saxlanılır və həbs edilirlər. Bunu erməni ordusundakı təlaşı, nəzarətsizliyi əks etdirən onlarla videoların yayılması da təsdiqləyir. Bu kimi videoları təkcə sadə ermənilər deyil, zabitlər özləri də yayırlar.
Dünəndən başlayan bu döyüşlər onu göstərir ki, Azərbaycan ordusu ölkə sərhədlərini qorumağa və düşmənə layiqli cavab verməyə hazırdır. Ordumuz artıq 90-cı illərin pərakəndə könüllülər yığımı yox, yüksək hazırlıqlı nizami ordudur.
Güclü Azərbaycan Ordusu düşmənin istənilən təxribatına, həmləsinə layiqli cavab vermək iqtidarındadır. 
2016-cı ilin aprel döyüşləri, hazırda Azərbaycan – Ermənistan sərhədində baş verən hadisələr bunu bir daha təsdiq edir.
Ötən gecə minlərlə insan paytaxtımızın müxtəlif ərazilərində Azərbaycan ordusuna, onun Ali Baş Komandana, dövlətə dəstəyini ifadə edərək əllərində Azərbaycan bayrağı, ölkəmizin himnini oxuyaraq “Qarabağ!”, “Orduya dəstək!” “Ali Baş Komandan, silah ver bizə!”, ”İrəli, irəli, Azərbaycan əsgəri!”, ”Şəhidlər ölməz, vətən bölünməz!” şüarları səsləndirmişlər; Dəstək aksiyaları Xırdalanda, Sumqayıtda və ölkəmizin digər bölgələrində də keçirilmişdir. Bu onu göstərir ki, Azərbaycan xalqının döyüş ruhu yüksəkdir. Xalq-Ordu vəhdəti sarsılmazdır. Xalq dövlət başçısının siyasətini dəstəkləyir. 
Bununla belə, bir qrup insan vəziyyətdən başqa məqsədlər üçün yararlanmağa çalışmışdır. Aksiya iştirakçılarının əksəriyyəti, polislərin dağılma tələbinə əməl edərək evlərinə getdiyi halda, kiçik bir qrup polisin çağırışına əməl etməmiş, orduya dəstək mitinqinin mahiyyətindən uzaqlaşaraq qeyri-qanuni Milli Məclisin binasına daxil olmuş və binaya zərər vurmuşlar. Bu zaman jurnalistlərə qarşı zorakılıq edilmişdir. Təxribatçılar vətənpərvərlik, orduya və dövlətə dəstək aksiyasının istiqamətini dəyişməyə çalışmışlar. Milli Məclisin foyesində “Allahu-Əkbər” şüarları qışqıran gənclər peyda olmuşlar. İnanırıq ki, dövlətimiz belə təxribatların qarşısını qətiyyətlə alacaq, təxribatçılar və beşinci kolonun nümayəndələri məyyənləşdiriləcək və hüquq müstəvisində cəzalarını alacaqlar.
Biz xalqımızın əyilməz iradəsi, uzun illərin əziyyəti və zəhməti, şəhidlərimizin qanı bahasına qazandığımız uğurları hər vəchlə qorumalı, inkişaf etdirməli və istənilən pozuculuğa qarşı öz vətəndaş mövqeyimizi nümayiş etdirməliyik.
Buna görə də istər pandemiya ilə mübarizədə, istərsə də cəbhədə düşmənə qarşı milli birlik, həmrəylik, güclü milli iradə nümayiş etdirmək zəruridir. Hər birimiz məsuliyyətlə davranmalı, nizam-intizama riayət etməli, cəmiyyətimizdəki mövcud təhlükəsizliyi və sabitliyi qoruyub saxlamaq üçün bütün səylərimizi səfərbər etməliyik.
Ermənistanın Azərbaycana qarşı davam edən təcavüzü və təxribatları ilə əlaqədar raspublikamızın siyasi partiyaların milli həmrəyliyə dair bəyanatını yüksək qiymətləndiririk. Bəyanatda deyilir:
“Biz, Azərbaycanın siyasi partiyaları Ali Baş Komandan, Prezident İlham Əliyevin ölkəmizin ərazi bütövlüyünün və əhalinin təhlükəsizliyinin təmin olunması, hər cür erməni fitnəsi və təxribatlarının qarşısının alınması istiqamətində həyata keçirdiyi siyasəti qətiyyətlə dəstəkləyir, onun ətrafında sıx birləşdiyimizi bəyan edirik. Xalqımızı həmrəyliyə, Vətənimizə qarşı uzanan qanlı erməni əllərini qətiyyətlə kəsib atmağa hər an hazır olmağa səsləyirik. Şərəfli tarixi olan Ordumuzla qürur duyur, onunla bir olduğumuzu ifadə edirik. Möhtərəm Prezidentimiz və Ali Baş Komandanımızı əmin edirik ki, hər birimiz Vətənimizin şərəfi və namusu yolunda onun istənilən tapşırığını hər an yerinə yetirməyə hazır olan müsəlləh əsgərik.” 
Siyasi partiyaların belə bir gündə birlik və bərabərlik nümayiş etmələri, xalqın, dövlətin, Ali Baş Komandanın yanında olmaları, hamıya nümunə olmalı, təxribatçı və beşinci kolonun vəziyyəti gərginləşdirməyə çalışmasının qarşısının alınmasına təcili tədbir görülməlidir.
Azərbaycan XİN-i və Müdafiə Nazirliyi ATƏT Minsk qrupu həmsədr dövlətlərinə, BMT-yə, Avropa Birliyinə, aidiyyəti üzrə digər beynəlxalq təşkilatlara Ermənistanın kobud şəkildə atəşkəsi pozması, mülki əhalinin ağır silahlardan bombalanması ilə bağlı məlumatlandırsa da, Ermənistana qarşı heç bir təzyiq edilmir. Adıçəkilən təşkilatlar Ermənistanı dərhal atəşkəs rejiminə əməl etməyə məcbur etməli, Ermənistan hərbi bölmələrinin dinc azərbaycanlı əhalini hədəfə götürməsinə reaksiya verməli və bunu ciddi qınamalıdırlar;
Bütün beynəlxalq təşkilatlar Dağlıq Qarabağı Azərbaycanın ayrılmaz hissəsi kimi tanıyır. 
Cəmiyyətimizin bu günü və gələcəyi indinin adamlarından asılıdır. Sabahımız üçün məsuliyyət daşımalıyıq.

Hacı Hacıyev
Azərbaycan KP MİK sədri