Sərdar Cəlaloğlu: “Müxalifətin koronavirusdan siyasi məqsədləri üçün istifadəsi xalqa xəyanətdir”

Bunu “Ölkə.Az”a açıqlamasında ADP sədri Sərdar Cəlaloğlu deyib. Onun sözlərinə görə, koronavirus pandemiyasından hər hansı siyasi qüvvənin siyasi konyuktura kimi istifadə etməsi yolverilməzdir.

“Belə hala yol vermək olmaz. Çünki koronavirusu hakimiyyət yaratmayıb ki, onu tənqid edəsən. Bu bir bioloji bəladır və bütün dünya buna qarşı mübarizə aparır. Koronavirusdan siyasi məqsədlər naminə istifadə edilməsi daha çox insan itkisinə səbəb olacaq”, - ADP lideri deyib.

S.Cəlaloğlu hesab edir ki, koronavirus pandemiyası məsələsində iqtidarla müxalifət birgə fəaliyyət göstərməlidir:

“İqtidar da, müxalifət də koronavirusu özünə rəqib seçməlidir. Hamı birlikdə buna qarşı mübarizə aparmalıdır. Əgər koranvirus məsələsində bir-birimizə qarşı mübarizə aparacağıqsa, o zaman koronavirus qalib gələcək. Ona görə də bu gün Azərbaycanda müxalifətlə iqtidar birləşib koronavirusa qalib gəlməlidir. Çünki bu bir qlobal problem olduğundan hamımız bu məsələdə eyni mövqedən çıxış etməliyik”, - ADP sədri deyib.

Mürtəza 
Ölkə.Az