Serj Sərkisyan Dağlıq Qarabağ problemindən danışdı

"Ölkə.Az" xəbər verir ki, Sərkisyan müsahibəsində Dağlıq Qarabağ probleminə toxunub.

Həmişə olduğu kimi bu dəfə də erməni prezidenti sərsəm fikirlər səsləndirib. Əslində bu fikirləri diqqətlə oxuyanda Sərkisyan öz əməllərini ifşa edib.

Sərkisyanın fikrindən sitat: "Bir əl ilə danışıqlar aparıb, digər əl ilə atəş açmaq olmaz. Danışıqlar atəşi xoşlamır". 

Yaxşı, belədirsə, niyə hər dəfə danışıqlar başlayanda erməni tərəfi həyasızcasına atəşkəsi pozur? Sərkisyanın bu fikri erməni həyasızlığının bariz nümunəsidir.

Sərkisyan fikirlərinə belə davam edib: "Son iki il ərzində biz Vyana, Sankt-Peterburqda görüşlər keçirmişik, razılıqlar əldə edilib. Hazırda proses iki istiqamətdə davam edir. Birinci istiqamət, gərginliyi azaltmaqdır. Bu isə güvən atmosferinin yaranmasına səbəb olacaq".

Sərkisyanın bu fikri də cəfəngiyyatdır. Çünki danışıqlar zamanı atəşkəsi pozan, gərginliyi artıran da elə erməni tərəfidir. Bu fikirlə razılaşmayanlar son il ərzində baş verən prosesləri və xəbərləri izləsələr, kifayət edər.

"Mən dəfələrlə söyləmişəm, bir əl ilə danışıqlar aparmaq, digər ilə atəş açmaq mümkün deyil. Danışıqlar atəş xoşlamır. Belə şərtlərdə hər hansı bir razılaşma əldə etmək mümkün deyil"- Sərkisyan belə deyib.

Son cümlə ilə Sərkisyan xoruzun quyruğunu göstərir. Deməli, danışıqlar vaxtı atəşkəsi pozmaq, gərginlik yaratmaq danışıqlarda hər hansı bir razılıq əldə etməyə imkan vermir. Bu fikri ilə erməni prezidenti öz siyasətini ifşa edir. Danışıqlarda razılıq əldə etmək istəyən erməni tərəfi niyə hər dəfə atəşkəsi pozur?

Sərkisyanın sözlərinə görə, insan qurbanları faciədir. Bu isə danışıqlar prosesinə mənfi təsir edir: "Sakit atmosferdə hər sözü çəkmək, hər fikri dəyərləndirmək lazımdır ki, razılıq əldə edilsin".

Görəsən, bu fikirləri səsləndirən Sərkisyan Xocalı qətliamını, Fizulinin Alxanlı kəndinin sakini kiçik Zəhranın ölümünü, erməni atəşi nəticəsində həlak olan dinc azərbaycanlıları unudubmu?

Sərkisyan qeyd edib ki, problemin nizamlanması üçün təmas xəttində sülh hökm sürməlidir və heç bir qurban olmamalıdır.

Bu fikir də Sərkisyanın iç üzünü ifşa edir. Yenə də təkrar edirik, istər təmas xəttində, istər danışıqlar vaxtı atəşkəsin pozulmasına görə birbaşa cavabdehliyi Sərkisyan daşıyır.

Hikmət Həsənov
Ölkə.Az