Sərkisyanın əleyhində olan sənədə imza atmadığı deyilən Qarabağlı qadın danışdı
“Ölkə.Az” xəbər verir ki, BAXCP sədrinin müavini Niyaməddin Orduxanlı saytımıza açıqlamasında bildirib ki, bir qrup QHT rəhbəri Sərksiyanın əleyhinə imza atmaqdan imtina ediblər. Həmin siyahıda Nəzakət Ağayeva adlı şəxsin adı da var. Siyahıda Nəzakət xanım QHT rəhbəri kimi təqdim olunub.
Məsələ ilə bağlı Nəzakət Ağayeva “Ölkə.Az”-la əlaqə saxlayaraq bildirdi ki, bu məsələdən ümumiyyətlə xəbərsizdir. Onun sözlərinə görə, heç kim ona imza atmaq üçün hansısa sənəd təqdim etməyib:
“Mən siyasət adamı deyiləm. Mən indi QHT fəaliyyətilə məşğul da deyiləm. Mənə kimsə sənəd imzalamaq üçün heç nə təqdim etməyib. Özüm qarabağlıyam. Atam da, anam da Qarabağdandır. Ermənistan işğalçı dövlətdir. Mənim ata-baba yurdumu talan ediblər. Sərkisyan da cinayətkardır. Bu necə ola bilər ki, mən elə bir siyahıya düşüm”, - deyə N.Ağayeva bildirib.
Nəzakət xanım adının həmin siyahıda olmasında çox narahat olduğunu bildirib:
“Öz ölkəmin içində yaşayan adamam. Bilmək istəyirəm ki, həmin siyahını kim hazırlayıb. Sadə ingilis dili müəllimiyəm. Həm də tərcüməçiliklə məşğul oluram. Çoxdan QHT-də işləmişəm, amma təşkilatım olmayıb. Özüm üçün də maraqlıdır ki, mənim adımı kim həmin siyahıya salıblar. Heç bilmirəm ki, həmin informasiyanı kimlər verib. Sabah mən "Facebook" səhifəmdə də yazacam. Sadə bir vətəndaşam. Adımı yalandan siyahıya salmaqla kim nə qazanır?”.
Qeyd edək ki, BAXCP sədrinin müavini Niyaməddin Orduxanlı bildirib ki, Ermənistan Prezidenti Serj Sərkisyan Avropa İttifaqına rəsmi səfərə gedir və bununla bağlı Azərbaycanda fəaliyyət göstərən Şərq Tərəfdaşlıq Vətəndaş Cəmiyyəti Formunun bir qrup üzvü Avropa İttifaqının rəhbərliyinə rəsmi müraciət edib. Müraciətə imza atanlar Avropa İttifaqını Sərkisiyanın Azərbaycana qarşı qeyri-qanuni ərazi iddialarından imtinaya, Azərbaycanın işğal olunmuş ərazilərindən Ermənistan silahlı qüvvələrinin çıxarılmasına və zorla sərhədlərin dəyişdirmək cəhdlərinin təhlükəli presedent olduğunu nəzərinə çatdırmağı qeyd ediblər.
Ziya Səccad
