Sərxan Sərxan: \"Tofiq Quliyev ona demişdi ki, \"başını bişir\", birtəhər yola gətir\"

 "Ölkə.Az"-ın məlumatına görə, İTV-nin "Yeni gün" verilişində qonaq olan sənətçi bir sıra maraqlı açıqlamalar verib. Dekabrın 17-dən Bakıda olduğunu deyən sənətçi, Rəşid Behbudov adına Mahnı Teatrında baş tutan solo konsertindən də danışıb:

"Solo konsertimiz dekabrın 20-də oldu və çox maraqlı keçdi. Tamaşaçılarla ünsiyyətdə olduğum üçün çox sevindim. Həmçinin  bu günlərdə "Qaya" ansamblının bədii rəhbəri, xalq artisti Rauf Babayevin 80 illik yubileyidir. Həmin yubileyin çəkilişlərində iştirak etdim və səbəbkara onun bəstəsini ifa etməklə, sürpriz elədim. Romans formasında olan bəstəni gitarayla ifa etmişəm".

Sərxan Sərxan gənclik illərində çəkildiyi "Musiqi müəllimi" və "Qırmızı limuzin" filmlərindən də danışıb. Deyib ki, o, "Musiqi müəllimi" filminə əfsanəvi bəstəkar Tofiq Quliyevin təkidi ilə çəkilib:

"Film 1983-cü ildə çəkilib. Mosvadaydım, təklif gəldi, əvvəlcə razılaşmadım. Görkəmli şair Onegin Hacıqasımovla Tofiq Quliyev dost idilər. Tofiq müəllim Hacıqasımova demişdi ki, onun "başını bişir", birtəhər yola gətir, çəkilsin. Filmin musiqisini Tofiq müəllim yazmışdı. Sonradan filmə çəkilməyə razılıq verdim. Ardınca isə "Qırmızı limuzin" filmində çəkildim. Ssenarini Anar Rzayev yazmışdı. Amma bu, əvvəlkindən fərqli olaraq musiqi filmi olmadığına görə, bir az çətinlik çəkdim. Düzünü desəm, filmə çəkilməyi o qədər də xoşlamıram. Çünki filmə çəkilmək çox ciddi və çətin işdir. "

 Qeyd edək ki, Sərxan Sərxan 1952-ci ildə Bakıda anadan olub. Moskva Konservatoriyası nəzdində musiqi məktəbinin gitara sinfini, hərbi xidməti başa vurduqdan sonra isə Qnesinlər adına Musiqi məktəbini vokal üzrə bitirib. Moskva və Azərbaycan Filarmoniyalarında çalışıb. Bir neçə filmə çəkilib. 2012-ci ilin aprelində "Humay" mükafatına layiq görülüb.

İntiqam VALEHOĞLU

Ölkə.Az