Şimali Koreyanın müharibə elanından sonra Çindən çox təhlükəli açıqlama

“Ölkə.Az” xəbər verir ki, Şimali Koreya xarici işlər naziri Lu Yon Xonun Trampın Şimali Koreyaya müharibə elan etməsilə bağlı bəyanatı böyük səs-küyə səbəb olub. Onun “ABŞ prezidenti Donald Tramp Şimali Koreyaya qarşı müharibə elan edib”, “biz istədiyimiz an Amerika bombardmançı təyyarələrini vura bilərik” fikirləri birmənalı qarşılanmayıb. Bu bəyanatlardan sonra Amerikanın cavabı özünü çox gözlətməyib.

Ağ Evdən bildiriblər ki, Amerika Şimali Koreyaya müharibə elan etməyib. Bu açıqlamadan sonra məsələyə Çin qoşulub. Çinin Birləşmiş Millətlər (BMT) üzrə daimi nümayəndəsi Liu Jieyi “Reuters”a bildirib ki, iki ölkə arasında gərginlik son həddə çatıb. Onun sözlərinə görə, hər iki ölkə rəhbərliyi münasibətlərin bu həddə çatmasına imkan verməməlidir.

“Münasibətlərin bu qədər gərginləşməsi heç bir dövlətin xeyrinə deyil. Hər iki tərəfi sakit və təmkinli olmağa çağırırıq”, - deyə Liu Jieyi bildirib.

Çinli diplomat problemlərin danışıq yolu ilə həll olunmasını təklif edib: “Təklif edirik ki, münasibətlər danışıq yolu ilə həll edilsin. Alternativ yol fəlakətə yol açar”.

Ziya Səccad
Ölkə.Az