Siyavuş Novruzovun açıqlamasına aktyorlardan
Qeyd edək ki, Parlament komitələrinin birgə iclasında 2018-ci ilin dövlət büdcəsinin müzakirəsi zamanı Siyavuş Novruzovun millət vəkillərinin məvaciblərinin artırılmasını təklif etdiyi bildirilir:
"Əksər işləri Milli Məclis həyata keçirir. Həmçinin burada bizdən çox işləyən əməkdaşlar var. Onların əmək haqqı artırılmalıdır"
Əməkdar artist Əli Nur "Ölkə.Az"a açıqlamasında deputatın fikrinə sərt reaksiya verib:
"Mən bütün deputatların, məmurların məvaciblərinin nəinki artırılmasının, hətta onların əmlaklarının müsadirə edilməsinin tərəfdarıyam. İnsanın gözü doyar da. Biz müharibə şəraitində yaşayan ölkəyik, başımıza min cür müsibətlər gəlib, bu qədər torpaq itirmişik. 450 min kvadratkilometr torpağımız yadların əlindədir, yenə bunların gözü doymur? Bütün rayonlarda mülkləri, dəniz qırağında villaları, hər binanın alaqapısında mənzilləri var. Yenə də gözləri doymur? Görmürlər ki, insanlar it günündə yaşayır? Ayıbdır e".
Əməkdar artist Abbas Qəhrəmanov isə bunları deyib:
"Büdcədən maliyyələşən təşkilatlarda maliyyə artımı gözlənilir və bu, çox sevindirici haldır. Bu o deməkdir ki, dövlətin yeni qayğı tendensiyası işə düşüb. Deputatların məvacibinə gəlincə, o da dövlət büdcəsidir. Ancaq nəzərə alınmalıdır ki, digər büdcə təşkilatlarının məvacib artımına daha çox ehtiyacı var. Ona görə də bir qədər səbrlə yanaşmalarını istərdim. Teatra dövlət qayğısı var və bunu şəxsən hiss edirəm. Buna görə də minnətdarlığımı bildirirəm".
Əməkdar artist İlqar Cahangir: "Görməmişdilər də, gözləri doymur, vəssalam. Qoy aktyorların da məvacibini deputatlara versinlər. Onsuz da aktyorlara pul lazım deyil ki".
İntiqam VALEHOĞLU
Ölkə.Az