Son 50 ilin ən yaxşı üç romanı — SORĞU

Son 50 ilin ən yaxşı üç romanı
23:42
21.10.2017
888
Mədəniyyət
A
Son 50 ilin ən yaxşı üç romanı hansıdır?

“Ölkə.Az” xəbər verir ki, kulis.az bu barədə yazıılarımız arasında sorğu keçirib. 

Cavabları təqdim edirik. Məlumat üçün bildirək ki, bəzi yazıçıların siyahısı üçlüyə sığışmayıb, yaxud onlar yalnız Azərbaycan ədəbiyyatından seçiblər.      
 
Fəxri Uğurlu
 
Qabriel Markes “Yüz ilin tənhalığı”,  Çingiz Aytmatov “Gün var əsrə bərabər”, Orxan Pamuk “Qara kitab”.
 
Nəriman Əbdürrəhmanlı
 
Q.Q.Markes “Yüz ilin tənhalığı”,  Otar Çiladze “Uğruma çıxan adam”, Orxan Pamuk “Mənim adım qırmızı”.
 
Rüstəm Kamal
 
Dino Buzatti “Tatar çölü”, İtalo Kalvino “Bir qış günü əgər bir yolçu”, Yevgeniy Vodolazkin “Lavr”, Kobe Abe “Qutu insan”
 
Aqşin Yenisey
 
Kobo Abe “Qumluqdakı qadın”, Günter Qrass “Tənəkə təbil”, Joze Saramaqo “İsanın İncili”.
 
Natiq Məmmədli
 
“Yüz ilin tənhalığı”. Yalnız Markes. Mən oxuduqlarımdan heç biri ona çata bilməz.
 
Elçin Hüseynbəyli
 
Düzü, bu cür təsnifatlar və qiymətləndirmələr ürəyimcə deyil. Mənimçün maraqlı mətn və yazıçılar var, ancaq "ən" epitetini sevmirəm. Cəlil Məmmədquluzadənin hekayələrini, Şalom Aleyxumun "Südçü Tevye"sini, Andrey Platonovun əsərlərini (siyahını uzatmaq olar) dönə-dönə və ləzzətlə oxuyuram. Bilmirəm, onlara ən yaxşı demək olar, ya yox. Həm də bunlar sizin sorğunuzun cavabı deyil. Çünki bu yazıçılar 100 ildir yoxdurlar. Yusif bəy Vəzirin (mənə görə müəllifin adı belədir, romanımda da bunu təsdiq eləmişəm) "Əli və  Nino" romanını da sevirəm, amma o da 100 il qabağın əsəridir. Sizə bir şey deyim. Orxan Pamuku hamı tərifləyir, amma mənə görə adi yazıçıdır. Ondansa Haruki Murakami daha cəlbedicidir. Əgər mütləq üç əsər seçməyimi istəyirsinizsə, məcburam öz ədəbiyyatımızdan deyim. Anarın "Beşmərtəbəli evin altıncı mərtəbəsi”, Elçin Hüseynbəylinin "141-ci Don Juan" romanı, Şərif Ağayarın "Gülüstan" romanı... Qalanları var e, amma yadıma düşmür. Hər halda "ən yaxşı" ifadəsi ilə razı deyiləm və bəlkə ona görə də cavablarım əndrabadi görünür.
 
Qismət
 
Son 50 ildən söhbət gedirsə, demək indiki əsrdən 17 il, ötən əsrdən 33 il götürürük, beləliklə, təxminən XX əsrin 70-ci illərindən bu yana yazılan romanlar arasından seçim etməliyik. Çətin məsələdir, çünki çox böyük həcmdən söhbət gedir, biz isə yalnız oxuduqlarımızdan (əldə edə bildiklərimiz) çıxış edə bilərik, bunlar isə həmişə azdır. Bu mənada mənim seçimdə də qaçılmaz şəkildə subyektiv və məhdud olacaq, üstəlik, üç romanla kifayətlənə bilməyəcəm. Mənim tələsik və sıxışdırılmış variantım belədir:
 
1. Vladimir Nabokov – “Ada və ya arzu” (1969)
2. Jorj Perek – “Həyatdan istifadə qaydaları” (1978)
3. İtalo Kalvino – “Əgər bir qış gecəsi bir səyyah...” (1979)
4. Salman Rüşdü – “Gecəyarısı uşaqları” (1980)
5. Milorad Paviç – “Xəzər lüğəti” (1984)
6. Pol Oster – “Nyu-York trilogiyası” (1987)
7. Culian Barns – “10,5 hissədə dünya tarixi” (1989)
8. Orhan Pamuk – “Qara kitab” (1990)
9. Roberto Bolano – “Vəhşi xəfiyyələr” (1998)
10. Enrike Vila-Matas – “Bartlbi və çevrəsi” (2000)
11. Cefri Yevgenidis – “Middlesex” (“Orta cins” kimi çevirmək olar) (2002)
12. Conatan Safran Foer – “Hər şey aydınlandı” (2002)
 
Cəlil Cavanşir
 
Don Delillo "Ağ gurultu", Milan Kundera "Ölümsüzlük", Lui de Berner "Kapitan Korellinin Mandalinası".
 
Sevinc Elsevər
 
"Mənim adım qırmızı", Orxan Pamuk, "Müharibənin qadın olmayan üzü" - Svetlana Alekseyeviç, "Qanköçürmə stansiyası" - Sabir Əhmədli... Sonuncuya povest deyirlər anma. Bunlar oxuduqlarımdı.  Ola bilsin oxumadığım əsərlər arasında daha yaxşıları var. Orxan Pamukun  6 romanını oxumuşam. Amma ən çox "Mənim adım Qırmızı" təsirləndirib.  Əsərin strukturu-filan.  Qərb-Şərq mövzusu. Amma 3 əsər seçmək çətinə salır adamı. Azərbaycanda son əlli ildə yazılan yaxşı əsərlərin sayı çoxdur.  Hətta son 20 ildə də yaxşı əsərlər yazılıb.
 
Cavid Zeynallı
 
Orxan Pamuk “Mənim adım qırmızı”, Mustafa Məstur “Tanrının ay üzündən öp”, Markes “Polkovnikə heç kim yazmır”
 
Kamran Nəzirli
 
Azərbaycan ədəbiyyatından İsmayıl Şıxlının "Dəli Kür" romanı,
Rus ədəbiyyatından Konstantin Paustovskinin "Həyat haqqında povest" romanı, dünya Ədəbiyyatında Qabriel Markesin "Gözlənilən bir qətlin tarixçəsi".
 
Mirmehdi Ağaoğlu
 
"Yüz ilin tənhalığı", "Gecəyarı uşaqları", "Qara kitab"
 
Ayxan Ayvaz
 
Culian Barns “Aqibət duyğusu”, Kazuo İşuquro “Məni əsla tərk etmə”, Orxan Pamuk “Məsumiyyət muzeyi”
 
Azad Yaşar
 
Çingiz Aytmatov “Gün var əsrə bərabər” (1980), Kobo Abe “Qutu insan” (1973), Frederik Beqbeder “Romantik eqoist” (2005)
 
Rəbiqə Nazimqızı
 
Markes “Yüz ilin tənhalığı”, Orxan Pamuk “Qara kitab”, Viktor Pelevin “Omon Ra”.
 
Mətləb Muxtarov
 
Qabriel Qarsiya Markes "Yüz ilin tənhalığı", Salman Rüşdi "Gecəyarı uşaqları", Milan Kundera "Ölümsüzlük"

ŞƏRH YAZ
0

Kannda Azərbaycan mədəniyyəti günləri başlayıb

Kannda Azərbaycan mədəniyyəti günləri başlayıb
12:37
15.07.2018
884
Mədəniyyət
A
Heydər Əliyev Fondunun təşkilatçılığı ilə Fransanın Kann şəhərində Azərbaycan mədəniyyəti günləri başlayıb.

Heydər Əliyev Fondundan APA-ya verilən məlumata görə, mədəniyyət günləri çərçivəsində iyulun 14-də Kanndakı Festivallar və Konqreslər Sarayında Azərbaycanın görkəmli rəssamları Lətif Feyzullayevin və Vəcihə Səmədovanın əsərlərindən ibarət “Məhəbbət tandemi” sərgisinin açılış mərasimi olub.

Sərginin açılışında Kann şəhər merinin müavini Frank Şıkli, Azərbaycanın Birinci vitse-prezidentinin köməkçisi, Heydər Əliyev Fondunun icraçı direktoru Anar Ələkbərov və ölkəmizin Fransadakı səfiri Rəhman Mustafayev çıxış ediblər. F. Şıkli Kannda artıq ənənəvi olaraq keçirilən Azərbaycan mədəniyyəti günlərinin əhəmiyyətindən danışaraq qeyd edib ki, bu layihə hər iki xalqı bir-birinə yaxınlaşdırmaqla yanaşı, mədəniyyət xəzinəmizi, tariximizi dərindən tanımağa imkan yaradır, ikitərəfli münasibətləri daha da zənginləşdirir. A.Ələkbərov belə əlamətdar gündə - 14 iyul Fransanın milli bayramında açılışı keçirilən Azərbaycan mədəniyyəti günlərinin dostluq, qarşılıqlı maraq və hörmətə əsaslanan, müxtəlif sahələri əhatə edən əlaqələrə dayandığını bildirib. Birinci vitse-prezidentin köməkçisi iki ölkə arasında siyasi əlaqələrin yüksək səviyyəsindən, son illər ölkələrimiz arasında mövcud olan bütün münasibətlərin strateji əməkdaşlıq xarakteri daşımasından söz açıb.Eyni zamanda mədəniyyət sahəsindəki əməkdaşlığın bugünkü səviyyəyə çatmasında Azərbaycan Respublikasının Birinci vitse-prezidenti Mehriban Əliyevanın böyük əməyi olduğunu diqqətə çatdırıb. Vurğulayıb ki, Mehriban Əliyeva Azərbaycan Respublikasının Milli Məclisində Azərbaycan-Fransa parlamentlərarası əlaqələr üzrə işçi qrupun rəhbəri olduğu dövrdə, Heydər Əliyev Fondunun prezidenti kimi, hazırda isə ölkəmizin Birinci vitse-prezidenti kimi Azərbaycan-Fransa əlaqələrinin möhkəmlənməsinə həmişə xüsusi önəm verib. Məhz onun şəxsi təşəbbüsü və dəstəyi ilə bir çox genişmiqyaslı layihələr uğurla həyata keçirilib: “2018-ci il Azərbaycan xalqı üçün çox əlamətdar bir ildir. Bu il biz müsəlman Şərqində ilk parlamentli respublikanın – Azərbaycan Xalq Cümhuriyyətinin yaranmasının 100 illiyini qeyd edirik. Məhz 100 il bundan əvvəl Azərbaycan Parlamentinin sədri Əlimərdan bəy Topçubaşovun rəhbərliyi ilə nümayəndə heyətinin iştirak etdiyi Paris Sülh Konfransında Azərbaycan Xalq Cümhuriyyəti müstəqil dövlət kimi tanınmışdı. Heydər Əliyev Fondu ölkəmiz və xalqımız üçün əlamətdar olan bu hadisəyə həsr edilmiş silsilə tədbirlər keçirir. Təsadüfi deyil ki, bu tarixi hadisəyə həsr olunmuş ilk tədbir məhz Fransanın paytaxtı Parisdə keçirilib”.

Bildirilib ki, “Məhəbbət tandemi” sərgisi Azərbaycanın Əməkdar İncəsənət Xadimi Lətif Feyzullayevin anadan olmasının 100 illik yubileyinə həsr olunub. Lətif Feyzullayev və Vəcihə Səmədova cütlüyünün yaradıcılıq irsi ölkəmizin gözəl məkanlarını və xalqımızın həyat tərzini əks etdirir. Sərgidə bu cütlüyün 50-dən çox əsəri nümayiş olunur.

Səfir Rəhman Mustafayev Birinci vitse-prezident Mehriban Əliyevanın iki ölkə arasında münasibətlərin möhkəmlənməsinə verdiyi töhfələri xatırladıb.  

Çıxışlardan sonra “Məhəbbət tandemi” sərgisinin açılışı olub. Tədbir iştirakçıları sərgini ziyarət ediblər.

Sərgidə Lətif Feyzullayevin və Vəcihə Səmədovanın doğma yurdumuzun gözəlliyini, soydaşlarımızın həyat tərzini, qayğılarını və əməyini əks etdirən əsərləri böyük maraqla qarşılanıb. Həmçinin hər iki rəssamın həyat yolundan bəhs edən videoçarxlar nümayiş olunub.

Sərgiyə gələn sənətsevərlərə Heydər Əliyev Fondunun ölkəmizin tarixi, mədəniyyəti, musiqisi haqqında fransız dilində nəşrləri hədiyyə edilib.

“Məhəbbət tandemi” sərgisi avqustun 4-dək davam edəcək.

Kann şəhərində Azərbaycan mədəniyyəti günləri çərçivəsində ziyafət də təşkil edilib. Gecədə Azərbaycanın tanınmış musiqiçiləri – Xalq Artisti Ənvər Sadıqov və Əməkdar Artist Emil Əfrasiyabın iştirakı ilə konsert proqramı təqdim olunub, milli musiqimizin inciləri səsləndirilib.

Qeyd edək ki, Heydər Əliyev Fondunun təşkilatçılığı ilə Kann şəhərində Azərbaycan mədəniyyəti günləri 2013-cü ildən keçirilir. Azərbaycan tarixi, mədəniyyəti və incəsənətinin təbliği, ölkələr və xalqlar arasında əlaqələrin genişlənməsinə xidmət edən layihə çərçivəsində mütəmadi olaraq müxtəlif sərgilər, konsert proqramları təşkil edilir.

Ölkə.Az

ŞƏRH YAZ
0

"Hökumə Qurbanovanın paltarını doğramışdılar" — əməkdar artist illərin SİRRİNİ AÇDI

15:02
12.07.2018
3078
Mədəniyyət
A
Akademik Milli Dram Teatrının aktyoru, əməkdar artist Elşən Cəbrayılov əfsanəvi aktyorlar arasındakı münaqişələrdən danışıb.

"Ölkə.Az"ın məlumatına görə, aktyor bildirib ki, bu gün dəbdə olan qalmaqallar illər öncə də mövcud imiş:

"Hökumə Qurbanovanın tamaşadan bir neçə dəqiqə öncə səhnə paltarını doğrayıblar. Əliağa Ağayev kimi aktyora qarşı da teatrda qruplaşmalar olub. Sonradan həmin aktyorlar Əliağa müəllimə deyiblər ki, bağışla, sənə qarşı filan hərəkəti biz etmişdik. Çünki biz sənə olan alqışları, sənə gələn çiçəkləri qısqanırdıq".

Əməkdar artist bildirib ki, illər öncə sənət adamları bir-birini tamaşaçı məhəbbətinə qısqanırdılarsa, indi bunu başqa şeylər əvəz edib:

"İndi sənətçilər bir-birini başqa şeylərə qısqanırlar. Bu səbəblərin arasında sponsor da var. Getdikcə sənətdə cılızlaşma baş verir. Bu sənəti qoruyub saxlamalıyıq. Çünki yediyimiz sənətin çörəyidir".

Qeyd edək ki, bu gün E.Cəbrayılovun 41 yaşı tamam olur.

İntiqam VALEHOĞLU
Ölkə.Az

ŞƏRH YAZ
0
BAĞLA